Judits 4 - Khoekhoegowab New Translation 2020 (KKG20)

Israelǁîn ǀapeǁguib, ǁkhaubasens ǃaroma

1 Judab ǃnâ ge hâ i Israelǁîn ge Asiriab gao-aob Nebukadnesari di toroǂnubis ǂgaeǂgui-aob Holoferneb ge tare-e nau ǁaedi ǀkha dīs, tsî mâtib ge ǁîna ǀhana tsî hoaraga Tempelgu âna hîkākā ǃkhaisa ge ǁnâu. 2 ǁNā-amagan ge tare-eb Jerusalems tsî ǃKhūb, ǁîn Elob Tempeli ǀkha nî dī ǃkhaisan gere ǂâi, o kaise ǃao tsî gere ǀkhū. 3 ǁÎn ge ǀgūǁae ǀgui Judab ǃoa ǃkhōsisa xu ge oahā hâ i tsîn ge hoaraga khoena ǀasase nēpa ge ǀhaoǀhaohe hâ i. Tsîn ge ǃanu xapan, altars tsî Tempeli tsîna ǃgôaoǃnâ kaihen ge hâ is khaoǃgâ ge ǃanuǃanu. 4 ǁNā-amagan ge ǃkhâikhom-e hoaraga ǀkharib Samariab dib tsî ǃādi Konas, Bet-Horons, Belmains, Jerixos, Kobas, Aesoras tsî Salems ǃgoaǃnāgu ǃoa ge sîǂui. 5 ǁÎn ge ǁnātimîsi ǃhomgu ǀgapisega ǃnamiǂgā, ǃhomgu ai ǂnôa ǃāde ǀgaiǀgai tsî torob ǃaroma ge aiǂhomisen. ǁÎn ge ǀnain ge ǃhoroba ǃgao hâ i xui-ao ge ǃgâiǃgâ i tsî ǁnā-amaga ǂûna ge sâubasen.

6 ǀGapipristeri Joakimmi, ǁnā ǁaeb ai ge Jerusalems ǃnâ hâ ib ge Betulias tsî Betomestaims, Jesreelǃgoaǃnāb Dotans ǀgūse ǁgoegu ǃnâ ge hâ i khoen ǃoa sîǂkhani-e ge xoa. 7 ǁÎb ge ǁîna ge mîmā, în ǃhomgu ǁaegu hâ ǃkharuǃkhaidi, Judab ǃhūb ǃnâts ǁîdi ǃnâ-u ǀgui ǃkharu ǁkhāde ū, supusen ǁnāǂamaona nî mâǃoa ǁkhāse, nē ǂgâdaorogu ge ǂō i tsîn ge ǀgam khoen ǀguina ǀgui ǃnās ai ǁnāpa-u ǃkharu ǁkhā i xui-ao. 8 Israelǁaes ge mîmādi ǀgapipristeri Joakimmi tsî nau ǂgaeǂgui-aogu, Jerusalems ǃnâ ge ǀhao hâ igu ge māde ge sîsenǂui.

Torob aiǃâ hâ ǀgores

9 Israelǁaes ǂgaeǂgui-aogu ge ǀgaisase Elob ǃoa ǀgore tsî ǁae-i ǀgaiba ǂûtama* ge hâ. 10 Tsî i ge ǃhūb ǃnâ hâ-i hoa-e ǃhausens ǁgauǁgaus ase ǃoab saraba kamanagu ai ge ǃgae; aogu, taradi tsî ǀgôan, ǁkhāti ǃhaokhoen, khobon tsî ǃgān tsîn hoana. ǁKhātin ge ǃoasarana ûitsama xūn ais tsîna ge ǃgae. 11-12 ǁÎn ge ǁkhāti altarsa ǃoasarab ǀkha ge ǃgū-ai. ǁNās khaoǃgân ge hoaraga aogu, taradi tsî ǀgôan, Jerusalems ǃnâ ge hâ in hoana, ǃoab saran ǃnâ tsî tsaob ǀkha tsorosen hâse ǃanu ǃkhaib ai aisǂama ǃhūb ai, ǃKhūb aiǃâ ge ǁnāǁgoe. ǁÎn ge ǀhûpe ǀaexase Israelǁaes Elob ǃoa ǀgore tsî gere ǀkhoma, îb tā mā-am ǁîn ôana ǃkhōsis ǃnâ ūhe, tarade ǃgû-ūhe tsîdi ǁîn ǁgûsi ǃāde nî hîkākāhe ǃkhaisa. ǁÎn ge Eloba ge ǀkhoma îb tā Jodeǁî tamana Tempela hîkākā tsî ǃgôaoǃnâ kaisa mā-am. 13 Elob ge ǁîn ǀgorede ǁnâu tsî ǁîn ǀhūsib tsîna ge mû. ǂGui tsēden ge Judab tsî Jerusalems khoena, Hoaǀgaixa ǃKhūb di Tempeli aiǃâ, ǂûtama* hâs ǀkha ge aiǃgû. 14 ǀGapipristeri Joakimmi, pristergu tsî ǀnîgu ǃKhūb Tempeli ǃnâ gere ǃoabagu ge tsēkorobe khauǁguibadi, khoen māǂgaoxasib ǁguibadi tsî nūsan nî dīǀoaǀoase gere dīhe ǁguibade gu gere dīo, ǃoab sarana gere ana. 15 ǁÎgu ge tsaoba ǃkhaiǀgapadi ai tsoro tsî Eloba ǀgores ǃnâ ǂgaiǀî tsî gere ǀkhoma, îb hoaraga ǁaesa ǀkhomxa.