Babilons di ǃkhōhes
1 Nēs ge ǁnā mîs ǃKhūb ge Babilons ǃoagu tsî Xaldeaǁîn ǃhūb ǃoagu kēbo-aob Jeremiab ǃnâ-u ǃhoasa:
2 “ǁAedi ǃnâ ǂhôa, î ǂanǂan re,
ǃkhauba ǃkhā, î ǂanǂan re,
tā sâu, î mî re:
Babilons ge go ǁnā,
Beli ge go taotaohe,
Merodaxi ge burugâ hâ.
ǁÎs īgu ge taotaohe hâ,
ui-uisa ǁgôa-elogu âs ge burugâ hâ.
3 “ǀApasa xus ǁaesa ǁîs ǃoagu ra hā tsî ǃhūb âsa ra hîkākā amaga. Khoe-i xare-i ge ǁnāpa ǁan tide, khoen tsî ǀgurun tsî xamarin tsîn hoan ge ǁîsa xu nî ǁhâbē.”
Israelǁîn ge ǁkhawa nî oahā
4 “ǁNā tsēdi ǃnâ tsî ǁnā ǁaeb ǃnân ge Israeli khoen tsî Judab khoen tsîna ǀhûpe nî hā, tib ge ǃKhūba ra mî. ǁÎn ge ā ra garu ǃKhūb ǁîn di Eloba nî ôa. 5 ǁÎn ge Sions ǃoa garu daoba nî dî tsî ais âna ǁnāǀî nî unu mîraǃâ: ‘Hā, î da ǃKhūb ǀkha ǀhaoǀhaosen, hâhâ ra ǃgaeǀhao-i, tātsē ǀuruhe tide-i ǀkha.’
6 “Ti ǁaes ge kā hâ gū ge isa; ǃûi-aogu ge ǁîna ge kāǁhapu kai tsî ǁîna ǃhomgu ǃnâ ge kāma kai. ǁÎn ge ǃhomma xu ǃnâub ǃoa gere ǁhapuma tsî ǁîn di ǂhunuma hâǃkhaisa ge ǀuru. 7 ǁÎna ge ǀhao-ūn hoan ge ǁîna ge hapu tsîn ge ǁîn di khākhoena ge mî: ‘Sida ge ǀhapixa tama hâ, ǁîn ge ǁîn di ǃKhūb ǃoagu ge ǁore, ǁîn di ama hâǃkhaib, ǃKhūb, ǁîn aboxagu ge ǂgomǃgâ hâ ib ǃoagu.’
8 “Babilonsa xu ǁhâǂoa, î Xaldeaǁîn di ǃhūba xu ǃkhoeni; ǀgoana ra aimâba pirigu khami du ī re. 9 Tita ge ǂgui ǁaedi di ǂnubisa ǀapasǀkhāb di ǃhūba xu Babilons ǃoagu nî khâikhâiǃnâ. ǁÎdi ge ǁîs ǃoagu ǂhomisen tsî ǁîsa nî ǁnāǂam. ǁÎdi ǂāgu ge ǁkhāǁkhāǂuisa toroǃkhamaob, ǀkhaiǃomse oaǀkhī tamab khami ī. 10 Xaldeab ge nî ǁgūǀhanahe; ǁîba ra ǁgūǀhanan hoan ge ǂâu hâ kōse nî hō,”
tib ge ǃKhūba ra mî.Babilons di ǁnās
11 “Sadu ge ge ǃgâiaǂgao, sadu ge ge dâ, ti ǂhunuma ǁaesa du ge ge ǃnariǀhana. Sadu ge ǃhoroba ra dāǃnâ tsâus khami ge dâ tsî hāgu khami ge ā, 12 xawes ge sadu îsa kaise ge taotaohe. ǁÎs sado ge ǁoras ge taob xa ge hāǂamhe. ǁÎs ge ǃhaodi hoadi ǃnâ nî ǂkhariǃgôahe, ǃū-aisa tsî ǂnâsa ǃgaroǃhūse. 13 ǃKhūb di ǁaib ǃaromas ge ǁîs khoe-i xare-i xa ǁanǃnâhe tide tsî hoaragase nî ǀkhaiǃnâsa. Babilonsa-u ga ǃkharu khoe-i hoa-i ge burugâ tsî nî ǃnabindana ǁîs ǀkha ge ī xūn ǂama.
14 “Babilons ǃoagu ǂhomisen, î ǁîsa hoaǀkhāga xu ǃnamiǂgā, sago khādi ǀkha ra ǁkhâugo. ǁÎsa ǁkhâu, tā ǂāga ǀkhomsen, ǁîs ge ǃKhūb ǃoagu ǁore xuige. 15 Ab torob ǃauba ǁîs ǂnamipe ǁnâuhe. ǁÎs ge go māǁnâsen, ǂgō-omgu âs ge go ǁnā, ǂnubiǂgoagu âs ge khôaǁnâhe hâ. Nēb ge ǃKhūb di ǀkhaoba. ǁÎsa ǀkhao, ǁîsa naun ǀkhas ge dīs ǁkhās khami dī-ū. 16 A kha Babilonsa xu ūbēhe, ǁnāb tsoro rab tsî ǁnāb ǃgaoǁaeb ai ra ǃgaob tsîkha hoakha. ǁGâiǀā-aob di gôab ǃaroma i ge mâ-i hoa-e ǁî-i ǁaesa ǃoa nî oa, mâ khoe-i hoa-i ge ǁî-i ǃhūb ǃoa nî ǁhâ.”
Israelǁîn di oahās
17 “Israelǁîn ge xamgu xa sauruǀgaruǀgaruhe hâ gūna. ǂGurose ge ǁîna hapub ge Asiriab gao-aoba tsî ǀunis aib ge Babilons gao-aob Nebukadnesara ǁîn ǂkhōga ge xâu. 18 ǁNā-amagab ge ǃKhūb Hoaǀgaixab, Israeli Eloba ra mî: Tita ge Babilons gao-aob tsî ǁîb ǃhūba nî ǁkhara, Asiriab gao-aoba ta ge ǁkhara khami. 19 Xawe Israelsa ta ge ǁîs di ǃû-ais ǃoa nî oaǀkhī-ū tsîs ge Karmelǃhommi ai tsî Basanni ǃnâ nî ǃû. On ge Efraimǃhomgu ai tsî Gileadi ǃnâ ǂâu hâ kōse nî ǁâ. 20 ǁNā tsēdi ǃnâ tsî ǁnā ǁaeb ǃnâ, tib ge ǃKhūba ra mî, ta ge Israels ǃûǂamsa nî ôaǃnâ, xawe i ge xū-i xare-e hâ tide tsî Judab di ǁoreba, xawe i ge xū-i xare-e hōhe tide, tita ge ǁnān hîa ta ge ǃgauna ǀûba xui-ao.
Elob ge Babilonsa nî ǀgoraǃgâ
21 “Merataimmi ǃoagu ǃgûǂoa tsî Pekodi ǁanǂgāsaben ǃoagu. ǁÎna ǃgam, î hoaragase hîkākā, tib ge ǃKhūba ra mî. Tita go mîmā tsin hoana dī. 22 Torob di ǂkhubib ge ǃhūb ǃnâ hâ, kai ǂkhôab ge hâ. 23 Hoaraga ǃhūbaiba gere ǂnauǂkhū hamers ge khôaǃā hâse ǁgoe. Mâtis kha Babilonsa ui-uisa xū kai hâ ǁaedi ǃnâ? 24 Tita ge sasa ǁnoa-e ge ǁguiba tsîs ge ge ǃkhōhe, Babilonse tsîs ge ǂan tama hâ. Sas ge hōhe tsî ge ǃkhōhe, ǃKhūb ǃoagus ge ǃkham amaga. 25 ǃKhūb ge ǁâtanin sâu-ommi âba ǁkhowa-am tsî ǁîb ǀkhaob di ǁâtanina ge ūǂui, ǃKhūb Elob Hoaǀgaixab dīb nî sîsenna Xaldeaǃhūb ǃnâ ūhâ xui-ao. 26 ǁÎb ǃoagu hoa ǀkhāga xu hā, ǃhorob sâuǃnâ-omgu âba khôaǁkhowa-am. ǃHoroǃgaeǀkhādi khami ǁîb dina ǀgabo-aigu, î ǁîba hoaragase hîkākā, tā i xū-i xare-e ǁîba ǃgauba. 27 ǁÎb di ǁgōgu hoaga ǃgam, a gu ǂāhe. Tsūba gu, ǁîgu di tsēs go hā xui-ao, ǁîgu ǁkharab di ǁaeba.”
28 ǃGâ re, mâtin ǃhūsaben, Babilonsa xu ge ûiǂoana Sions ǃnâ hā ra ǂhôasa ǃKhūb sada Elob di ǀkhaob xa, ǁîb di Tempeli ǃaroma.
29 Khāǁkhâu-aoga Babilons ǃoagu ǀhaoǀhao re, ǁnāgu khāsa ǂgaeǃnâ ǁkhāga. ǃĀsa ǃnamiǂgā, tā i khoe-i xare-e ûiǂoa. ǁÎsa dīgu âs ǃoa dīdawa-am; ǁîsa ǁîs ge dī khami dī-ū, ǃKhūb, Israeli di ǃAnub ǃoagus ge ǀgapiǀgapisen xuige. 30 ǁNā-amaga gu ge ǁîs di ǂkham khoega ǃgangu âs ai nî ǁō. ǁÎs di toroǃkhamaogu hoagu ge ǁnātsē nî ǃgamhe, tib ge ǃKhūba ra mî. 31 Mû, tita ge nî mâǃoa si, sa ǀgapiǂâixasa, tib ge ǃKhūb Elob Hoaǀgaixaba ra mî. Sa tsēs ge go hâ, ǁnā ǁaeb ǁîb ai ta nî ǁkhara siba. 32 ǁNās ǀgapiǂâixas ge ǃnôa tsî nî ǁnā tsî khoe-i xare-i ge ǁîsa ūkhâi tide. Tita ge ǀaesa ǁîb ǃādi ǃnâ nî khau tsîs ge ǁnā ǀaesa ǁîs ǂnamipe hân hoana nî ǂhubiǂui.
33 Nētib ge ǃKhūb Hoaǀgaixaba ra mî: “Israelǁaes ge ǁgâiǀāhe hâ tsî Judab khoen tsîn ge ǁgâiǀāb ǃnâ hâ. ǁÎna ge ǃkhōsis ǃnâ ūn hoan ge ǁîna ǃkhōsabese ūǀgara hâ tsî ǁîna ǁnāxū ǂgao tama hâ. 34 Xawe ǁîn di Ore-aob ge a ǀgaisa; ǃKhūb Hoaǀgaixab tib ge ǁîba ǀon hâ. ǁÎb ge ǁîna nî ǂnoaguba tsî ǂkhîba ǃhūb ǃnâ nî hā-ū, xawe sâoǃnâsiba Babilons ǁanǂgāsaben ǃnâ.”
35 Nētib ra ǃKhūb Hoaǀgaixaba mî:
Gôaba Xaldeaǁîn ǃoagu
tsî Babilons ǁanǂgāsaben ǃoagu
tsî ǁîn ǂamkhoegu tsî gā-aigu ǃoagu.
36 Gôaba ǁîn di ǂhumi kēbo-aogu ǃoagu,
î gu gâre.
Gôaba ǁîn di toroǃkham-aogu ǃoagu,
î gu hîkākāhe.
37 Gôaba ǁîn hān tsî torokunidi ǃoagu
tsî ǁîn di ǃhao toroǃkhamaogu ǃoagu,
î gu tarekhoedi khami ī.
Gôaba ǁîn di ǁuigu ǃaogu,
î gu ǃnariǂuihe.
38 ǀKhuruba ǁîn ǁgamgu ǂama,
î gu ǂnâ.
ǁÎb a ǃgaohesa īgu di ǃhū,
tsîn ǁîna ǁîgu ǂama ǃkhausa xuige.
39 “ǁNā-amagan ge ǂhiran tsî ǀgirin tsîna Babilons ǃnâ nî ǁan tsî ǀamin ge ǁîs ǃnâ nî hâ. ǁÎs ge ǁkhawa khoe-i xare-i xa ǁanǃnâhe tide, khoe-i xare-i ge tātsē ǃgoaxaǁaeb ǃnâs tsîna ǁîs ǃnâ ǁan tide. 40 Elob ge Sodoms tsî Gomoras tsî ǁîra ǀgūse ǂnôa ǃāde hîkākā khami, tib ge ǃKhūba ra mî, ǁnāti i ge khoe-i xare-e Babilons ǃnâ ǁan tide, khoe-i xare-i ge ǁnāpa hâ tide.
41 “ǁAes ge ǀapasǀkhāba xu nî hā,
kai ǁaes tsî ǂgui gao-aogu
tsîn ge ǃhūbaib ǀkhâuǀamde xu ra hā.
42 ǁÎn ge khās tsî ǁhâigôab tsîna ūhâ,
ǁîn ge ǁkhō tsî ǀkhomoǃnâ.
ǁÎn ge ǁaixa hurib khami ra ǀō,
hāgu ain ra ǃgapio.
ǁÎn ge toroǃkhamaob khami ǂhomisen hâ,
sas ǃoagu Babilonse.
43 Babilons gao-aob ge gommi âna ǁnâu,
o kha ge ǃomkha âba ge ǂkhabu.
ǂŌǂōsib xab ge ge ǃnamiǂgāhe,
ǁoratsûb ǃnâ hâ taras di tsûb khami.
44 “Jordanni haiǀgomsa xu ǃam ǃû-ais ǃoa ra ǂoaxa xammi khami ta ge tita ǁîna ǃnapetamase Babilonsa xu nî ǃkhoeni kai. Tsî ta ge ǁhûiǂui ta ga khoe-e ǁîb ǂama nî mâi. Tari-e tita khami ī? Tari-e tita nî ǂgaoǀkhā? Mâ ǃûi-aoba tita nî mâǃoa ǁkhā? 45 ǁNā-amaga ǁnâu ǃKhūb di ǀapes Babilons ǂamab ūhâsa tsî tare-eb Xaldeaǁîn di ǃhūb ǃoagu ǂâibasen hâsa: ǁÎn di ǂkhamron tsîn ge nî ǃkharabēhe, ǁîn di hâǃkhais tsîn ge ǁîn di ǂhunuma dīgu ǃaroma nî hîkākāhe. 46 ǃHūbaib ge Babilons ǁnās di ǀōb xa nî ǂgubi tsî ǁîn huiǂgais ge ǁaedi ǃnâ nî ǁnâusen.”
© Khoekhoegowab Elobmîs © Bible Society in Namibia, 2020.
