Israels di oahās
1 ǁNā ǁaeb ai, tib ge ǃKhūba ra mî, ta ge tita nî Israels ǃhaoǃnādi hoadi di Elo tsîn ge ǁîna nî ti ǁae. 2 Nētib ge ǃKhūba ra mî: “Gôaba xu ge ûiǂoa khoen ge ǃgaroǃhūb ǃnâ ǀkhomma ge hō. Israels ge sâba ǁkhore, 3 o ta ge tita ǃnūseba xu ǁîn ai ge ǂhaiǂhaisen. Tita ge sado ǀamo ǀnammi ǀkha ge ǀnam, ǁnā-amaga ta ge ǀûs ose ǂgomǂgomsase ge hâba du. 4 Tita ge ǁkhawa nî ǂnubikhâi si, ǂkhamkhoes Israelse. Sas ge ǁkhawa ǀkhō-ūxūn âsa ūkhâi tsî ǂnā tsî nî dâ. 5 Sas ge ǁkhawa draibeǃhanaga Samarias ǃnâugu ai nî ǂgā. ǃHana-aon ge ǂgā tsî ǂûna nî ǂû. 6 Tsēs ge nî hā, ǁîs ai gu ǃûi-aoga Efraimmi ǃnâugu ai nî ǂgaisa: ‘Khâi î da Sions ǃoa ǃgû, ǃKhūb sada Elob ǁga.’ ”
7 Nētib ge ǃKhūba ra mî:
“ǃGâiaǂgaob ǀkha Jakoba ǁnaeba re,
ǃauǂgaiba re ǃhaodi di danaba.
ǁNâusen kai re sadu koatsanasa, î mî,
ǃKhūb ge ǁîb ǁaesa go hui,
ǃgau hân Israels dina.
8 Tita ge ǁîna ǀapasa xu nî oaǀkhī-ū,
tsî ǃnū ǃkhaidi ǃhūbaib dide xu nî ǀhaoǀhao.
ǂGīn tsî ǃhomn tsîn ge ǁîn ǀkha nî hā,
ǀgamǀkhādi tsî ǁoratsûb ǃnâ hâdi tsîna.
Kai ǁaesen ge ǁîna nî oahā.
9 ǁÎn ge ā rase nî oaǀkhī,
ǁkhaeǂgaob ǀkha ta ge ǁîna nî ǂgaeǂguihā.
Tita ge ǁîna ǁgamxa ǃāroga ǃoa nî ǂgaeǂgui,
ǂhau daogu ǃnôan tide gu ai.
Tita ge Israela ǁgûse iba,
Efraimmi ge a ti ǂguroǃnaesabe.
10 ǃHaoso ǁnâu re ǃKhūb di mîsa,
ǁîsa ǂanǂan ǃnūse ǁgoe huri-amǃhūgu ǃnâ,
î mî, ‘ǁNāb Israelsa ge ǀgaruǀgarub ge
ǁîsa nî ǀhaoǀhao,
tsî ǁîsa gūǃûi-aob ra gūn âba ǃûi
khami nî ǃûi.’
11 ǃKhūb ge Israelsa ge ǃnoraǃnora,
tsî ǁîsa ǁîs xa ǀgaisa ǁaesa xu ge ore.
12 ǁÎn ge hā tsî Sionni ǀgapib ai ǃgarise nî ǁnae,
tsî ǃKhūb di ǃgâisib ǂama nî dâ.
ǃHorob tsî ǂauxûib tsî ǀkhera-olib ǂama,
gūn tsî goman ǂama.
ǁÎn ge ǃgâise ǂnâsa ǃhanab khami nî i,
tsî ǃaruǀî ǂhâ-i xare-e ūhâ tide.
13 O di ge ǂkhamkhoede ǂnā tsî nî dâ;
ǂkhamgu tsî kairagu tsîn ge nî ǃgâiaǂgao.
Tita ge ǁîn di ǃoaba dâb ǃnâ nî ǀkharaǀkhara,
tsî ǁîna ǃoab ǃās ǃnâ nî ǃgâiaǂgao kai.
14 Tita ge pristerga ǃnāǂamsase nî ǁâǁâ
tsî ti ǁaesa ti ǃgâisib ǀkha nî ǀoaǀoa”
tib ge ǃKhūba ra mî.ǃKhūb ge Israelsa ra ǀkhomxa
15 Nētib ge ǃKhūba ra mî:
“Dom-i ge Ramas ǃnâ ra ǁnâuhe,
dom-i ās tsî ǃgaes tsîra di-e.
Raxels ge ǀgôan âs ǃaroma ra ā
tsî ǁkhaeǂgao kaisen ǂgao tama hâ,
ǁîn a ǀkhai amaga.”
16 Nētib ge ǃKhūba ra mî:
“Sa domma xu āsa ǁkhae
tsî sa mûra xu ǁgamronna;
sa sîsenni nî mādawa-amhe xuige,
tib ge ǃKhūba ra mî.Sa ôan ge khākhoen ǃhūba xu nî oaǀkhī.
17 Sa ǃgoaxa ǁaeb ge ǃâubasensa ūhâ”
tib ge ǃKhūba ra mî.Sa ôan ge ǁîn di ǂhunuma ǃhūb ǃoa nî oaǀkhī.
18 Tita ge Efraimmi ǃgaesa ge ǁnâu:
“Sats ge tita ge ǂgōǀau tsî ge ǂauǂau,
ǃkhausa tsâu-i khami.
Oaǀkhī-ū te re, î ta sats ǃoa oahā,
sats ǃKhūts a ti Elo xuige.
19 Kābē ta ge hâ i, xawe ta ge ge ǃhobasen;
ǂgōǀauhe ta ge, o ta ge ti ǂnamib ai ge ǂnau.
Tao tsî ta ge taob xa ge dāhe,
ti ǂkhamsis di ǃharaxūba ta ge tani xui-ao.
20 “Efraimma ti ǀnam ǀgôaba?
Ti ǀnamǀnamsa ǀgôa tamaba?
Mâtikōse ta ga ǁîb ǃoagu ǃhoa,
xawe ta ge ǁîb xa ra ǂâi.
Ti ǂgaob ge ǁîb ǂama ra ā,
amase ta ge nî ǀkhomxa bi,
tib ge ǃKhūba ra mî.21 Daob di ǁgauǁgausaode mâibasen,
daoǁgau tsi nî saode mâi.
Kai daob ai ǂâisa ǂnûi,
ǁnā daob ǁîb ais gere ǃgûba.
Oaǀkhī re ǂkhamkhoes Israelse,
oaǀkhī re sa ǃāde ǃoa.
22 Mâtikōses kha nî îganǀgē,
sa ǂgomǃgâhe ǁoasa ǀgôase?
ǃKhūb ge ǀasa xū-e ǃhūbaib ai go dī,
taras ge aoba nî sâu.”
Elob ǁaes ge nî ǃgâiǃgâxa
23 Nētib ge ǃKhūb Hoaǀgaixab Israeli di Eloba ra mî: “Nē ǁaesa ta ga ǁîn ǃhūb ǃnâ oaǀkhī-ū, on ge Judab ǃhūb ǃnâ tsî ǁîb ǃādi ǃnâ nēti nî mî:
“ ‘Ab ǃKhūba ǀkhae tsi re, ǃanu ǃhomts
ǁîb di ǃanu ǁanǃkhaitse.’ ”
24 Khoen ge Judab tsî ǁîb ǃādi ǃnâ ǀhûpe nî ǁan; ǃhanaǂgā-aogu tsî gūǃûi-aogu tsîn hoana. 25 Tita ge tsau hâna ǀasa ǀgaiba nî mā tsî ǂkhabu hâna nî ǀgaiǀgaiǃnâ. 26 On ge khoena nî mî, “ǂOmsa xu ta ge ǂkhai, o ta ge khoasase ge tsâ.”
27 “Mû tsēdi ge nî hā ǁîdi ai ta Israeli tsî Judab ǃhūb tsîkha khoen tsî ǀgoan tsî goman ǀkha nî ǀoaǀoade,” tib ge ǃKhūba ra mî. 28 Tsî ǁîn ǂama ta ge ǂkhaikari hâ i, ǃhomǂui tsî nî khôaǁnâse, khôaǂkhū tsî hîkākā tsî ǂōǂōsiba nî hā-ūse, khami ta ge ǁîn ǂama nî ǃûi, ǂnubikhâi tsî nî ǃhanase,
tib ge ǃKhūba ra mî.29 ǁNā tsēdi ǃnân ge ǃaruǀî mî tide:
“ǁGûgu ge ǀkhuru draibehais ǂûna ge ǂû,
tsîn ge ǀgôana ge ǀkhuruǁgû.”
30 “Xawe mâ-i hoa-i ge ǁî-i di ǁoreb ǂûb ǃaroma nî ǁō. Ora draibena ga ǂû-i hoa-i ge nî ǀkhuruǁgû.”
31 “Mû tsēdi ge nî hā, o ta ge ǀasa ǃgaeǀhao-e Israeli tsî Judab di khoen ǀkha nî dī”
tib ge ǃKhūba ra mî. 32 “ǁÎs ge ǁnā ǃgaeǀhaos, ǁîn aboxan ǀkha ta ge ǁîna ǃommi ai, Egipteba xu ǂgaeǂguiǂui ǁaeb ai dīs khami ī tide; ti ǃgaeǀhaos hîan ge khôasa, ǁîna ta ge ǃgame-aose ība i xawe,”
tib ge ǃKhūba ra mî.33 “Xawe nēs ge ǃgaeǀhaos ǁnā tsēdi khaoǃgâ ta Israels ǀkha nî dīsa,” tib ge ǃKhūba ra mî: “Ti ǂhanuba ta ge ǁîn ǃnâ nî mā; ǁîba ta ge ǁîn di ǂgaogu ai nî xoa. Tita ge nî ǁîn di Elo tsî ǁîn ge nî ti ǁae. 34 ǀGui khoe-i tsîn ge ǃaruǀî ǁî-i ǀgūkhoe-i tamas ka io ǁî-i ǃgâsa-e ǁkhāǁkhā tsî ‘ǃKhūba ǂan’ ti mî tide, hoan nî ǂan te xui-ao, ǂkhari-e xu kai-i kōse,” tib ge ǃKhūba ra mî. Tita ǁîna ǁoren âna nî ǀûba tsî ǃûǂamdi ân xa ǃaruǀî ǂâi tide xui-ao.
35 Nētib ge ǃKhūba ra mî:
ǁÎb hîa soresa tsēs di ǃnâse ra māb,
mîǁguisa daoga ǁkhâb tsî ǀgamirona
tsuxub di ǃnâse ra māba.
ǁÎb ge huriba ra ǁgao kai, ǃgabigu âb nî ǀōse;
ǁîb ge ǃKhūb Hoaǀgaixab ti ǀon hâ.
36 Nē mîǁguisa ǀgaub ga ti aiǃâba xu bē,
tib ge ǃKhūba ra mî,ob ge Israeli di ôananôaguba nî ǀam,
tsî ǀamos kōse ti aiǃâba xu ǁaese nî bē.
37 Nētib ge ǃKhūba ra mî:
ǀGapise hâ ǀhommi ga ǀnōhe ǁkhā,
tsî ǃhūbaib ǃgaoǃgaogu, ǃnaka hâga ôaǃnâhe ǁkhā,
o ta ge Israeli ôananôaguba nî ǂhara,
ǁîn ge dī xūn hoan ǃaroma,
tib ge ǃKhūba ra mî.38 Tsēdi ge nî hā, tib ge ǃKhūba ra mî, os ge nē ǃāsa ǁkhawa ǃKhūb ǃaroma nî ǂnubikhâihe Hananeli ǂGō-omma xu ǁHôas Dao-ams kōse. 39 Tsî ǀnō-ūtsurib ge ǁnāpa xu ǂhanuse Garebǃnâub kōse nî ǃkharu tsî ǁnās khaoǃgâ Goas ǃoa nî unusen. 40 Hoaraga ǃgoaǃnāb ǁō hâ sorodi tsî tsaob dib tsî hoaraga ǃhanagu Kidronǃārob kōse tsî Hān Dao-ams, aiǂoasǀkhāb ai hâs kōse, ǁîn ge ǃKhūba nî khaibahe. Nē ǃās ge ǁkhawa khôaǁnâhe tamas ka io hîkākāhe tide.
© Khoekhoegowab Elobmîs © Bible Society in Namibia, 2020.
