1 “ǁNā ǁaeb ain ge ǂkhōgu Judab gao-aogu digu, ǂkhōgu gaosagu digu, ǂkhōgu pristergu digu tsî ǂkhōgu kēbo-aogu digu tsî ǂkhōgu Jerusalems ǁanǂgāsaben digu tsîna ǀhobadi âna xu nî ūǂui”
tib ge ǃKhūba ra mî.2 “Tsîn ge ǁîga sores tsî ǁkhâb tsî hoaraga ǀhommi ǂnubis ǁîsan ge kaise ǀnam i tsî gere ǃoabas, ǁîsan gere saoǃgon, ǀape-ôa-ai tsî ǀgoreǀîs aiǃâ nî ǃāǁgui. ǁÎgu ge ǀhaoǀhaohe tamas ka io ǁkhōhe tide, xawe ǀarub hîa ra ǁgoemab khami nî ī. 3 Tsî ǁōb ge ûib ǃgâ-ai hoan xa nî ǁhûihe, nē ǂkhaba ǃhaosa xu ra ûiǃgaun xa, hoa ǃkhaidi ǁîdi ǃoa ta ǁîna nî doeǁgaǂuidi ǃnâ”
tib ge ǃKhūba ra mî.ǁOreb tsî ǁkharab
4 O du ge ǁîn ǃoa nî mî: “Nētib ge ǃKhūba ra mî: ‘Khoena kha ǁnā tsî ǁkhawa khâi tama hâ? Kān ka on ǁkhawa dabasen tama hâ?’ 5 O tare-i ǃaromas ǁnâi nē ǁaes Jerusalems disa hâhâ ra ǁnāǁgôadi ǁga ra ǁnāǁgôa? ǁÎn ge gāxaǃnâsiba ǃkhōǀgaipe tsî ǃhobasensa ra ǂkhā. 6 ǂŌrisase ǃgâ tsî ta ge ge ǁnâu amaban ǃhoa tama ǃkhaisa; ǀgui-i tsîn ge ǁoreb â-i ǂama ǃhausen tama hâ. ǀGui-i tsîn ge ‘Tare-e ta kha dī hâ?’ ti mî tama hâ. Mâ-i hoa-i ge ǂâis tsîna hî tamase, hā-i ǃkhams ǃnâ hâ-i khami ǃgarise tita xu ra ǃkhoebē. 7 Oefari ǀhommi ǃnâ hâb tsîn ge ǂnûibaheb hâ ǁaeba a ǂan, ǂnais, swabeli tsî ǃgoaxareb on ge hās di ǁaeba a ǂan, xawe ti ǁaes ge ǂhanub ǃKhūb diba a ǀū. 8 Mâti du ǁnâi ‘Sida ge a gā-ai, ǂhanub ǃKhūb diba da ūhâ amaga’ ti nî mî amabes ǃnâb ǂkhaba xoaǃammi xoaǂansegu diba ǁîsa ǂhumib ase ge dī hîa? 9 Gā-ain ge nî taotaohe, ǁîn ge ǃhuri hâ tsî ǃkhōsis ǃnâ ūhe hâ. Mû ǁîn ge ǃKhūb mîsa ge ǂhara; o mâ gā-aisi-e ǁîn ǃnâ hâ ǁkhā? 10 ǁNā-amaga ta ge ǁîgu tarade ǀnî aoga mā tsî ǁîgu ǃhūba ǀasa ǀhonkhoena nî mā, kain tsî ǂkharin hoan ge a xūǃgunuxa, kēbo-aoba xu pristeri kōsen ge a ǂhanuoǃnâ. 11 ǁÎn ge ti ǁaes di ôas ǀhapisa supuse ǂuruǂuru tsî ‘ǂKhîb, ǂkhîb’ ti ra mî, ǂkhî-i ǀkhai hîa. 12 Taon ra xare ǁgaiǁgaisa dīgu ân ǂama? Hî-î, ǁîn ge tao tama hâ; ǁîn ge tao-i xare-e a ǀū. ǁNā-amaga du ge naun ǀkha ge īs ǁkhās khami nî ǁnā; ǁîn ǁkharab di ǁaeb ain ge nî ǁnā,”
tib ge ǃKhūba ra mî.13 “Amase ta ga ti ǁaesa ǀhaoǀhao ǂgao, o draibe-i xare-e draibehais ai hâ i nî, tsî ǁkhāti ǀnomana ǀnomahais ai hân nî? Tita ge ǁîna mān hoan ge ǁîna xu nî ūbēhe”
tib ge ǃKhūba ra mî.14 “Tare-i ǃaroma da kha ǁūse ǂnôa? ǀHao, î da omǂnamisa ǃādi ǁga ǃhū, ǁnāpa nî sī ǁōse. ǃKhūb sida Elob kom ǁōb ǃoa ǀgoraǃgâ tsî ǃgāxa ǁgamma ge āsi dao, ǁîb ǃoagu da ge ǁore xui-ao. 15 Sida ge ǂkhîba ra ǃâubasen, xawe i ge ǃgâi-i xare-e hā tama hâ; ǂuruǂurus ǁaeba, xaweb ge ǃhurib ǀguiba hâ. 16 Hān âb di ǃkharub ge ǀnai Dansa xu ra ǁnâuhe; āb hāgu dib di ǀōb xab ge hoaraga ǃhūba ge ǂgubi. Khākhoeb ge hā tsî sada ǃhūb tsî ǁîb ǃnâ hân, ǃās tsî ǁîs ǃnâ ǁan hâna ra hapu.”
17 “Mû tita ge sadu ǁaegu ǀaona nî sî, ǁkhaehe ǁoana, tsîn ge ǁîna nî nâ du”
tib ge ǃKhūba ra mî.Jeremiab ge khoen âb ǂama ra ǃoa
18 Ti ǃoab ge a ǂuruǂuruhe ǁoa;
ǂgaob âtab ge ti ǃnâ ǂkhabu hâ.
19 ǁNâu, āb ti ǁaes diba ǃnū ǃhūba xu!
“ǃKhūba kha Sions ǃnâ a ǀkhai?
Sions gao-aoba ǃaruǀî nēpa a ǀkhai?”
“Tare-i ǃaroman ǁîna tita ǁaixa ta nîse ge ǁgoa,
ǃgaoǂuisa īga ǃoabas tsî ǁîn di ǃhao elon ǀkha?”
tib ge ǃKhūb, ǁîn gao-aoba ra dî.
20 “ǃGaos ǁaeb ge go ǃkharu, ǁkhunaǁaeb ge go ǀam,
xawe da ge ganupe orehe tama hâ.”
21 Ti ôas ǁaes di khôaǂkhūs ǂama ta ge tsû hâ;
ǃoab ǃnâ ta ge hâ;
ǃhurib ge ǃkhō te hâ.
22 Balsam-e kha Gilead ǃnâ hâ tama i hâ?
ǂGauǂgau-ao-e kha ǁnāpa a ǀkhai?
Tare-i ǃaromasa ǁnâi ti ôas di ǁaes ǂgau tamasa?
© Khoekhoegowab Elobmîs © Bible Society in Namibia, 2020.
