Israelǁî ǃoataras, Judits
1 ǁNā ǁaeb ǃnâs ge Juditsa Usiab di mîǁguib xa ge ǁnâu. ǁÎs ge Merarib di ôa, Oksi ǁnuriǀgôa tsî Josefi kai ǁnuriǀgôa ge isa. Josefi aboxagu ge Osieli, Elkiab, Ananiab, Gideonni, Rafaimi, Ahitub, Elijab, Hilkiab, Eliab, Natanaeli, Salamieli, Sarasadaib tsî Israeli tsîga ge i. 2 Judits aob ge Manaseb, ǁîs di ǃhaos ǁkhāsa xu ge hâ iba. ǁÎb ge ǃhoroǃgaos ǁaeb ǃnâ ge ǁō. 3 ǃHorosîsenaogab ra ǃhoroǃhanagu ǃnâ kōǃgâ hîab ge sores xa kaise ǀgaisase ge daohe tsîb ge ega kharob ai, oms âb tawa Betulias ǃnâ ge ǁō. ǁÎb ge Dotans tsî Balamons tsîra ǁaegu, ǁîb aboxagu ǀkha ǀaokhoen ǀhobas ǃnâ ge ǁkhōhe.
4 ǃNona kurigu tsî haka ǁkhâgu ǁaebas ge Juditsa ǃoatarase ge hâ. 5 ǁÎs ǃoab ǃnâs ge ǁîs oms ǂamǃnâ tentomro-e dībasen tsî ǃoab sarana ana hâse ǁnāpa gere hâ. 6 ǁÎs ge Sabbattsēs aiǃâs tsî Sabbattsēs ais, ǀAsa ǁKhâb ǁÂudīb di tsoatsoas, ǁÂudīb ǂûb di ǁaeb tsî Israelǁaes ǁâudīgu tsî sâtsēdi ǃnâs ǀguis ose, hoaraga ǃoatarasis ǁaeb ǃnâ ǂûtama gere hâ. 7 Judits ge kaise ge îsa i khoes, aob âs xa ge ǃhuniǀurib tsî ǀhaiǀurib, ǃgān tsî khobon, ûitsama xūn tsî ǃhoroǃhanagu ǀkha ǃgorohesa. ǀUmixūn âsa mûǂams ǀkhas ge ge aiǃgû, 8 xawe i ge ǀgui khoe-i tsîna tsū xū-e ǁîs xa ge ǃhoa tama hâ i. ǁÎs ge kaise ge eloǃaoǃgâxa i khoesa.
Judits ge Betulias ǂgaeǂgui-aogu ǀkha ra ǀhao
9 Judits ge mâtin khoena, ǁgam-i di ǀorosib xa ǂkhabuǂâi tsî Usiab ǃoagu gere ǃgae ǃkhaisa ge ǁnâu. ǁKhātis ge Usiab mîǁguib, koro tsēdi khaoǃgâb ǁîba Betuliasa Asiriaǁîn ai nî māǁnâb xas tsîna ge a ǁnâu. 10 Os ge ǁîs oms ǃnâ hâ xūn ai mûǂamsa ūhâ khobosa, ǃās di ǂgaeǂgui-aogu Usiab, Kabrib tsî Karmib hâgas ǁîs oms ǁga nî ǁkhauǂuise ge sî.
11 ǂGaeǂgui-aogu ge hā, os ge ǁîgu ǃoa ge mî: “Toxopa ǃgâ te re, Betulias ǂgaeǂgui-aogo. Nētsē go go khoen ǃoa ǃhoa ǀgaub ge ǃgâi tama hâ. Tā go ge Elob aiǃâ ga nū hâ, ǃāsa go sada khākhoen ai, ǃKhūb ga ǀgūǁaeb ǃnâ huiba mā tama io nî māǁnâ ǃkhaisa. 12 Tare ǂhanu-e go ūhâ, Eloba go nētsē go go dī khami nî ǃâitsâse? Sago a tari, o go ǃKhūb soas ǃnâ khoesi xūn ǃnâ ra mâisen? 13 Sago ge ǃKhūb Hoaǀgaixaba ra ǃâitsâ? Mâti go ǃKhūb ra tare-e ǂâi ǃkhaisa nî ǂan ǁkhā? 14 Sago ge khoe-i ǂgaob ǃgamsib ǃnâ hâna a ǁnâuǃā ǁoa tamas ka io khoe-i ra ǂâi xūna a ǃkhā ǁoa; xawe go ge Elob di ǂâide khomai tsî ǁîde ǁguiǃāsa ra dītsâ! Mâti go Elob, Kuru-aob hoa xūn diba go ra ǁnâuǃā, ti a mî ǁkhā? Hî-î, ti ǃgâsago, tā ǃKhūb, sada Eloba ǁaiǁai. 15 Elob ge sao ra koro tsēdi ǃnâb ga sada huiǂui tama i, xawe ǁîb ga ǂgao ǁaeb hoab ai a huiǂui da ǁkhā. ǁÎb ge khākhoen mâ tsî ra kō da hîas tsîna hîkākā da ǁkhā. 16 Tā ǃKhūb sada Eloba ǂgaoǀkhāde xoaǁguiba. Sada di ǀgui-i khamib ī ti go ǂâi hâ? ǃKhūba go nî ǁgoaǂui tamas ka io ǃnoesaseb mîǀguiba nî ū ǃkhaisa ǁgari, ti go ǂâi hâ? 17 ǁNā-amaga da ge Elob ai huiba ǂgan tsî ǃnūǃnâxase ǁîb nî huiǂui da ǃkhaisa nî ǃâu. ǁÎb ga huiǂui da ǂgao, ob ge sada ǂgans ai nî ǃeream.
18 “ǀGui khoe-i tsîn ge sada ǃhaodi, ǃhaoǃnādi, ǀkharigu tamas ka io ǃādi ǃnâ, khoen xa kuruhe hâ elona ǀgoreǀî tama hâ, sada aboxagu ge ǃkharu ge ǁaegu ǃnâ ǁnāti gere dī xawes tsîna da ge ti dī tama hâ. 19 ǁNā-amagab ge Eloba sada aboxaga ǁîgu khākhoena ge māǁnâ, ǃgamhe gu nîse tsî ū gu ge hâ i xūn hoana gu nî ūǀhanahese. Nēb ge ge kai ǂōǂōsi i. 20 ǀNî elo-i xare-e da ǀgoreǀî tama tsî ǃKhūb sada Elob ǀguiba ra ǀgoreǀî, xui-ao da ge sada tsî naun sada ǃhaos din tsînab aoxū tide ǃkhaisa ra ǂgomǃgâ.
21 “Sada ǃās ga khākhoen xa ūhe, ob ge hoaraga Judeab tsîna ǁkhāti nî ūhe tsîb ge sada Tempeli Jerusalems ǃnâ mâba nî ǃnariǂuiǃnâhe. Ob ge Eloba nî dī, sada ǃaromab ge Tempela ǃanuoǃnâ kaihe, ǃkhais ǃaroma da sada ûigu ǀkha nî matare ǃkhaisa. 22 Sada ge sada khoen di ǃgamhes, ǃkhōsis ǃnâ ūhes tsî sada ǃhūb hîa da ge ǀumib di hîkākāhes di ǃereamsa nî tani. Tsî da ge khobose da ǁîde xa ūhe ǃhaodi xa ǃharaxūhe tsî nî ǃhōhe. 23 Sada khākhoena da ga māǁnâsen, xawe da ge ǁîn xa ǃgâidīhe tide. Māǁnâsen da ka, ob ge ǃKhūb sada Eloba taotaohe da nî ǃkhaisa nî mûǂam. 24 Hî-î ti ǃgâsago, a da aiǁgausa sada ǂhunuma khoena mā. ǁÎn di ûigu ǀguigu oseb ge ǁkhāti Tempeli tsî altars tsîra di ǃgomsib tsîna sada ai hâ. 25 Hoa xūn ǂamai a da ǃKhūb sada Elob hîa sada aboxagab ge ǃâitsâ khami sada tsîna ra ǃâitsâba gangan. 26 ǂÂi-oa re mâtib ge Abrahammi ǀkha dī tsî mâtib ge Isaka ǃâitsâ tsî tare-i ge Jakob ǀkha Mesopotamiab ǃnâ, ǁîb omeb Labanni gūnab ra ǃûi hîa ī ǃkhaisa. 27 Elob ge sada ǂgomǂgomsasiba, ǁîgab ge ǃnāsase ǃâitsâ khami ǃâitsa tama hâ. Elob ge nē ǁkharaba sada ǃoa sadab nî ǀkhao ga sî tama, xawe sada ǁîba ra ǀgoreǀîdab nî ǃnapeǃnapeǃnâse ge sî.”
28 Ob ge Usiaba ǁîs ǃoa ge mî: “Hoa xūn sas go mîn ge ama ǂgaoba xu ra ǂoaxa tsî i ge ǀgui-i tsîna sa mîde a ǂnoaǃoa ǁoa. 29 Nēs ge ǂguro ǃnā tamasa sas nēti gā-aise ra ǃhoasa, xawe ǂkhams ge i ǁaeba xun ge khoena sa mîǁguib hugaǀgui gā-ai tsî ǂhanu ǃkhaisa gere mûǂan. 30 Xawen ge khoena ǁgâs xa ra ǁō. ǁÎn ge sige, khôaheǁoasa nūsa ge nî dīs ǃoa ge ǁgari. 31 Kaise eloǃaoǃgâxa taras ge sasa, xuige hoaraga khoen nē ǃās dina ǀgoreba re, î ǃKhūba ǂgan re, îb sada tsaugab nî ǀoaǀoase ǀnanuba sîba da, î da sada ǀgaiga ǁkhawa hō-oa ǁkhā.”
32 Os ge Juditsa ǁîgu ǃoa ge mî: “ǃGâ re, tita ge hoaragase ǀō-aisa xū-i, sada ôananôagub hugaǀgui ǂâis ǃnâ nî ūhâ-e nî dī. 33 Nēǃoe go ge sa ǃnonago ǂgâdaos tawa nî ǃûimâ, î ta ti khobos ǀkha ǃnorasase ǃāsa xu ǂoa ǁkhā. Tsî ǁnā tsēs, sago Asiriaǁîn ai nî māǁnâsens, aiǃâb ge ǃKhūba tita Israelǁaesa ta nî ǃnoraǃnorase nî sîsenū. 34 Xawe tā tare-e ta nî dī ǃkhaisa ǂan ǂgao. Hoan ga ǃkharu, o ta ge nî mîǃāba go.”
35 O gu ge Usiab tsî nau ǂgaeǂgui-aoga ǁîs ǃoa ge mî: “Sige ǀkhaebas ge ūhâ, ab ǃKhūb Eloba aiǃgûba si tsî sada khākhoena ǁkhara.” 36 O gu ge Judits tentoms, oms ǂamǃnâ ge hâ isa xu ǂoa tsî ǁîgu gere ǃûi ǃkhaigu tawa ge sī mâ.
© Khoekhoegowab Elobmîs © Bible Society in Namibia, 2020.
