Jeremia 35 - Khoekhoegowab New Translation 2020 (KKG20)

Jeremiab tsî Rexabǁîn

1 Josiab ôab Jojakimmi Judab gao-ao i ǁaeb ǃnâs ge mîs ǃKhūb disa Jeremiaba ge hāba: 2 “Rexabǁîn di ǃhaoǃnās ǃoa ǃgû, î ǁîn ǀkha sī ǃhoa, î ǁîna ǃKhūb ommi di ǃnā-omdi ǀguis ǃnâ ǂgâ-ū tsî ǂauxûi-e mā, ān nîse.” 3 O ta ge Jasanjab, Jeremiab ôab, Habasinjab ôab tsî ǁîb di ǃgâsagu tsî ǁîb ôagu hoagu tsî hoaraga ǃhaoǃnās Rexabǁîn dis tsîna ge ū. 4 Tsî ta ge ǁîna ǃKhūb ommi tawa sī-ū tsî Elob aob Hananni, Jixdaliab ôab di ǃnā-oms, Salummi ôab Masejab dis ǃnâ ge ǂgâ-ū. ǁÎs ge ǀgapise hâ ǃnā-oms gaoǀgôagu dis xōǀkhā ge hâ i. 5 Tsî ta ge Rexabǁîna ǂauxûib xa ǀoa hâ ǀgabidi tsî ǃoredi tsîna mâi-aiǃâ tsî “ǂAuxûi-i xa du ā re” ti ge mî.

6 Xawen ge ǁîna ge ǃeream: “Sida ge ǂauxûi-e ā tide, sida aboxab Rexab di ôab Jonadab ge sida ge mîmā, sida kas, sida ôananôagub kas hoasa da ǂauxûi-e ā tide, 7 tsî om-i tsîna om tidesa. ǁKhāti da tsoro tamas ka io ǀnî ǃhana-i kas, draibeǃhana-i kas hoasa ǂgā tide, tsî sida ûitsēdi hoade tentomdi ǃnâ nî ǁansa, î da nē ǃhūb ǃhaokhoese da hâǃnâb ǃnâ hâǀgara ǁkhā. 8 O da ge sida Rexab ôab, sida aboxab Jonadab ge mîmā dan hoana ge ǁnâuǀnam, ǂauxûi-i xare-e da sida ûitsēdi hoade ā tidesa, sida kas, sida taradi kas, sida ôagu kas, sida ôadi kas hoasa, 9 tsî da om-i xare-e ǁanǃnâ da nîse om tidesa. Sida ge ǁkhāti draibeǃhana-i kas, ǃhana-i kas, ǃkhom-i kas hoasa ūhâ tama hâ. 10 Xawe da ge tentomdi ǃnâ ǁan hâ tsî sida aboxab Jonadab ge mîmā dan hoana ge ǁnâuǀnam. 11 Xawe da ge Babilons Gao-aob Nebukadnesari ge ǃhūba nî ǁnāǂamse ǂoaxa, o ge mî: ‘Hā, î da Jerusalems ǃoa ǃgû, Xaldeaǁîn tsî Siriaǁîn toroǂnubis di ǃaob xa.’ ǁNā-amagas ge Jerusalems ǃnâ da ǁan hâsa.”

12 Os ge ǃKhūb di mîsa Jeremiaba ge hāba: 13 “Nētib ge ǃKhūb Hoaǀgaixab Israeli di Eloba ra mî: ǃGû, î Judab khoen tsî Jerusalems ǁanǂgāsaben tsîna sī mîba. Tarexa du ti mîde ǃgâ ǂgao tama tsî ti mîmāde ǁnâuǀnam tama? tib ge ǃKhūba ra mî. 14 Rexab ôab Jonadab di surib ge ǁîb di mîmās, ǂauxûi-i xare-en ā tidesa ge ǁnâuǀnam tsî nētsēs kōse ǂauxûi-i xare-e ā tama hâ. Xawe du ge sado ǀûs ose ta ge sadu ǀkha ǃhoa, xawe ǁnâuǀnam te tama ge i. 15 Tita ge ti hoaraga ǃgāgu, kēbo-aoga ǀûs ose sado ǃoa ge sî, mî rase: Sadu hoado ǂkhaba daoba xu ūdabasen, î sadu dīga ǃgâiǃgâi, î tā ǀkhara eloga sao ǁîga nî ǀgoreǀîse, o du ge sadu ǃhūb, sadu tsî sadu aboxana ta ge māb ǃnâ nî ǁan. Xawe du ge ǃgâ ǂgao tama ge i tsî tita ǁnâuǀnam tama ge i. 16 Rexab ôab Jonadab di surib ge ǁîn aboxab di mîmās ǁînab ge māsa ge ǃkhōǀgaipe, xawe nē ǁaes ge tita ǁnâuǀnam tama hâ. 17 ǁNā-amagab ge ǃKhūb Hoaǀgaixab, Israeli di Eloba nēti ra mî: Tita ge ǁîn ǃoagu ta ge ǃhoa ǂkhawasib hoaba Judab tsî Jerusalems di ǁanǂgāsaben hoan ai nî ūǀkhī; ǁîn ǀkha ta ge ǃhoa, xawen ge ǃgâ te tama ge i, ǁîna ta ge ǂgai, xawen ge ǃeream tama ge i.”

18 Xawe Rexabǁîn di ǃhaoǃnās ǃoab ge Jeremiaba ge mî: “Nētib ge ǃKhūb Hoaǀgaixab, Israeli di Eloba ra mî: Sadu aboxab Jonadab di mîmāsa du ge ǁnâuǀnam tsî ǁîb ǂnûiǂgāde sao tsî ǁîb ge mîmā du khami dī, 19 amagab ge ǃKhūb Hoaǀgaixab, Israeli di Eloba ra mî, Rexab ôab Jonadab ge hoaǁae, ǁîba nî aimâba khoeba nî ūhâ.”