1 Ti danas ga koma ǁgam
tsî ti mûsa ǁgamǀau hâo!
O ta ga tsēs tsî tsuxuba ti ǁaes ôas din,
ǃgamhe hâna āba hâ.
2 ǃGûkhoenom-e ta ga koma ǃgaroǃhūb ǃnâ ūhâ,
ǁî-iǀî ta ti khoena ǁnāxū tsî ǁîna xu nî bē-e.
Hoan a ǃgamekhôaxa
tsî gāxaǃnâ khoe amaga.
3 Khās khamin nams âna ra ǂgaeǃnâ
ǂhumib ge amab ǃās ǃnâ ǃhūbaiba gaoǂam hâ.
“Ti ǁaes ge ǂkhabasiba xu ǂkhabasib ǃoa ra ǃgû,
xawen ge tita ǁîn Elose ǂanǃgâ tama hâ”
tib ge ǃKhūba ra mî.4 “Mâ-i hoa-i ge ǁî-i ǀhōsana nî ǃûisen
tsî ǃgâsa-i xare-e ǂgomǃgâ tide.
Mâ ǃgâsab hoab Jakob khami gāxaǃnâ
tsî-i mâ-i hoa-e ǀhōsa-i â-e mîǁgaiǁgai ǁkhā xui-ao.
5-6 ǀHōsan ge ǁîǃnābe ra gāxaǃnâgu;
ǀgui-i tsîn ge amaba ǃhoa tama hâ.
Nams ânan ge ǂhumisa ge ǁkhāǁkhā
ǁoreb ǀkhan ge ra ǀhupuǀhupusen.
Sa ǁanǃkhais ge gāxaǃnâsib ǁaegu hâ;
gāxaǃnâsiba xus ge tita ǂansan ra ǂkhāsa”
tib ge ǃKhūba ra mî.7 ǁNā-amagab ge ǃKhūb Hoaǀgaixaba ra mî:
“Tita ge ǁîna tsunitsuni tsî nî ǃâitsâ.
Tare-e ta ǁnâi a dī ǁkhā
ti ǁaes di ǁoren ǂama?
8 Nams ân ge a ǁōǁōsa ǂā,
gāxaǃnâse ra ǃhoasa.
Ams â-i ǀkha i mâ-i hoa-e ǃgâise ra ǃhoa
mâ-i hoa-i ǁî-i ǀgūkhoe-i ǀkha ǂkhîba ams â-i ǀkha ra ǃhoa,
xawe ǂgaob â-i ǃnâ ǁî-e ǁnoasa ra ǁguiba.
9 Nē xūn ǃaroma ta ǁîna ǁkhara tide?
Ti ǀomsa ǁnâi ǀkhaobasens tide, nē ǁaes khami īs tawa?”
tib ge ǃKhūba ra mî.10 “ǃHomgu ǂama ā tsî ta nî ǃgae,
tsî ta ǃgaetsanasa ǃgaroǃhūb di ǃû-aidi ǂama nî ǁnae,
ǂnâsa tsîn khauǃkhūhe hâ
tsî khoe-i xare-i ge ǁnāpa-u ǃkharu tama hâ.
ǀGoa-i xare-i ge ǁnâuhe tama hâ,
hoaraga ǀhomanin, xamarin tsî ǀgurun ge a ǀkhai” ti ta ge ge mî.
11 “Tita ge Jerusalemsa ǀuiǁkhobose,
ǀgirin ǁanǃkhaise nî dī.
Judab ǃāde ta ge ǃū-aisa ǃāse nî dī;
khoe-i xare-i xa di ǁanǃnâhe tidese” tib ge ǃKhūba ra mî.
12 Gā-ai-i nēsa ǁnâuǃā ǁkhā-e mâpa hâ? Tari-i xab ǃKhūba gere ǃhoa, ǁîsa sī nî aoǁnâse? Tarexab ǃhūba hîkākāhe tsî ǃgaroǃhūb ase ge ī, khoe-i xare-i ǁîb ǃnâ ǃgûǃkharu ǁkhā tides kōse?
13 Ob ge ǃKhūba ge ǃeream: “Ti ǂhanub, ǁîn aiǃâ ta ge ǁguiban ge ǁnāxū tsî ti domma ǃgâ tama i tsî ti ǁkhāǁkhāde sao tama i amagas ge. 14 Tsîn ge ǃnâudanaxasib ǀkha ǁîn ǂgaoga sao tsî Baalga ge ǃoaba, ǁîn îgu xan ge ǁkhāǁkhāhe khami.” 15 ǁNā-amagab ge ǃKhūb Hoaǀgaixab, Israels Eloba nēti ra mî: “Mû tita ge nē ǁaesa au ǂûna ǂû kai tsî ǃgāxa ǁgam-e nî āsi.
16 “Tita ge ǁîna Jodeǁîtaman, ǁîn tamas ka io ǁîn aboxagu ge ǂan tama hâ in ǁaegu nî ǀgaruǀgaru. Gôab ǀkha ta ge ǁîna nî ǃgôaǃgon kai, hoaragan nî ǃgamǂuihes kōse.”
Jerusalems din ge huib ǃaroma ra ā
17 Nētib ge ǃKhūb Hoaǀgaixaba ra mî:
“ǃGaoǃgâ re;
î du ǃgae ra tarade ǂgai re î di hā;
ǃgâi ǂansa ǁnās ǃnâ ūhâde sî re.
18 “A di ǃhaese dī tsî sida ǂama hā ā re,
sida mûdi nî ǁgamrob xa ǀoa
tsî sida ǀammega xu ǁgamma dâus kōse.”
19 ǁNâu re Sions ǃnâ hâ ǃgaesa:
“Sida ge hîkākāhe hâ!
Sida ge hoaragase tao hâ!
Sida ǃhūba da ǁnāxū hâ ǃkhais xa;
sida ǁanǃkhaidi aoǁguihe hâs xa.
20 “ǁNâu re taraso, mîs ǃKhūb disa,
îs ǂgaesa mîs ǁîb ams disa ǃkhōǃoa re.
Î so saso ôade mâti di nî ǃoa ǃkhaisa ǁkhāǁkhā,
tsî saso ǀhōsana mâtin ǁkhōdi tawa nî ǁnaesa.
21 ǁŌb ge sada mûǂuidaodi ǃnâ-u ǂgâ hâ,
tsî sada gao-omdi ǃnâ ǂgâxa hâ.
ǀGôana ǃganga xu ǃgaoǁnâ
tsî ǂkham khoega ǁamaxūǃkhaiga xu.
22 ǁŌ hâ khoen sorodi ge hoa ǃkhain ai ra ǁgoema,
ǂhaub hîa ǃhanagu ǃnâ ǁgoeb khami.
ǃHorob hîa ǃgaoǁnâhe tsî ǀhaoǀhao-aona ǁnāxūǁguibahe hâb,
khoe-i ǀhaoǀhao tamab khami”
tib ge ǃKhūba ra mî.23 Nētib ge ǃKhūba ra mî:
“Gā-ai-e a-i tā ǁî-i gā-aisib xa koasen
tsî ǀgaisa-e ǁî-i ǀgaib xa;
tsî ǃkhū hâ-e ǁî-i ǃkhūsib xa.
24 Tsî i kom khoe-e ga koasen ǂgaoo,
o-i ge tita ǂan tsî-i ra ǁnâuǃā tes xa nî koasen;
ti ǀnammi ra hâhâ
tsîn tita ra dī xūna ǃgâi tsî ǂhanu-ai amaga.
Nēn ge xūn ǁîn ǃnâ ta ǃgâiǃgâibasensa ūhâna,”
tib ge ǃKhūba ra mî.25-26 “Mû tsēdi ge ǃgoaxa ǁîdi ǃnâ ta Egipteb, Judab, Edommi, Amonni, Moab tsî ǃgaroǃhūb khoen, ǀûn âna ge ǂkhomna nî ǁkharade. Hoaragan ge a ǃgaosa xawen ge ǃgaeǀhaos ǁîs di ǁgauǁgau asa ǃkhōǀgaipe tama ge i. ǀGui-i xare-i ǁîn di-i tamas ka io Israelǁaes di-i ge ti ǃgaeǀhaosa ǁnâuǀnam tama ge i”
tib ge ǃKhūba ra mî.© Khoekhoegowab Elobmîs © Bible Society in Namibia, 2020.
