Israelǁîn di dans
1 Tentomdi ǃnâ ge hâ i Asiriaǁî toroǃkhamaogu ge nē ǃkhaisa gu ge ǁnâu, o kaise ǃhuri 2 tsî ǃaob xa gere ǀkhū. ǁÎgu hoagu ge hâǃkhaiba xu, ûiǂoa gu nîse ǃkharaga ǀkhāgu ai, ǃhomgu ǃoa tsî ǂgāgu ǃnâ, ǃâugu tamase ge ǃkhoeni. 3 Betulias ǂnamipe ǁgoe ǃhomgu ǃnâ ge hâǃkhaiba ǂnaumâi hâ i toroǃkhamaogu tsîn ge ge ǃkhoeni. O gu ge hoaraga Israelǁîtoro-aoga ǁîga ge sauru.
4 Usiab ge sîsabega Betomestaims, Bebais, Kobas, Kolas tsî hoaraga Israelǁîǃhūb ǃoa ge sîǂui, î gu tare-i go ī ǃkhaisa khoena mîba tsî ǂgaoǂgaoǃnâ, în ǁîn khākhoena sauruǃgon tsî hîkākā. 5 Israelǁîn ge nēsa ǁnâu, on ge ǀgui ǃnās ama ǁîn di khākhoena ǁnāǂam tsî ra ǃgamse, Kobas kōse ge sauruǃgon. Jerusalems khoen tsî ǀnîn hîa ge ǃhomgu ǃnâ ǁan hâ in tsîn ge nē haisi-ams, Asiriaǁîn tawa i go tare-e ī ǃkhais disan ge ǁnâu, o nē ǃkhams ǃnâ ge ǁhao. Gileadi tsî Galileaǀkharib tsîkha di khoen ge ǁhai ra Asiriaǁîn di daoga mâǁkhae tsî ǂguin ǁîn dina ge ǃgam. ǁÎn ge Asiriaǁîna ǀûs ose, Damaskus nauǀkhāb kōse ge sauru.
6 Betulias ǃnâ ge ǃgau khoen ge Asiriaǁî toroǃkhamaogu di hâǃkhaiba ǁnāǂam tsî hîkākā tsî ǃkhūkaisenn nîga ǂâusa xūna ge tanibē. 7 Tsî gu ge Israelǁî toroǃkhamaoga toroba xu gu ge oahā, o ǃgau ge hâ ina ge ūbasen. ǁNāpan ge kaise ǂgui xūna ge hâ i tsîn ge ǃhomxa ǀkharib di ǃādi tsî ǃārodi di khoen tsîna nē ǁkhâuǁnâsa xūna xu ge ǀgorabahe.
Israelǁaes ge ǁîn dans ǂama ra ǃgâiaǂgao
8 O gu ge ǀgapipristeri, Joakimmi tsî Israelǁaes di kaigu, Jerusalems ǃnâ ge ǁan hâ iga, Elob ge Israelǁaesa dība ǃgâi xūna hā mû tsî gu Judits ǀkha ǀhao tsî ǁîsa ǃgâiǃgâba nî ǁkhorebase ge sī. 9 Tsî gu ge ǁîs ǀkha gu ge ǀhao, o ǀguiǂâixase ǁîsa koa tsî ge mî: “Sas ge Jerusalemsa kai ǃgôasiba ge hā-ūba, tsîs ge Israelǁaes di ǃgari-ao tsî sada ǁaes di kai ǂnīsasi tsî a dâ. 10 Sas ge ǀguri Israelǁaesa nē kai dansa ge mā. Elob Hoaǀgaixab ge sas ge dīn ǀkha ge ǂkhîǂâixa i. Ab Hoaǀgaixa ǃKhūba ûis hâs kōse ǀkhae si re!” On ge hoaraga khoena “Amen” ti ge mî.
11 Asiriaǁîgu di hâǃkhaiba hîkākās ge ǃnonadisi tsēde ge ǃkhōǂgā. ǁÎn ge Juditsa Holoferneb di tentoms tsî hoaraga ǀhaiǀuri xapan, ǁîb kharogu, ǃoredi tsî ǁîb di xūn tentoms ǃnâ ge hâ in hoana ge mā. ǁÎs ge hoaraga xūna ū tsî ǃnao ǁkhās as kōse ǁîs di mulib ai ge ǃnao. Tsîs ge kunidi âsa ǀkhī-ū kai tsî ǁîdi tsîna ge ǃnaoǀoa. 12 Israelǁaes di tarekhoedi hoadi ge ǁîsa nî mûse ǀhao, ǁîsa ǀkhae tsî ǁîs di ǃgôasib ǃaroma gere ǂnā. Nē dâxa tsēs ai di ge Judits tsî nau khoedi tsîde ǃkhādi xa hâ-aihe ǁnâuga gere sabu 13 tsî di ge hoade ǀkheraǂhonagu ǀkha kurusa kronde ge ǀgapa hâ i. Judits ge khoede ra ǂgaeǂguise aisǀkhāb ai gere ǂnā. Hoaraga khoegu Israelǁaes digu ge ǁîde, ǃkhādi ǀkha kurusa kronde ǀgapa, ǁîgu ǁâtanina tani tsî ǁnaetsanade ra ǁnaese ge sao.
© Khoekhoegowab Elobmîs © Bible Society in Namibia, 2020.
