Egipteb danhes Karkemis tawa
1 ǃKhūb di mîs kēbo-aob Jeremiaba ge hābas, ǁaedi ǂama. 2 Egipteb xasa, ǁnā toroǂnubis Egipteb gao-aob, Faraob Nekob dis, Eufratǃāb amǃgâ Karkemis tawa hâs, Babilons gao-aob Nebukadnesari xa ge hakaǁî kurib Josiab ôab Judab gao-aob Jojakimmi ǂgaeǂguis dib xa danhes:
3 “ǁKhaukhōdi âgo ǂhomi
kaidi tsî ǂkharidi hoade,
î go ǃkhammi ǃoa ǃgû.
4 Hāga ǃgaeǃgâ, î ǁîga ǃgapi.
ǂHomisen, î toroǀgapadi âgo ǀgapa.
ǁHâigôagu âgo ǂkhaiǂkhai!
ǁKhaiǁâsaraba ǂgaeǂgā!
5 “Tare-e ta ra mû?
ǁÎgu ge ǃao tsî ra ǁnā-oa.
ǁÎn toroǃkhamaogu ge danhe
tsî kōnǃgâs tsîna hî tamase ra ǁhâ.
ǁÎgu ge ǃhurib xa ǃnamiǂgāhe hâ,
tib ge ǃKhūba ra mî.6 Kaise ǃhaegu tsîn ge ǁhâxū ǁoa,
ǀgaisagu tsîn ge ûiǂoa ǁoa.
ǀApasǀkhāb ai, Eufratǃāb amǃgâ
gu ge ǃnôa tsî ge ǁnā.
7 Tariba ǁnāb Nyli khami ra khâiba,
dâu ra ǃāb di ǁgamgu khami?
8 Egipteb ge Nyli khami ra khâi
ǁgamgu âb ge ǃāb khami ra dâuǂam
tsîb ra mî: ‘Tita ge khâi tsî ǃhūbaiba nî ǃgū-ai.
Tita ge ǃādi tsî ǁîdi ǁanǂgāsabena nî hîkākā.’
9 ǃKhoe re sago hāgo,
ǃnari re saso torokuniso.
A gu toroǃkhamaoga ǃgûǂoa,
Etiopiaǁîgu tsî Libiaǁîgu, ǁkhaukhōde ūhâgu
tsî Ludǁî khāǁkhâu-aogu tsîga.”
10 Nē ge a ǃKhūb Elob Hoaǀgaixab di tsē.
Nēs ge a ǀkhaob di tsē,
khākhoen âbab nî ǀkhaosa.
ǁÎb di gôab ge nî ō, ǁâb nîs kōse
tsî ǀaob ân xa nî āǂâu.
ǃKhūb Elob Hoaǀgaixab ge ǁguiba-e nî dī,
ǀapasǀkhāb ǃhūb ǃnâ, Eufratǃāb amǃgâ.
11 Gileadi ǃoa ǃgû, î balsam-e hā-ū,
sas ǂkhamkhoes Egipteb ôase.
ǁAuses ge ǂgui soǀôana ge sîsenū,
ǂgauǂgau-es ge hō tide.
12 ǃHaodi ge taob âs xa ge ǁnâu,
ǃhūbaib ge sa ǃaub xa ǀoa hâ.
Toroǃkhamaogu ge ra ǂgâugu
tsî hoatsama ra ǁnā.
Nebukadnesari ge Egipteba ra ǁnāǂam
13 Nēs ge mîs ǃKhūb dis kēbo-aob Jeremiab ǃoa ge hāsa, Babilons gao-aob Nebukadnesari ge Egiptebab nî ǁnāǂamse ra hāb ǂama.
14 “Nē ǃkhaisa Egipteb ǃnâ ǂanǂan,
îs ǁnâuhe Migdols, Memfis tsî Taxpanhes tsîdi ǃnâ.
Mî: Khâima î ǂhomisen tsî ǂhomisase hâ,
gôab sadu ǂnamipe nî hîkākā xuige.
15 Tarexab Apisa ge ǃkhoeni?
Tarexab ge sadu ǀgaisa ǁgōba mâhō ǁoa i?
ǃKhūb ge ǂnauǁgui bi amagas komo.
16 Sadu di ǂguigu ge ǃnôa tsî ge ǁnā,
tsîb ge nēba naub ǃoa ra mî:
Khâi, î ge sage khoen ǂûn ǃoa oa
tsî sage ǃnaeǃhūb ǃoa,
î ge ǁgâiǀā-aob di gôaba xu bē.
17 “Egipteb gao-aob Faraoba ǀonǂgai.
ǂKhupixab, ǃēsa ge ǁause ǃkharu kaiba.
18 Tita ûi hâ ǃkhais ao, tib ge Gao-aob,
ǃKhū Hoaǀgaixa ti ǀon hâba ra mî.
ǀGuib, Taborǃhommi khami ǃhomgu ǁaegu nî īb,
Karmelǃhommi khami hurib tawab ge nî hā.
19 ǃKhōsabese ūǃgûhesa ǃoa ǂhomisen,
sadu Egipteb ǁanǂgāsabedo.
Memfis ge ǃū-aisase nî ī,
khoe-i xare-i ge ǁîs ǃnâ ǁan tide.
20 Egipteb ge a îsa tsâu,
xaweb ge nâ ra ǀgînab xa nî hāǂamhe.
21 ǁÎb di ǀkhupi toroǃkhamaogu
tsîn ge kaukausa tsâugu khami ī.
ǁÎgu ge ǀhûpe dabasen tsî nî ǃkhoeni,
ǁîgu ge mâhō tide,
ǂōǂōsib tsēs xan go hāǂamhe xui-ao,
tsēs ǁîn di hîkākāhes dis xa.
22 Egipteb ge ǁhaini ra ǀao-i khami ra ǀō,
khākhoen toroǂnubis ra ǂgâxa amaga.
ǁÎgu ge ǃōdi ǀkha ǁîb ǃoagu ra hā,
haiǁhā-aogu khami.
23 ǁÎgu ge haiǀgoms âna nî ǁhāǁnâ,
kaises ga ǀgom xawe,
tib ge ǃKhūba ra mî.ǁÎgu ge ǂhomn ǃgâ-ai a ǂgui,
ǁîgu ge ǃgôahe ǁoasase a ǂgui.
24 ǀGôas Egipteb dis ge nî taotaohe,
ǁîs ge ǀapas ǁaes ǃomǁae nî māǁnâhe.”
25 ǃKhūb Hoaǀgaixab Israeli di Elob ge ra mî: “Tita ge ǁkharaba nî ūǀkhī Tebes elob Amonni ǂama tsî Faraob ǂama tsî Egipteb tsî ǁîb elogu tsî ǁîb gao-aogu ǂama tsî ǁnān Faraob ai ra ǂgomaiǂnûin hoan ǂama. 26 Tsî ta ge ǁîna ǁnān ǁîn ûiba ra ôan ǃomǁae nî māǁnâ, Babilons gao-aob Nebukadnesari tsî ǁîb di toroǂnubis ǃomǁae. Xawe ǁnās khaoǃgâb ge Egipteba ǁkhawa nî ǁanǃnâhe, aiǃâ i ge ī-i khami,
tib ge ǃKhūba ra mî.ǃKhūb ge ǁîb ǁaesa nî huiǂui
27 “Xawe sats ti ǃgāts Jakotse tā ǃao,
sats Israeltse tā ǂkhabuǂâi.
Tita ge ǃnū ǃhūba xu nî huiǂui tsi;
tita ge sa suriba ǃkhōsis ǃnân hâ,
ǃhūba xu nî huiǂui.
Jakob surib ge oa tsî ǃnorase tsî sâsase nî hâ,
tsî khoe-i xare-i xa ǃhuriǃhurihe tide.
28 Tā ǃao ti ǃgā Jakotse,
tib ge ǃKhūba ra mî,tita hâǀkhā tsi xuige.
Tita ge ǁîdi ǃoa ta ge doeǁgabē tsi ǁaede
hoaragase nî ǀamǀam,
xawe ta ge satsa ǀamǀam tide.
Satsa ta ge ǀgaus ai nî ǁkhara,
tsî ta ge ǁkhara tsi tamase ǁnāxū tsi tide.”
© Khoekhoegowab Elobmîs © Bible Society in Namibia, 2020.
