1 Josiab ôab Sedekiab, Babilons gao-aob Nebukadnesari ge Judab gao-aose mâib ge Jojakimmi ôab Konjab soas ǃnâ gere gaosîsen. 2 Xawe gu ge ǁîb kas, ǁîb ǂamkhoegu kas, ǃhūb di ǁaes kas hoasa ǃKhūb di mîdi kēbo-aob Jeremiab ǃnâ-ūb ge mîde ge ǃgâ ǂgao tama hâ i.
3 Gao-aob Sedekiab ge Selemjab ôab Jukali tsî Maasejab ôab prister Sefanjab tsîga kēbo-aob Jeremiab ǃoa nē haisis ǀkha ge sî: “Toxopa ǃKhūb sada Elob ǃoa ǀgoreba da re.” 4 Jeremiab ge noxopa ǃnorasase ǁaes ǁaegu gere hâma, noxopab ge ǃkhō-oms ǃnâ ǂgāhe tama hâ i xui-ao. 5 Faraob toroǂnubis ge Egipteba xu ǃgûǂoa tsî Jerusalemsa gere xāǂgā. Xaldeaǁîn ge ǁnāsan ge ǁnâu, o Jerusalemsa xu ge ǂgae-oasen.
6 Os ge ǃKhūb di mîsa kēbo-aob Jeremiab ǃoa ge hā: 7 “Nētib ge ǃKhūb Israeli di Eloba ra mî: Nēti du ge Judab gao-aob, tita du nî dîǃgâse go tita ǃoa a sî duba nî mîba. Faraob di toroǂnubis sados nî huise ge ǃgûǂoas ge ǁîs di ǃhūb Egipteb ǁga nî oa. 8 Tsîn ge Xaldeaǁîna ǁkhawa oaǀkhī tsî nē ǃās ǃoagu hā nî ǃkham; ǁîn ge ǃāsa ū tsî ǁîsa nî khauǃkhū.” 9 Nētib ge ǃKhūba ra mî: “Tā ǂgaeǂhapusen, Xaldeaǁîn ge ǂanǂansase nî ǁnāxū da; ǁîn ge sida xu nî bē” ti ǂâi tsî. ǁÎn sado xu ǃgûbē tide xuige. 10 Xaldeaǁîn di toroǂnubis sadu ǃoagu ra ǃkhams hoasa du ga dan, tsî gu ga tsuihe hâ khoegu ǀguiga ǁîgu tentomdi ǃgau, xawe gu ge ǁîga khâi tsî nē ǃāsa nî khauǃkhū.
Jeremiab ge ǃkhōsis ǃnâ ra ūhe
11 Xaldeaǁîn di toroǂnubis ge Jerusalemsa xu ǂgae-oaseno, Faraob di toroǂnubis ǃaroma, 12 ob ge Jeremiaba Jerusalemsa xu ge ǂoa, Benjaminni ǀkharib ǁga ǃgû tsîb ǁnāpa ǁaes ǃnâ ǃâ-e sī nî ǃkhōǃoase. 13 Tsî Jeremiab Benjamindao-ams tawa ra sī, hîab ge Selemjab ôa tsî Hananjab ǁnurib, ǃûi-aogu di mûǂamaob Jerijaba kēbo-aob Jeremiaba ǃkhō tsî ge mî: “Sats ge Xaldeaǁîn ǁga ra ǃgû.”
14 Ob ge Jeremiaba ge ǃeream: “Ama tama i, Xaldeaǁîn ǃoa ta ǃgû tama.” Xaweb ge Jerijaba ǁîba ǃgâ ǂgao tama ge i, tsîb ge ǁîba Jeremiaba ǃkhō tsî ǂamkhoegu tawa ge sī-ū. 15 ǂAmkhoegu ge kaise Jeremiab ǀkha ǁaixa tsî ǁîba ǂnau tsî xoa-aob Jonatanni di oms, ǃkhō-omse ge dīhes ǃnâ ge ǂganamǂgā. 16 ǁNātib ge Jeremiaba ǃkhō-oms di ǃnaka hâ ǃnā-oms ǃnâ ge ǂgāhe tsî ǂomxa ǁaeba ǁnāpa ge hâ.
17 ǁNās khaoǃgâb ge gao-aob Sedekiaba ǁîba sī ū kai tsî gao-ommi ǃnâ ǂganǃgâsase ge dî bi: “Mî-e ǃKhūba xu hâ i a?” Ob ge Jeremiaba ge ǃeream: “Î, hâ a. Sats ge Babilons gao-aob ǃomǁae nî māǁnâhe.” 18 Ob ge Jeremiaba gao-aob Sedekiaba ge dî: “Mâ ǂkhabadī-e ta tita sats ǃoagus kas, sa ǃgāgu ǃoagus kas, nē ǁaes ǃoagus kas hoasa ge dī, ots ǃkhō-oms ǃnâ ge ǂgā te? 19 Mâpa gu nēsi sadu kēbo-aogu, sado ge kēboba tsî ‘Babilons gao-aob ge sadu ǃoagu tsî nē ǃhūb ǃoagu hā ǃkham tide’ ti mîga hâ? 20 Nēsi ǃgâ te re, ǃgôahesa gao-aotse, î ta ti ǀkhomabasensa sa aiǃâ hā-ū re. Tā ǁkhawa xoa-aob Jonatanni oms ǁga sî-oa te re, î ta tā ǁnāpa ǁō.”
21 Ob ge gao-aob Sedekiaba ge mîmā, îb Jeremiaba ǃûi-aogu di ai-ommi ǃnâ ǂgāhe. Tsîb ge tsēkorobe ǀgui pereba pereǁganaoga xu gere māhe, ǃās di pere-i hoa-i ge toas kōse. ǁNātib ge Jeremiaba ǃûi-aogu di ai-ommi ǃnâ ge hâ.
© Khoekhoegowab Elobmîs © Bible Society in Namibia, 2020.
