Judits di ǀgores
1 Os ge Juditsa aisǂama ǁnāǁgoe, tsaoba danas âs ai tsoro tsî anaǂamsarab ǃnakas ge ana hâ i ǃoab saraba ge ǁhû. ǁNā ǁaeb ǂûb ais ge tsuxuǁguibas ǃgâihamxūn disa Jerusalems ǃnâ, Tempeli ǃnâ gere dīhe. Os ge Juditsa ǃgari dommi ǀkha ǃKhūb ǃoa ge ǀgore: 2 “ǃKhū, ti aboxab Simeonni Elotse. Sats ge ǁîba Sixems khoegab ǁîgu dīb ǃaroma nî ǀkhaose ge hui. ǁÎgu ge ǁîb di ǂkham ǃgâsas Dinas, oaxae ge isa ǃkhō, sarana ǀkhauǁnâǀkhā, ǀuriǀuri, taotao, ǃgôaoǃnâ kai tsî ge ǀgaiǃkhō, sats ǁnāsa hoaragase ǃkhâi hâ i xawe. 3 ǁNā-amagats ge ǁîn di ǂgaeǂgui-aoga ǁkhā kharob hîa gu ge ǁîsa ǀgaiǃkhō-aib ai ge ǃgam kai. Tsîts ge hoan; khobon, gaoǀgôagu tsî ǂgaeǂgui-aoga ǁîgu di trondi ai ge hîkākā. 4 Sats ge Israelǁaes, sa ǁhûiǂuisa ǁaes, ǀkhaoǂgaoxa ge isa, Sixemǁîn di tarade ǀgaiǃkhō, ǁîn ôade ǃkhōsis ǃnâ ū tsî ǁîn ge ūhâ i xūna ūbasensa ge mā-am. Dinas di ǃgâsagu ge ge ǁaixa hâ i, taosib ǁîn omaris ǂama ge hāb xa tsî ǁnā-amaga sa huiba ge ǂgan.
“Ti Elotse, ti Elots hîa ta ra ǂgaiǀîtse, ti ǃoatarata di ǀgoresa toxopa ǁnâu re. 5 Sats ge hoan nēsi go īn tsî ǁîn aiǃâ ge īn tsî ǁnān khaoǃgâ nî īna ge ǃaroma. Sats ge hoana ge ǀapeǁgui hâ i. 6 Sats dīts nîse ǂâiǃnâǁgui hân hoan ge ǀnai dīhe hâ ǃkhais ase ī. Sats ge hugaǀgui ǁaeb aiǃâ tare-ets nî dī tsî mâ mîǁguigats ra ū ǂgao ǃkhaisa a ǂan. 7 Nēsin ge Asiriaǁîna ǂguros ǃgâ-ai a ǀgaisa; ǁîn ge ǁîn di hātoroǃkhamaogu tsî ǀnūtoroǃkhamaogu ai a ǂnīsa. ǁÎn ge ǁîn di ǁâtanin ai ǂgomǃgâ hâ, xawen ge ǃKhūtse sats hoa xūn ǂamai a kai ǂGaeǂgui-ao tsîts khākhoen toroǃkhamaoga hîkākā ǁkhā ǃkhaisa a ǀū. 8 Sa ǁaib ǃnâ sa ǁkhāsiba sîsenū, î ǁîn di ǀgaisa toroǂnubisa ǂkhūǂkhū. ǁÎn ge sats ra ǀgoreǀîǃnâhe Tempela anuoǃnâ kai tsî altars di ǁnâkha ǀā gôagu ǀkha ǁhāǁnâsa ra ǀape. 9 ǁÎn di ǂnīsasib tsî koasensa kō re, î ǁîn ai sa ǁaiba hā kai. Tita ge ǃoataras ǀguisa i, xawe ǀgaiba mā te re, î ta ti ǀapesa dīǂui. 10 Ti gāxaǃnâ ra mîde hoan, ǀhonkhoeb tsî khobon tsîna nî ǃgamse sîsenū. Ab tarekhoes di ǀgaiba ǁîgu di ǂnīsasiba khôaǂkhū. 11 Sa ǀgaib ge toroǂnubis di kaisib tsî ǀgaib ai ǂgomaiǂnûi tama hâ. Sats ge Elots hîa ǃgamǃgamsen rana ǃkhōǂhomi tsî ǁgâiǀāhe rana ra huitsa. Sats ge ǂkhabusa tsî huio khoena mâxōǀkhā tsî ra sâu tsî ǁnān ǂkhabuǂâi rana ra huiǂui. 12 Ti aboxab Simeonni di Elotse, sida ge nē ǃhūba mā Elotse, ǀhommi tsî ǃhūbaib tsîkha di Elotse, ǃāgu tsî hurigu di ǂNubi-aotse, hoaraga kurus di Gao-aotse, toxopa ti ǀgoresa ǁnâu-am re, 13 î di ti gāxaǃnâ mîde ǁnān hîa sa ǃGaeǀhaos, sa ǃanu Tempeli, Sionǃhommi tsî sa khoenats ge mā ǃhūb ǃoagu ge ora xūna ǀapena tsui tsî ǃgam. 14 As sa hoaraga ǁaes tsî mâ ǃhaos hoasa ǁnâu tsî mûǂan, sats a Elo ǃkhaisa. Sats a hoa ǀgaib tsî ǁkhāsib di Elo, tsîts sats ǀguitsa Israelǁaesa ra sâusa.”
© Khoekhoegowab Elobmîs © Bible Society in Namibia, 2020.
