Jeremia 44 - Khoekhoegowab New Translation 2020 (KKG20)

ǃKhūb di ǂhôas Egipteb ǃnâ Jodeǁîn ǃoa

1 Nēs ge mîs Jeremiaba ge hābasa Egipteb ǃnâ hâ Jodeǁîn, ǃādi Migdols, Taxpanhes, Memfis tsî Patrosǀkharib ǃnâ ǁan hân hoan ǃoa: 2 “Nētib ge ǃKhūb, Hoaǀgaixab Israeli di Eloba ra mî: Mû du ge ge mâtikō kai tsūǀkhāba ta ge Jerusalems tsî Judab ǃādi hoadi ǂama hā-ūsa. Nētsē di ge ǁîde a ǃū-aisa tsî khoe-i xare-i xa ǁanǃnâhe tama hâ, 3 ǁnā ǂkhabasib hîan ge dīb ǃaroma. ǁÎn ge tita ge ǁaiǁai, ǀkhara eloga ǀanǀanǁguibade dība tsî ǃoabas ǀkha; elogu ǀūn ge i gu tsî ǁîn aboxan tsîn ge ǀū i ga. 4 Tita ge ti ǃgāgu, kēbo-aoga sado ǃoa ge sî tsî ge mî: Tā nē ǁgaiǁgaisa xūn, hîa ta ǁkhan hâna dī. 5 Xawen ge ǁnâu ǂgao tama ge i tsî ǃgâ tama ge i, nē ǂkhabadība xu ū-oasen tsîn ǀkhara eloga ǀanǀanba tidega. 6 ǁNā-amagab ge ti ǁaib tsî ǁaixasiba ǁhōǂuisen hâ tsî Judab ǃādi tsî Jerusalems ǃgangu ǃnâ ǂhubi tsî ǁîde ge ǃū-aisa ǃkhai kai nētsēs kōse di īse.

7 “Nētib ge ǃKhūb, Hoaǀgaixab Israeli di Eloba ra mî: Tarexa du nēti ī kai tsūǀkhāba sadu ǂama ra hā-ū, aob kas, taras kas, ǀgôa-i kas, dai ra-i kas hoasa Judaba xu ra ǃhomǂui, khoe-i xare-e ǃgau tamase? 8 Tare xū-i ǃaromadu sadu ǃomgu sîsenni ǀkha tita ǁaib ǃoa ra ǂoeǂoe, nau eloga Egipteb, ǁîb ǃnâ du ǁan hâb ǃnâ ǀanǀanbas ǀkha, î du ǁî-aitsama hîkākāsen tsî nî ǀâxarexū kai tsî ǃhūbaib di ǁaedi hoadi ǃnâ nî ǃharaxūhesa? 9 ǀUru du kha ge ǂkhabasigu sadu aboxagu digu tsî Judab gao-aogu tsî ǁîgu taradi digu, ǂkhabasigu sago tsî sago taradi digu Judab ǃnâ tsî Jerusalems ǃgangu ǃnân gere dīga? 10 ǁÎn ge nētsēs kōse ǃgamǃgamsen tama hâ tamas ka io ǃao tama hâ, tamas ka io ti ǂhanugu tsî ǂnûiǂgādi, sadu tsî sadu aboxaga ta ge māna sao tama hâ.

11 “ǁNā-amagab ge ǃKhūb Hoaǀgaixab, Israeli di Eloba ra mî: Tita ge ti aisa ǂkhawab ǃoa sadu ǃoagu nî ǂnûi Judab ǃhūb hoaragaba ta nî hîkākāse. 12 Tita ge ǃgau gen Judab din, Egipteb ǃoa ǃgû tsî ǁnāpa sī ǁansa ǂâibasen hâna nî hîkākā. ǁÎn hoan ge Egipteb ǃnâ torob ǃnâ tsî ǃâtsūǀkhāb xa nî ǁō, ǂkharina xu kain kōse; Sadu ge ǀâxarexūse tsî ǀâxarexūxūse tsî ǃhuriǃhurisaxūse tsî ǃhōxūse nî ī. 13 Tita ge ǁnān, Egipteb ǃnâ ǁan hâna nî ǁkhara Jerusalems dina ta ge ǁkhara khami, gôab tsî ǃâtsūǀkhāb tsî ǂhīǁōb tsîn ǀkha. 14 Judab ǃnâ ge ǃgau hâ i tsî Egipteb ǃnâ sī ǁann di ǀgui-i tsîn ge ûiǃgau tamas ka io ûiǂoa tide, ǁîn di ǃhūb Judab ǃoa nî oase, mâtikōsen ga ǁîb ǃoa oa tsî ǁnāpa sī ǁansa ǁkhore xawe. ǀGui-i tsîn ge ǁkhawa oa tide, ǀnî ǃhūsaben ǀguin.”

15 On ge ǁnā aogu, taradi âgu ǀkhara eloga gere ǀanǀanba ǃkhaisa ǂangu tsî hoaraga kai ǂnubis taradi ǁnāpa mâdi, tsî hoaraga ǁaes Egipteb ǃnâ ge Patros ǃnâ ǁan hâ is tsîn hoana Jeremiaba ge ǃeream: 16 “Sida ge ǁnā mîs ǃKhūb ǀons ǃnâts ra mîba dasa ǃgâ tide. 17 Sida ge mî da ge xū-i hoa-e nî dī. Sida ge ǀHommi Gao-aosa ǀanǀanǁguibade nî dība, tsî da ge ǁîsa ǂnâǁguibade nî hā-ūba, sida aboxagu tsî gao-aogu tsî ǂgaeǂgui-aogu ge ǀnai Judab ǃādi tsî Jerusalems di ǃgangu ǃnâ gere dī khami. ǁNā ǁaeb ǃnâ da ge ǀoasa ǂûna ūhâ, ǃgâiǃgâxa tsî ǂōǂōsi-i xare-e ge ūhâ tama hâ i. 18 Xawe ǀHommi Gao-aosa da ge ǀanǀanbaǀû tsî ǁîsa ǂnâǁguibade dībaǀû, ǁaeba xu da ge hoa xūn ǃnâ a tôasisa, tsî da ge torob tsî ǃâtsūǀkhāb xa ra ǁō.”

19 Tsî di ge tarade ge ǀaro: “ǀHommi Gao-aosa se ga ǀanǀanba tsî ǂnâǁguibade dība tsî ǁîs ība ūhâ tsamperena dībao, sise aogu a ǀūsesa ge i?”

20 ǁNās khaoǃgâb ge Jeremiaba hoaraga ǁaes ǃoa, aogu tsî taradi tsî ǁîba ge ǃeream khoen hoan ǃoa ge mî: 21 ǁNā ǀanǀanǁguibadi, Judab ǃādi tsî Jerusalems ǃgangu ǃnâ du gere dīdi, sadu tsî sadu aboxagu, sadu gao-aogu, sadu ǂgaeǂgui-aogu tsî ǃhūb di ǁaes tsîdo, ǁnān xa ǃKhūba ǂâi tamab ge hâ i? ǁÎna ǁîb ǂâis ǃnâ ǀkhai in ge i? 22 ǃKhūb ge ǃaruǀî sadu ǂkhabadīgu tsî ǁgaiǁgaisa xūn hîa du gere dīna ge tani ǁoa. ǁNā-amagab ge sadu ǃhūba ge ǃgaroǃhū kai tsî ge ui-uisa tsî ǀâxarexū kai, khoe-i xare-i xa ǁanǃnâhe tamase nētsēs kōse i īse. 23 ǀAnǀanǁguibade du gere dī tsî ǃKhūb ǃoagu ǁore tsî ǁîb mîsa ǃgâ ǂgao tama i, tamas ka io ǁîb ǂhanub tsî ǂnûiǂgādi tsî mîmādi tsîna ǁnâuǀnam tama i, amagas ge nē ǂōǂōsib xa du ge hāǂamhesa, nētsēs kōse i īse. 24 Ob ge Jeremiaba ǁaes tsî taradi hoade ǃoa ge mî: “ǃKhūb di mîsa ǁnâu re, sadu Judab didu hoadu Egipteb ǃnâ hâdo. 25 Nētib ge ǃKhūb, Hoaǀgaixab Israeli di Eloba ra mî: ‘Sago tsî sago taradi tsîdu ge mî du gena ge dīǀoaǀoa mîraǃâ: “Sida ge amase mîmâi da ge khami nî dī tsî ǀHommi Gao-aosa ǀanǀanǁguibadi tsî ǂnâǁguibade nî dība.” ’ Sadu mîmâide ǁapoǁapo, î ǁîde dīǀoaǀoa. 26 Xawe ǃKhūb di mîsa ǁnâu sadu Judab didu hoadu, Egipteb ǃnâ ǁan hâdo. Tita ge ti kai ǀons tawa ge nū, ti ǀons ǃaruǀî Judab di ǀgui-i xawe-i tsîn xa ǂgaiǀîhe tidesa hoaraga Egipteb ǃnâ, ǃKhūb Elob ûi hâ ǃkhais ao, ti ra mîse”

tib ge ǃKhūba ra mî.

27 Tita ge ǁîna mûs ǃnâ nî ūhâ, ǂkhabab ǃoa tsî ǃgâib ǃoa tama, on ge Egipteb ǃnâ hâ Jodeǁîn hoana, torob ǃnâs kas, ǃâtsūǀkhāb xas kas hoasa nî ǁō, ǀgui-i ân tsîn ǃgau tides kōse. 28 ǁNān toroba xu ûiǂoan tsî Egipteba xu Judab ǁga nî oan ge kaise nî ǀoro. On ge Judab ǃnâ ge ǃgaun, Egipteb ǃoa ge ǁnāpan sī ǁanse ǃgûna nî ǂan, tari-i di mîs nî mâǁaposa, tis as tamas ka io ǁîn dis asa. 29 Nēs ge sado saose nî iba, tib ge ǃKhūba ra mî, nē ǃkhais ǃnâ ta nî ǁkhara dusa, î du ǂan ti mîdi ǁaposase mâsa, sadu tsūǀkhāb ǃoa. 30 Nētib ge ǃKhūba ra mî: Tita ge Egipteb gao-aob Faraob Hofraba ǁîb khākhoen ǃomǁae nî māǁnâ, ǁnān ǁîb ûiba ra ôan ǃomǁae, Judab gao-aob Sedekiaba ta ge ǁîb di khākhoeb, ǁîb ûiba ra ôab, Babilons gao-aob Nebukadnesari ǃomǁae māǁnâs ǁkhās khami.