ǃKhūb di mîs Filisteǁîn ǃoagu
1 ǃKhūb di mîs kēbo-aob Jeremiab ǃoa ge hās, Filisteǁîn ǂama hâs, Faraob Gasasa nî ǁnāǂams aiǃâ. 2 Nētib ge ǃKhūba ra mî:
“ǁGamgu ge ǀapasa xu ra khâi,
tsî gu ge nî dâuǂam ra ǃā kai.
ǁÎgu ge ǃhūb tsî ǁîb ǃnâ hân hoana nî dâuǂam,
ǃādi tsî ǁîdi ǁanǂgāsaben tsîna.
Khoen ge nî ǃauǂgai,
ǃhūb di ǁanǂgāsaben hoan ge nî ā.
3 Hāgu ǁkhoradi ǀōban ga ǁnâuo,
torokunidi ǂkhupiba,
ǀnūdi di ǀōba.
ǁGûgu ge ǀgôan âgu ǃoa ǂnan tide,
ǃomgu âgu di ǂkhabusasib xa.
4 Tsēs ge go hā Filisteǁîn nî hîkākāhesa,
Tirus tsî Sidons tsîra ǃgauba hâ hui-ao-i
hoa-i nî ūbēhesa.
ǃKhūb ge Filisteǁîna nî hîkākā,
Kretaǃnāǃnuis di ǃgau hân hoana.
5 Gasas ge nî ǃgoradana,
Askelons ge ge hîkākāhe.
Sadu hîa ǂgāb ai ge ǃgau do,
mâtikōse du nî ǃgaosen?
6 Ae ǃKhūb di gôatse,
mâ ǁaeb kōsets kha sâ tide?
ǁHōb âts ǃnâ ǂgâ re,
sâ, î ǃnō re.
7 Mâtib kha ǁnâi nî sâ ǁkhā,
ǃKhūb ga mîmā bio?
Askelons ǃoagu tsî huri-ammi ǃoagub
ge ǁîba ge mîmā.”
© Khoekhoegowab Elobmîs © Bible Society in Namibia, 2020.
