Israels ge Elob ǃoagu ǂgomǂgomsa tama hâ
1 “Khoeb ga taras âba xu ǀgora tsîs ga ǁîba xu ǃgû tsî ǀkhara aob tara kaio, o ǁîs ǁga ǁkhawa oa ǂgaob nî? ǁNā ǃhūba kaise ǀuriǀurihe tide? ǂGui ǀnamsagu âs ǀkhas ge ge ǀai, tsî nēsi tita ǁga ra oahā ǂgao,
tib geǃKhūba ra mî.2 “Kōkhâi re ǀkhaiǀkhā ǃnâugu ǃoa î kō! Mâpas ge ǁgoe-ūhe tama hâ i? Arabiaǁî-i ǃgaroǃhūb ǃnâ ra dī khamis ge daogu amǃgâ ǀnamsagu âsa gere ǃâuǂnû; tsîs ge sa ǀaib tsî ǂkhabasib ǀkha ǃhūba ge ǀuriǀuri. 3 ǁNā-amagas ge ǀnanub ge ǃkhō-oahe tsîb ǃkhāǁaeb ǀnanuba ǀapi tamasa. Tsîs ge ǁnātikōse ī tsî ǀai-aos ǃūǃâba ūhâ; tsîs ge tao-i xare-e ūhâ tama hâ.
4 “Tsîs kha nēsisa xu ‘Ti Îtse, ti ǂkhamsisa xu ti ǀhōsatse’ ti ǂgai te tide? 5 ǀAmoseb kha nî ǁaixahâhâ? ǁAib âbab ǀamose nî ūhâ? ǁNāsas ge sasa ra mî, xawes ge ǂkhababa ra sîsen.”
Israelǁaes tsî Judab din ge nî ǃhobasen
6 Ob ge ǃKhūba gao-aob Josiab di tsēdi ǃnâ ge mîǀî te: “Mûts ge Israels, ǁnā ǂgomoǃnâ taras ge dīsa? ǁÎs ge mâ ǀgapi ǃnâub hoab ai ǃapa tsî mâ hais hoas ǃnaka ǀai-ao-i khami gere tanisen. 7 Tsî ta ge tita nē xūn hoanas ge dītoas khaoǃgâs nî tita tawa oahā ti ge ǂâi hâ i, xawes ge ǁnāsa dī tama ge i. Tsîs ge ǁîs di ǃgâsas Judas, ǂgomoǃnâsa nēn hoana ge mû. 8 Judas ge hoaraga ǀaib ǁnā ǂgomoǃnâ Israels dib ǃaroma ta ǁîsa ǀgoraǂkhanisa ge māsa ge mû. Xawes ge ǀhôagao Judasa ǃao tama ge i, tsîs ge ge aiǃgû ǀai-aosis ǃâsa ǀhurus ǀkha. 9 Tsîs ge ǀaib âs ǀkha ǃhūba ge ǀuriǀuri. ǁÎs ge ǀuin tsî hain ǀkha gere ǀai. 10 Tsîs ge nēn hoan khaoǃgâ Judas, Israels di ǂgomoǃnâ ǃgâsasa ǂgaob hoab ǀkha tita ǃoa ǃhobasen tama tsî ǂkhabase ge ǃhobasen,”
tib ge ǃKhūba ra mî.11 Ob ge ǃKhūba ge mîba te: “ǂGomoǃnâ Israels ge ǀoms âsa ǂgomoǃnâ Judas dis ǃgâ-ai ge ǂhanu-ai kai. 12 ǃGû, î nē mîde ǀapas ǃnâ ǂhôa re: ‘ǂGomoǃnâ Israelse tita ǃoa oa re,’ tib ge ǃKhūba ra mî. Tita ge ǀkhomxaǂgao tsî ta ge ǀamose sadu ǀkha ǁaixa tide”
tib ge ǃKhūba ra mî.13 “ǀHapixa du a tsî du ge ǃKhūb, sadu Elob ǃoagu khâikhâisen ǃkhaisa ǂanǃgâ re. ǁKhāti mâ ǃam hais hoas ǃnakas sa ǀnamma ǃhao elona mā, tsî ǁîba ge ǁnâuǀnam tama isa.
14 “Oahā re ǁnāǁgôa hâ ǀgôado, o ta ge ti ūhâxūse nî dī du. Tita ge sado nî ū, ǀgui-e ǃāsa xu, tsî ǀgamna ǃhaosa xu tsî Sions tawa nî hā-ū”
tib ge ǃKhūba ra mî.15 “Tsî ta ge ti ǂgaob ǃoa hâ ǃûi-aoga nî mā du, tsî gu ge ǁîga ǂans tsî ǁnâuǃāb ǀkha nî ǃûi du. 16 Tsî du ga nē tsēdi ǃnâ ǀarosen tsî ǂûǂûxa, on ge ǃaruǀî ǃGaeǀhaos ǂGaes xa ǃhoa tide. ǁKhātin ge ǂâihō tide tsîn ge ǁnās xa ǂâi tsî ǁîsa ôa tide tamas ka io ǀnîsa kuru tide. 17 Nē ǁaeb ǃnân ge Jerusalemsa ‘ǃKhūb di Trons’ ti nî ǂgai; hoa ǁaedi ǁnāpa, ǃKhūb ǀons ǃaroma Jerusalems ǃnâ nî ǀhaose, tsîn ge ǃaruǀî ǁîn ǂkhaba ǂgaogu ǃoa ûi tide. 18 Nē tsēdi ǃnân ge Judas ommi dina Israels din ǀkha nî ǀhao, tsîn ge ǀguipa, ǀapas di ǃhūba xu tita ge sadu aboxaga ǀumis ase mā ǃhūb ǁga nî hā.”
Elob ǁaes di ǃgamekhôas
19 Ob ge ǃKhūba ge mî:
“Mâtikōse ta ti ôan ase ra ūǃoa
tsî ǃgâi ǃhūba ra mā du ǂgao;
hoan xa îsa ǀumis, hoa ǁaedi disa.
Tsî ta ge ‘Ti Îtse’ ti ǂgai te
tsî du ǁkhawa tita xu bē tide ti ge ǂâi hâ i.
20 ǂGomǂgomsa tama taras aob âsa ra ǁnāxūs khami
du ge tita ǃoagu ge ǂgomǂgomsa tama i,
sadu Israeli ommi dido”
tib ge ǃKhūba ra mî.21 Dom-i ge ǃnâugu ai ge ǁnâuhe,
ǃgaes, Israeli khoen ǀkhomadi disa;
ǁîn daoga xun ge dabasen
tsî ǃKhūb, ǁîn Eloba ge ǀuru.
22 Oa re, ǁnāǁgôaxa ǀgôado,
sadu ǁnāǁgôaxasiga ta ge nî ǂgauǂgau.
Mû, sats ǃoa da ge ra hā
sats a ǃKhū, sida Elotsa amaga.
23 Amase ǃnâugu tsî ǃhomga xu ra hāb ge harebeoǃnâ ǂkhupiba. Amases ge ores ǃKhūb Elob disa Israelsa hâba. 24 Sida ǂkhamsisa xub ge taoba sida aboxan di ǀhupuba hapu hâ; ǁîn di ǀuiǀnūǀgoan, goman, ǀgôadi tsî ǀgôagu tsîna. 25 Sida ge taob ǃnâ ǁgoe tsî taob xa ga ǃgū-aihe; ǃKhūb sida Elob ǃoagu da ge sida tsî sida aboxagu tsîda sida ǂkhamsisa xu ǁore amaga; ǃKhūb sida Elob domma da ge ǁnâuǀnam tama ge i.
© Khoekhoegowab Elobmîs © Bible Society in Namibia, 2020.
