Jeremiab tsî Prister Pashur hâkha ǂnoagus
1 Pashuri, Imeri ôab, ǃKhūb ommi ǃnâ ge mûǂamao ib ge Jeremiaba nē xūnab ra kēbose ge ǁnâu. 2 Ob ge Pashura kēbo-aob Jeremiaba ǂnau tsî Benjaminni ǂGâ-ams, ǃKhūb ommi tawa hâs ǃnâ ǃkhōsis ǃnâ ge ǂgā. 3 Sao ra tsē, Pashuri ge Jeremiaba ǃkhōsisa xu hā-ū ob ge Jeremiaba ǁîb ǃoa ge mî: “ǃKhūb ge sa ǀonsa Pashur ti ǂgai tama hâ, xawe ǃHurib mâ ǀkhāb hoab ai ti ge ǂgai. 4 Nētib ge ǃKhūba ra mî: ‘Mû tita ge satsa ǃhuriǃhurixūse sa ǃoagu tsî sa ǀhōsan ǃoagu nî dī. ǁÎn ge sa mûǁae, khākhoen ân di gôab ǃomǁae nî ǁō. Tsî ta ge hoaraga Judaba Babilons gaosisa nî māǁnâ tsîb ge ǁîba ǁîna ǃkhōsis ǃnâ Babilons ǁga nî ūǃgû tsî ǁîna ǁnāpa gôab ǀkha nî ǃgam. 5 ǁKhāti ta ge tita ǁîn di khākhoena hoaraga ǃkhūsib nē ǃās dib, ǁîs di hoaraga hōǂgān, ūhâxūn tsî ǁuib Judab gao-aogu dib tsîna ǁkhâuǁnâ tsî Babilons ǁga nî ǃgû-ū kai. 6 Sats xasa Pashur, tsî hoan sa oms ǃnâ ǁan hân tsîdu hoadu ge ǃkhōsis ǃnâ nî ūhe; Babilons ǁga du ge nî ǃgû, tsî ǁnāpa sī ǁō tsî nî ǁkhōhe, sadu tsî sadu ǀhōsan ǁîn ǃoagu du ǂkhabase ge kēbona.’ ”
Jeremiab ge ǃKhūb ai ra ǃgae
7 ǃKhūtse sats ge ge gāxaǃnâ te
tsî ta ge gāxaǃnâhe hâ.
Sats ge tita xa a ǀgaisa
tsîts ge ge dan te.
Hoaraga tsēsa ta ge ra âiǂuihe;
hoaragan ge tita ra ǃhō.
8 Mâ ta ga ǃhoa ǃnās hoasa ta ge ǂgaiǂui
tsî ra ǃau “ǂKhabab tsî hîkākās!”
Mîs ǃKhūb dis ge tita
ǃhōs tsî ǃgabes ase ge ība.
9 Tita ga “ǁÎb xa ta ge ǃhoa tide,
tamas ka io ǃaruǀî ǁîb ǀons ǃnâ ǃhoa tide” ti mî,
os ge ti ǂgaob ǃnâ khau ra ǀaes,
ǂkhōgu ǃnâ ǂganamhe hâs ase nî ī.
Dītsâ ta ra ǁîsa ǃkhōdawasa,
xawe ta a dī ǁoa.
10 ǂGuin tupu rana da ra ǁnâu;
ǃhurib ge mâ ǀkhāb hoab ai hâ.
“A da ǃnuri bi ǂhanub ai”
tin ge ǂansa ǀhōsana ra mî,
ti ǁnāsa ra kōse.
“ǀNîsib ge nî gāxaǃnâhe,
o ta ge dan bi
tsî a ǀkhao bi ǁkhā.”
11 Xaweb ge ǃKhūba tita ǀgaisa ǁē-aose ība,
ǁnā-amagan ge ti ǃgôaǃgonaona nî ǃnôa
tsîn ge dan te tide.
ǁÎn ge kaise nî tao
ǃgâiǃgân tide amaga.
ǁÎn taosib ge a ǀamo
tātsēs tsîna ǀuruhe tideba.
12 ǃKhū Hoaǀgaixats, ǂhanu-aiba ra ǃâitsâtse
ǂgaob tsî ǂâisa ra mûtse,
a ta sa ǀkhaoba ti khākhoen ai mû re,
ti ǂhanusi ǁhōba ta satsa ge mā xuige.
13 ǁNaeba re ǃKhūba!
Kare re ǃKhūba!
ǂHâb ǃnâ hân ûibab ge
ǂkhabadī-aon di ǃomǁaeba xu ore xuige.
14 ǀÂxarexūhes ge hâ ǁnā tsēs, ǁîs ai ta ge ǃnaesa!
ǁNā tsēs ti îs ge ǁora tesa, as tā ǀkhaehe!
15 ǀÂxarexūsab ge ǁnā khoeb, ti îba ǃgâi ǂhôa-e ge ūhābaba.
“Aore ǀgôabats ge go ǁorabahe” timî.
16 Ab ǁnā ǃādi khami ī,
ǃKhūb xa ǀkhomoǃnâse ra hîkākāhede.
Ab ǁgoaga tsûb di āsa ǁnâu
tsî ǃkhams ǃauba tsēǃgâǁaeb ai;
17 ǁhās ǃnâb ge ǃgam te tama i xui-ao,
tsîs ti îsa ti ǀhoba kai tama,
tsîb ǃnāb âsa ǀamose ǀgamǀkhāsa.
18 Tare-i ǃaromasa ǃnae ta gesa?
ǃGommi tsî ǃoab ǃaroma ǀguisa,
ti ûiba taob ǃnâ nî ǀamǀamse?
© Khoekhoegowab Elobmîs © Bible Society in Namibia, 2020.
