Jerusalems ge khākhoen xa hâǂnamihe hâ
1 ǃNorasasib ǃaroma ǃhū re, Benjaminni ôado! Jerusalemsa xu ǃhū re! Tekoas ǃnâ xâiǁnâsa xâi, î Bet-Hakerems tawa ǀaeǃkhau-e ǃkhā re. ǂKhôab ra ǀapasa xu hā tsîs hîkākās kai xuige. 2 Sions ge a îsa, xawes ge nî hîkākāhe. 3 ǃÛi-aogu tsî ǁîgu ǀgoan ge ǁîs ǃoa nî ǃgû; tentomdi âga ǁîs ǂnamipe ǂnaumâi tsî gu ge mâb hoaba ǁîb ǃkhais ai nî ǃû. 4 Tsî gu ge “Toroba ǂhomisenba re! Khâi î da tsēǃgâǁaeb ai ǁnāǂam! Tsūba da! Tsēs go toa tsî gu ǃuisomga ra gaxu xuige. 5 A da tsuxub ǃnâ khâimâ tsî omǂnamisa omga hîkākā.”
6 Nētib ge ǃKhūb Hoaǀgaixaba ra mî: Haide ǁhāǁnâ î Jerusalems ǃoagu ǁgâuǂnamiba dī re. ǁNā ǃās ge nî ǁkharahe; ǁîs ge ǁgâiǀāb xa ǀoa hâ. 7 Tsaus ra ǃgâi ǁgam-e ūǀkhī khamis ge ǁîsa ǂkhabasib âsa ra ūǀkhī. ǁGaris tsî hîkākās ge ǁîs ǃnâ ra ǁnâuhe; ǁîs ǀaeb tsî ǀhapidi ge hoaǁae ti aiǃâ hâ. 8 Jerusalemse nē ǃkhâikhomsa ū re, ǁnā tamas ka io ta ge sasa xu dabasen tsî ǃū-aisa, ǁanǃnâhe ǁoa ǃhūse nî dī si.
Mâǃoaxa Israelǁaes
9 Nētib ge ǃKhūb Hoaǀgaixaba ra mî: “ǁÎn ge ǂōrisase draibehais ǀkhas khami ǃgau kan Israeli dina nî ǃora. Hui ǁkhā du a khoe-i hoa-e ǁaeba du ūhâ hîa hui re.”
10 O ta ge “Tari-i ǀkha ta kha ǃhoa, tsî nî ǃkhâikhom, ǁnâuhe nîse? Mû! ǂGaes ân ge ǃgaohe hâ tsîn ge ǃgaoǃgâ ǁoa. Mû, mîs ǃKhūb dis ge ǁîna ǃharaxūxūse ība, tsîn ge ǁîs ǃnâ ǃgâiǃgâibasen-e ūhâ tama hâ. 11 ǁNā-amaga ta ge ǃKhūb di ǁaixasib xa ǀoa hâ tsî ta ge ǃaruǀî ǃkhō-aisen ǁoa.”
Ob ge ǃKhūba ge mî: “Ti ǁaixasiba ta ge daob ai hâ ǀgôaron ǂama ǃgangu ai nî ǁhōǂui. ǁNā-amaga ta ge ǃKhūb di ǁgôasib xa ǀoa hâ, tsî ta ge a ūdawasen ǁoa. O ta ge ǁîba nî ǁhōǂui daob ai hâ ǀgôaron ǂama, tsî ǀhû hâ ǂkhamkhoegu tsîn ǂama; aob tsî taras on ge ǁkhāti nîra ǃkhōhe, kairab, ǁnāb tsēdi xa dāhe hâb tsîn ǀkha. 12 Tsî ǁîn omdi ge nîra ǀkhara khoen di kai, ǃhanagu tsî taradi tsîn ǀkha, tita ge ǃommi âtaba nî ǀhōǂui xui-ao, nē ǃhūb di ǁansabenǀî,”
tib ge ǃKhūba ra mî.13 “ǂKhamna xu kain kōsen ra mâ-i hoa-e xūǃgunuxasiba sîsenū; tsî kēbo-aoba xu pristeri kōsen ra mâ-i hoa-e ǂkhabasiba dī xui-ao. 14 Tsîn ra ǂkhôas ti ǁaes ôas disa supuǂâixase ǂuruǂuru: ǂKhîb, ǂkhîb ti ra mîǃâ, ǂkhî-i xare-i a ǀkhai hîa. 15 Xare taon ra, ǁgaiǁgaisanan ra dī amaga? Hî-î hoaragasen ge tao tama hâ, tsîn ge ǁkhāti taob xa dākaisensa a ǀū. ǁNā-amagan ge ǁnā ran ǃnâ nî ǁnā. Tita ga ǁîna ôaǃnâ ǁaeb ain ge nî ǃnôa,”
tib ge ǃKhūba ra mî.Israeli ge Elob daoba ra ǂhara
16 Nētib ra ǃKhūba mî: “Mâ daogu ai, î du kōǂnamipe; î du ǀoro daoga dîǃgâ, mâb a ǃgâi dao ǃkhaisa, î du ǁîb ǃnâ ǃgû, o du ge sadu ǀomsa sâba nîra hōba.” Xawen ra mî: “Sida ge ǁîb ai ǃgû tide,” ti. 17 Tita ge ǁkhāti ǃûi-aoga ge mâiba du, î du xâiǁnâs ǀōb ai ǃgaoǃgâ, ti ra mîse, xawen ge “Sida ge ǃgaoǃgâ tide” ti ra mî.
18 ǁNā-amaga ǁnâu du re, sadu ǁaedo; î du ǁnâuǃā, sadu ǀhû hâdo, ǁîn ǃnâ i tare-e hâ ǃkhaisa. 19 ǁNâu sats ǃhūbaitse: Mû, tita ge ǂkhaba-e nē ǁaes ǂama nîra hā kai, ǁîn di ǂâidi di ǂûtani-e: ǁÎn ti mîdi ai ǃgaoǃgâ tama i, tsî ti ǂhanuba ra aoxū xui-ao. 20 Mâ xū-i ǂamab kha ǃgâihamxūba tita nî hāba Skebasa xu, tsî hoan xa ǃgâi kalmusa ǃnū ǃhūba xu! Sadu khauǁguibadi ge ǃgâiba te tama hâ; tsî sadu ǂāǁguibadi ge tita ǂkhonba tama hâ. 21 ǁNā-amagab ra ǃKhūba nēti mî: “Mû, tita ge nē ǁaesa ǁgonǁgonǂgaodi hoade ra ǂnûiba, on ge ǁîdi xa nî ǃnôa, ǁgûgu tsî ǀgôan tsîn, ǀgūkhoeb tsî ǁîb horesab tsîn hoan ge nî kā.”
ǀApasǀkhāba xu hâ ǁnāǂgâs
22 Nētib ra ǃKhūba mî: “Mû, ǁae-i ge ǃhūb ǀapas diba xu ra ǀkhī; tsî kai ǃhao-i ge ǃhūbaib ǀkhâuǀamde xu nîra ǂkhaiǂkhaihe. 23 Khās tsî ǁhâigôab tsîran ra sîsenū; ǁîn ge a oraǂgaoxa, tsîn ge ǀkhomxaǂgaosi-e dī tide. ǁÎn dommi ge hurib khami nî ǀō, tsîn ge hān ai nî ǃgapi; ǁîn ge torodīsa ǁāǁābahe hâ aob khami ī, sas, Sionni ǀgôas ǃoagu.
24 “Sida ge gommi âba ǁnâuo, o gu ge sida ǃomga ge ǃopo. O da ge ǂōǂōsib xa ge ǃkhōhe, ǁora ra tara-i axase. 25 Tā ǃaub ǃoa ǃgûǂoa, î du tā daob ai ǃgû, khākhoeb di gôab hâ xuige, ǃhurib ge sa ǂnamipe hâ xuige.
26 “Ti ǁaes di ôase, ǀhaosara-e ana îs tsaob ǃnâ ǃhoposen; ǃoa ra ǀguise ǃnae hâb ǃaromas axase, tsûtsûsase ǃgae, ǃhaese da nî hîǀhuru-aob xa hāǂamhe xuige. 27 Tita ge satsa ti ǁaes ǃnâ ǃûiǂgō-omse ge mâi, ǁaposa ǃkhaise, ǁîn daobats nî ǂan tsî ǃâitsâga. 28 Hoan xa ǁnāǁgôaxan di ǁnāǁgôaxan ge a ǁî, ǀhoe-aose ra tanisenǃâ. ǁÎn ge brons tsî a ǂnūǀuri, hoatsaman ge a hîkākā-ao. 29 Soasoab ge khauǃkhū hâ, ǂgoaǀurib ge ǀaes xa hapuhe hâ, ǁauseb ge tsunitsuni-aoba nētikō ǂōrisase ge tsunitsuni, ǂkhaban ūǁnâhe tama hâ xui-ao. 30 Aoxūhe hâ ǀhaiǀuri-i tin ge ra ǂgaihe, ǃKhūb ge ǁîna aoxū xui-ao.”
© Khoekhoegowab Elobmîs © Bible Society in Namibia, 2020.
