Moab di hîkākāhes
1 Nētib ge ǃKhūb Hoaǀgaixab Israeli di Eloba Moab xa ra mî:
“Tsūba Nebosa, ǁîs hîkākāhe hâ amaga.
Kirjataims ge taotaohe hâ, ǁîs ge ūhe hâ.
Omǂnamisa ǃādi ge khôaǁnâhe hâ,
ǁîgu ge a khôaǂkhūsa.
2 Moab di ǂkhaisib ge toa hâ.
Hesbons ǃnân ge ǁîb ǃoagu ra ǀapeǀhao:
A da nē ǁaesa ǀamǀam.
Sas Madmens tsîn ge nî hîkākāhe,
gôab ge sasa nî ǃgôaǃgon.
3 Horonaimsa xub ge āba ra ǁnâuhe.
‘Hîkākās tsî kai khôaǂkhūs.’
4 “Moab ge hîkākāhe hâ,
ǀgôan âb di āb ge ra ǁnâuhe.
5 ǁÎn ge ā garu rase
Luhits ǃnâuba-u ra ǂoa.
Horonaims ǁnōba-un ra ǁgôaseb
ge hîkākās ǂama hâ āba ra ǁnâusen.
6 ǃHū, î sadu ûiba sâu,
ǃgaroǃhūb di hairo-i khami ī.
7 “Sa ǀgaib tsî sa ǃkhūsib aits ge ǂgomaiǂnûi,
amagats ge sats tsîna nî ūǃgûhe.
Kemosi tsîn ge ǃkhōsabese nî ūǃgûhe,
ǁîb di pristergu tsî ǂamkhoegu ǀkha.
8 Hîkākā-aob ge mâ ǃās hoasa nî hāǂam,
ǀguis tsîn ge ûiǂoa tide;
ǃGoaǃnāb tsî ǂgāb tsîkha ge nî hîkākāhe,
ǃKhūb ge mî khami.
9 Moaba ǁgabokha mā re,
ǁkhanaǂoab nîse i xuige.
ǁÎb di ǃādi ge nî ǀkhaiǃnâ,
khoe-i xare-i ge ǁîde ǁanǃnâ tide.”
10 ǀÂxarexūsab ge ǁnā khoeb, ǃKhūb di sîsenna ǀoasa ǂâisa ǂnûi-ai tamase ra dība. ǀÂxarexūsab ge ǁkhāti ǁnāb, gôab âba ǀaoǂnâxūsa xu ra ūdawaba.
Moab ǃādi ge ra hîkākāhe
11 Moab ge ǂkhamsis âba xu sâsase ge hâ i, ǁūse hâ ǂauxûib nē xapaba xu nau ǃnâ ǁhōhe tamab ǁkhāb khami. ǁÎb ge tātse ǃkhōsabese ge doeǁgabēhe tama hâ i; ǁkhoab âb ge ǁîb ǃnâ ge hâhâ tsî ǁamab âb ge ǀkhara tama ge i.
12 Xawe tsēdi ge nî hā, tib ge ǃKhūba ra mî, o ta ge tita ǁîba ǁhōǂui-aoga nî sîba, ǁîba ǁhōǂuiǃnâ, ǁîb xapaga ǀkhaiǀkhaiǃnâ tsî xapagu âba nî khôaǂkhūga. 13 Moab ge Kemosi xa taob ǃnâ nî mâihe, Israelǁîn ge Beteli, ǁîb ain ge ǂgomaiǂnûi hâ ib xa taob ǃnâ mâihes ǁkhās khami.
14 “Mâti go sago ‘Sige ge ǁē-aoge
tsî ǀgaisa toroǃkhamaoge,’ ti mî ǁkhā?
15 Hîkākā-aob Moab tsî ǁîb ǃādi dib ge go hā.
Ama-ai ǂkham khoegu âb ge
ǃgamhe nîse ǁgôagaru,”
tib ge Gao-aob,
ǃKhū Hoaǀgaixa
ti ǀon hâba ra mî.
16 “Moab di tsūǀkhāb ge go ǀgū,
ǂōǂōsib âb ge ǃhaese ra hā.
17 “ǃGaeǂam bi, sadu ǁîb ǂnamipe hâdu hoado,
ǁîba ǀons âb ai a ǂandu hoado,
mî: ‘Mâtib khôa hâ ǁnā ǀgaisa ǀkharub,
ǁnā ǂkhaisa gaohaiba.’
18 Sa ǂkhaisa ǃkhaisa xu ǁgôaxa,
î ǃhūb ai tsarab ǃnâ ǂnû,
sas Dibons ǁanǂgāsabese.
Hîkākā-aob Moab dib ge sas ǃoagu go hā,
ǁîb ge sa ǁkhuiga go hîkākā.
19 Daob amǃgâ mâ, î kō,
sas Aroers ǁanǂgāsabese.
ǁHâgaru aob kas, taras kas hoasa dî:
Tare-e go ī?
20 Moab ge taotaohe hâ, ǁîb ge ǃao hâ,
Ā, î ǃau î Arnonni tawa sī ǂhôa,
Moab hîkākāhe hâ ǃkhaisa.
21 “ǀGoraǃgâs ge ǀgapi ǂgāǃhūb ai go hā, Holons, Jahas, Mefats, 22 Dibons, Nebos, Bet-Diblataims, 23 Kirjataims, Bet-Gamuls, Bet-Meons, 24 Keriots, Bosras tsî Moab di ǃādi, ǀgūse tsî ǃnūse ǁgoedi hoadi ai. 25 Moab di ǁnâb ge ǁhāǁnâhe hâ, tsî ǁîb ǁôab ge khôahe hâ,”
tib ge ǃKhūba ra mî.Moab ge nî ǃgamǃgamhe
26 Moaba ǀhoro kai, ǁîb ge ǃKhūb ǃoagu ǀgapiǀgapisen xuige. Ab ǁîb di ǀkhûib ǃnâ ǃhobosen, îb ǁkhāti âiǂuihe nî xūse ī. 27 Israela kha satsab âiǂuixūse ge ība tama hâ i? ǁÎba ǃnari-aon ǁaegu hōheb ge, ots ǁîb xats ga ǃhoa ǁaeb hoaba gere ǃnabindana?
28 “ǃĀde xu ǂoa, î ǁhoagu ǃnâ ǁan sadu Moab ǁanǂgāsabedo. ǂNabus hîa ǁhoab dao-ams tawa ra omdīs khami du ī re. 29 Moab di ǀgapiǂâixasib xa da ge ge ǁnâu; ǁîb di ǀgapiǀgapisenni, ǁēsib tsî ǂnīǂnīsenni tsî ǁîǃgôasens âb tsîn xa. 30 Tita ge ǁîb di ǁēsiba a ǂan tib ge ǃKhūba ra mî. ǁÎb koasens ge a ǁau, ǁîb dīgu ge a harebeoǃnâ. 31 ǁNā-amaga ta ge Moaba nî āba, hoaraga Moab ǂama ta ge nî ā. Kir-Heres khoen ǃaroma ta ge nî ǃoa. 32 Jasers ǃgâ-ai ta ge sasa nî āba Sibmas di draibehaise. Sa ǂgonagu ge hurib kōse ra sī, ǁîgu ge Jasers kōse ra sī. Hîǀhuru-aob ge sa ǁkhunaǂûn tsî sa draibena ge hāǂam. 33 ǃGâiaǂgaob tsî dâb tsîkha ge ǂûtanixa ǃhūb Moab diba xu ūbēhe hâ. Tita ge ǂauxûiba ǀāǃnâǃkhaide xu ge kā kai. Khoe-i xare-i ge draibena dâb ǀkha dāǃnâ tama hâ. ǃAub ge hâ, xaweb ge dâb di ǃau tama hâ.
34 “Hesbons tsî Eleales tsîra ge ra ā, tsîb ge ǁîra āba Jahas kōse ra ǁnâusen. ǁÎb ge Soarsa xu Horonaims tsî Eglat-Selisias kōse ra ǁnâuhe. Nimrims di ǁgamgu tsîn ge ǂnâ hâ. 35 Tita ge ǁnān Moab ǃnâ ǀgapigu ai ǁguiba tsî ǁîn eloga ra ǀanǀanbana nî ǀû kai,”
tib ge ǃKhūba ra mî.36 “ǁNā-amagab ge ti ǂgaoba Moab ǂama ǂnunib khami ra ā, ǁkhātib ge ti ǂgaoba Kir-Heres khoen ǂama ǂnunib khami ra ā. ǁÎn ge ǀhaoǀhao hâ i ǃkhūsib hoab ge ge bē. 37 Mâ danas hoas ge ǃgorase ǂkhomsa tsî mâ ǀhō-ammi hoab ge a ǂkhomǁnâsa. ǃOmgu hoagu ge a ǃgaosa tsî mâ-i hoa-i ge ǃoab sarana ana hâ. 38 Moab di omǂamǃnâgu hoagu tsî ǁîb ǃās di ǂgādi ais ge ǃgaes ǀguisa hâ, tita ge Moaba khoe-i xare-i ǂgao tama xapa-i khami khôaǂkhū xui-ao,”
tib ge ǃKhūba ra mî.39 “Mâtib kha khôaǂkhūhe hâ? Mâtin kha ra ā? Mâtib Moaba taob xa ra ǃkhomǃnoro? Moab ge ǁîb ǂnamipe hân hoana âiǂuixūse tsî ǃhuriǃhurixūse ība.”
Moab ge ûiǂoa tide
40 Nētib ge ǃKhūba ra mî: Khākhoeb ge ǃariǃkhās khami ǃhaese Moab ai nî ǁkhanaǁgôaxa tsî ǁîb di ǁgapokha Moab ǂama nî khoraǂui. 41 ǃĀdi tsî ǁkhui-omgu tsîn ge nî ūhe. ǁNātsē gu ge Moab di toroǃkhamaoga, ǁoratsûb ǃnâ hâ taras khami ǃaob xa nî ǃkhōhe. 42 Moab ge nî hîkākāhe tsî ǃaruǀî ǁaese ī tide ǃKhūb ǃoagub ge ǀgapiǀgapisen amaga. 43 ǃAorosasib tsî ǃgam āb tsî ǁnoab tsîgu ge sado ǃâu hâ, sadu Moab ǁanǂgāsabedo,
tib ge ǃKhūba ra mî.44 ǃAorosasiba xu ga ǁhâ-i ge ǃgam āb ǃnâ nî ǁnā, tsî āba xu ga ǃapaǂoa-i ge ǁnoab ǃnâ nî ǃkhōhe, tita nē xūna Moab ǂama, ǁî ǁkharab di kurib ǃnâ nî hā kai xui-ao,
tib ge ǃKhūba ra mî.45 Hesbons di sommi ǃnân ge ǃhūsabena ǀgai-ose ra mâ, ǀae-i Hesbonsa xu ge ǂoaxa tsî ǀaeǁhabu-e Sihonsa xu tsî Moab di ǃūs tsî koasenaogu di danade ge hîkākā. 46 Tsūba tsi Moatse! Kemosi di ǁaes ge hîkākāhe hâ. Sa ôagu ge ǃkhōsabese ūǃgûhe hâ tsî sa ôadi ge ǃkhōsis ǃnâ hâ.
47 Xawe ǃgoaxa tsēdi ǃnâ ta ge tita Moab di mâsiba nî dī-unu,
tib ge ǃKhūba ra mî.Nēpas ge Moab ǀgoraǃgâsa ra ǀuni.
© Khoekhoegowab Elobmîs © Bible Society in Namibia, 2020.
