Huriǂoas ǃnâ hâ ǁaedi ǃoagu hâ torob
1 Disiǁkhaisaǀaǁî kurib Nebukadnesari ǂgaeǂguis dib di ǀgamdisiǀgamǀaǁî tsēs, ǁnā kurib di ǂguro ǁkhâb dis ai gu ge ǁîb tsî ǁîb ǀapemā-aogu tsîga ǁîb di ǁgoaǂuis nî sîsenǂuihe tsî ǁîba huisa ge ǂkhā ǃhūgu hoagu nî ǀkhaohe ǃkhaisa ge mîǁgui. 2-3 ǁÎb ge ǁîb hoaraga danakhoega ǂgaiǀhao tsî ǁîgu ǀkha ǂkhaba xūn, nē khoen gere dīna ǀgoragu tsî ǁîga ǂōrisase mâti gu ge ǁnā ǃhūga ǁîba ǀapexū ǃkhaisa ge ǃnuriba. ǁÎb tsî ǁîb danakhoegu ge ge gao-aob mîmāde ǁnâuǀnamoǃnâ-i hoa-i nî hîkākāhe ǃkhaisa mîǀgui. Tsîb ge ǁîga ǃkhams ǀapeǁguiba ge mîǃāba.
4 ǂNûs ge ǂganam, ob ge Nebukadnesara ǁîb ge toroǂnubis di ǃkhōdana-ao tsîb ǀgamǁî ǃharos ai gao-aob ǃnaka ǂnôa i xui-ao sao ra mîmāsa Holoferneba ge mā. 5 “Tita Nebukadnesarta, kai gao-ao tsî hoaraga ǃhūbaib ǂgaeǂgui-aota ge ra mîmā tsi, îts ǀguikaidisiǀgamdisiǀoadisi ǀnūtoroǃkhamaogu tsî disiǀgamǀaǀoadisi hātoroǃkhamaogu ǂansa ūhâgu tsîna ǁhûi. 6 Huriǂoasǀkhāb di ǃhūgu hoaga ǁnāǂam, tita ge ǁîgu huiba ǂgan, xawe gu ge ǂkhā amaga. 7 ǁÎna ǃkhâikhom în ǂhomisen tsî ǁîn ǃhūb tsî ǁgam-i tsîna ǂgaoǀkhāoǃnâse māǁnâ. Tita ge ti ǀoasa, ǀgaisa ǁaib ǀkha ǁîn ǃoagu khâi tsî ǁîna hoaragase nî hîkākā. Ti toroǂnubis ge mâ ǃkhais ǁîn ǃhūb dis hoasa ǃgûǃnâǃganu tsî ǃgûgaruse nî hîkākā. 8 ǁÎn di tsuihe hân ge ǃgoaǃnāga nî ǀoaǀoa tsîb ge ǁō hâ sorodi mâ ǃārob tsî ǃāb hoaba ra ǁkhae xui-ao ǃhūba nî dâuǃkhūhe. 9 Ûitsamase ga ǃgauna ta ge ǃkhōsis ǃnâ ū tsî hoaraga ǃhūbaib ǃnâ nî ǀgaruǀgaru.
10 “Xawe ta ge sats, Holofernetsa ra mîmā, îts ti aiǃâ ǃgûǂoa tsî ǁîn di hoaraga ǃhūba ū. Tsîn ga sa ǃnâ mâsen, o ǁîna ūhâǀgaraba te, sī tsî ta ǁîna nî ǁkharas kōse. 11 Xawen ga ǂkhā tsî māǁnâsen tama io, o tā ǁîna ûi kai. ǁÎna ǃgam, î ǁnā hoaraga ǃhūb hîats nî ǂgaeǂguib di ūhâxūna ǁkhâuǁnâ. 12 Amase ta ge ûi tsî ta nē ǀgaisa gaosiba ra ǂgaeǂguis kōse mîǁgui ta gena nî dī. 13 Tā ǀgui ǀgau-i tsîn ai tita ǁnâuǀnamoǃnâ. ǂÂis ǃnâ ūhâ tita sa gao-ao ǃkhaisa, î ǀhabe tamase tita ge mā tsi mîmāsa sîsenǂui.”
Holoferneb ge Nebukadnesari mîmāde ra dī
14 Ob ge Holoferneba gao-aoba xu ǃgû tsî hoaraga ǃkhōdana-aogu, danakhoegu tsî toroǂgaeǂgui-aogu Asiriab toroǂnubis diga ge ǂgaiǀhao. 15 Gao-aob ge mîmā khamib ge ǀguikaidisiǀgamdisiǀoadisi ǀnūtoroǃkhamaogu tsî disiǀgamǀaǀoadisi hātoroǃkhamaogu ǂansa ūhâga ǁhûi 16 tsî ǁîga torob ǃaroma ge aiǂhomi. 17 ǁÎb ǀkhab ge ǁkhāti kaise kai ǃgôab di ǃnain, dâukin tsî mulin tsîna ǂhâǂhâsa xūnab nî ǃnao-aise ū tsî ǁkhāti ǂgui gūn, goman tsî pirina ǂûn ase ge ūsao. 18 Mâ toroǃkhamaob hoab ge ǂgui ǂûn tsî kai ǀnōb ǃhuniǀurib tsî ǀhaiǀurib tsîna gao-aosi ǁuiǂgaesa xu ge ǃkhōǃoa.
19 Holoferneb tsî ǁîb hoaraga toroǂnubis ge hākunidi, hātoroǃkhamaogu tsî ǀnūtoroǃkhamaogu ǀkha Ninevesa xu, hoaraga huriǂoas ǀkharibab nî hîkākāse dāǁnâ, ob ge gao-aob Nebukadnesara ge hâ-oa. 20 ǀNî ǂgui khoen tsîn ge ǁîgu ǀkha ge ǃgû. ǁNātikōsen ge ge ǂgui i tsîs ge ǁîna ǃgôasa ge īǁoasa i. ǁÎn ge doegaru ǂhomn tamas ka io ǃgaroǃhūb di ǃhūb khami ge ǂgui i.
21 ǃNona tsēde gu Ninevesa xu ǃgû hâs khaoǃgâ gu ge Bektilets ǂnamipe, Silisiab di ǀapas ǃnâ, ǃhomgu ǀgūse ǁgoe ǂgāgu tawa hā tsî ǁnāpa tentomde ge ǂnaumâi. 22 ǁNāpa xub ge Holoferneba hoaraga toroǂnubis, ǀnūtoroǃkhamaogu, hātoroǃkhamaogu tsî hākunidi tsîna ū tsî ǁnā ǃhomxa ǀkharib ǃnâ ge ǃgûǂoa. 23 ǁÎb ge hoaragase Libiab tsî Lidiab di ǀkhariga hîkākā tsî ǁnās khaoǃgâ hoaraga khoen Rasis din tsî Ismaelǁîn, ǃgaroǃhūb ǃkhawagas ǃnâ ge Seleanǁîn di ǃhūb amǃgâ ǁan hâ ina ge hîkākā.
24 ǁNās khaoǃgâb ge Holoferneba Eufratǃāba ǃgâu, Mesopotamiaǃhūb ǃnâ-u ǃkharu tsî hoaraga omǂnamisa ǃādi Abronǃāb xōǀkhā ǁgoede hurib tawas kōse ge hîkākā. 25 ǁÎb ge Silisiab ǀkhariba ǁkhâuǁnâ tsî mâǃoa bi ra-i hoa-e gere ǃgam. ǁNāpa xub ge Jafeti ǃhūb ǃkhawagas di ǃhūǀgoras, Arabiab ǀgūse ǁgoes kōse ge ǃgû. 26 ǁÎb ge Midiaǁîna xāǂgā, tentomdi âna ǂhubiǁnâ tsî gūn âna ge ǂā.
27 Holoferneb ge Damaskus ǂnamipe ǁgoe ǂgāgu ǃoa ǃhoroǃgaos ǁaeb ǃnâ ǃgû tsî hoaraga ǃhoroǃhanaga ge ǂhubiǁnâ. Tsîb ge ǀgoan tsî goman tsîna ǂā, ǃāde ǀhana, hoaraga ǀkhariba hîkākā tsî hoaraga ǂkham khoega ge ǃgam. 28 ǃAob ge hoaraga khoen Mediteraneahurib xōǀkhā ge ǁan hâ ina ge hāǂam tsîn ge ǃaob xa gere ǀkhū. Tirus, Sidons, Surs, Osinas, Jamnias, Asotus tsî Askelons tsîdi ǃnâ ge ǁan hâ khoe-i hoa-i ge kaise ge ǃao hâ i.
© Khoekhoegowab Elobmîs © Bible Society in Namibia, 2020.
