Simsonni tsî Timnas di khoes
1 ǀGuitsēb ge Simsonna Timnas ǁga ge ǃgû, tsîb ge ǁnāpa Filisteǁî khoesa ge mû. 2 Ob ge oa tsî ǁîb îra sī ge mîba: “Timnas ǃnâ ta ge Filisteǁî khoesa go mû. ǁÎsa ro sī ūba te re, ǁîsa ta ra ǃgame ǂgao xuige.”
3 Xawe ra ge ǁîb îra ge dî bi: “Tare-i ǃaromats kha ǁnā ǀūbe Filisteǁîn ǃoa tara-ets sī nî ôase nî ǃgû? Sa ǀaokhoen tsî sa ǃhaos ǂûs di khoen ǃnâ i kha ǂkham tarekhoe-e a ǀkhai?”
Xaweb ge Simsonna ǁîb îb ǃoa ge mî: “ǁÎsa tarase ūba te re, tita ge ǁîs xa a ǃgâibahe xuige.”
4 ǁÎb îra ge ge ǀū i, ǃKhūb Simsonna nē ǃkhaisa ra dī kaisa, ǃKhūb ge Filisteǁîn ǃoagub nî ǃkham soa-e gere ôa xui-ao. ǁNā ǁaeb ǃnân ge Filisteǁîna Israelǁîn ǂama gere gaosîsen.
5 On ge Simsonni tsî ǁîb îra tsîna Timnas ǁga ge ǁgôa. ǁNāpan draibeǃhanagu ǃnâ-u garu hîab ge ǂkham xamma ǃgui rase Simsonna ge ǃkhoeǂnôa. 6 Ob ge ǃKhūb di gagaba Simsonna ge ǀgaiǀgai tsîb ge xamma ǃomkha âb ǀkha ge ǀkhauǃā, īseb a piriro xū-i khami. Xaweb ge ǁîb îra tare-eb go dī ǃkhaisa mîba tama ge i.
7 Tsîb ge ǃgû tsî taras ǀkha sī ge ǃhoa, tsî ǁîs xa ge ǃgâibahe. 8 ǁAe-i khaoǃgâb ge Simsonna ǁîsab nî ǃgamese ǁkhawa ge hā. Ob ge daoba xu ge ǃgûǁgôa, xammi hîab ge ǃgam hâ ibab sī nî kōse. Tsî ǁnāpab ge sī, ob ge ǂgui ǃhabun tsî dani-i tsîna ǁō hâ soros ǃnâ ge hō. 9 Ob ge dani-e ǃomkha âb ǃnâ ū tsî ǃgû garuse gere ǂû. Tsîb ge ǁîb îra tawa sī tsî ǁîra tsîna ge mā tsîra ge ge ǂû, xaweb ge ǁîra ǁō hâ xammi di sorosa xub go ǁî-e ūǂui ǃkhaisa mîba tama ge i.
10 ǁÎb îb ge ǁnā khoes di oms tawa a sī, ob ge Simsonna ǂûǁare-e ge dī. Nēb ge ǂkham khoegu di ǁnaeti ge iba. 11 Filisteǁîn ge ǁîban ge mûo, ǃnonadisi ǂkham khoega ǁîb ǀkha ge hâ kai. 12 Ob ge Simsonna ǁîgu ǃoa ge mî: “A ta ǀūro-e dî go re. Mâb sago dib hoaba ta ge tsaura lapin ǀkha ǂomsa sarab tsî noxopa ǀnî sarab anaǃkhunib nîb tsîna nî mā ǃereamsa go ga hû tsēdi ǃgameb aiǃâ hâdi ǃnâ a mā teo. 13 Xawe ǃeream ǁoa go kao, ob ge mâb sago dib hoaba tsaura lapib ǀkha ǂomsa sarab tsî noxopa ǀnî sarab anaǃkhunis dib tsîna tita nî mā.”
O gu ge ǁîga “Mîba ge re. A ge ǁnâu re” ti ge ǃeream.
14 Ob ge Simsonna ge mî:
“ǂÛ-aoba xu i ge ǂûhe nî xū-e ge hā;
ǀgaisaba xu i ge ǂkhon xū-e ge hā.”
ǃNona tsēdi khaoǃgâ gu ge noxopa ǃeream ǁoa i.
15 Hûǁî tsēs ai gu ge ǁîga Simsonni di taras ǃoa ge mî: “Sa aoba ǃhoaǁnâdana îb ǀūros di ǂâibasensa mîba ge. ǁNāsas ga dī tama i, o ge ge sas tsî sa ǀaokhoen tsîdo nî ǂhubiǂui. Sige ro xūn âge nî ūǀhanaga ra kha sige go ǁkhau?”
16 Os ge Simsonni tarasa ā rase ǁîb tawa sī tsî ge mî: “Sats ge ǀnam tama hâ. ǁKhan tes ǀguisats hî hâ. Sats ge horega ǀūrosa dî tsî xawe tita ǂâibasens âsa mîba tama hâ.”
Ob ge ǁîba ge mî: “Kō, ti îra xawe ra ta ge ǁîsa mîba tama hâ. Tare-i ǃaroma ta sasa nî mîba?” 17 ǁÎs ge hû tsēdi ǁâudīb didi hoade ǁnās ǂama ǁîb ai gere ā. Ob ge hûǁî tsēs ai ǀūros di ǂâibasensa ge mîba si, kaises gere ǂgaoǀkhā bi xui-ao. Tsîs ge ǁîsa Filisteǁîga ge mîba. 18 O gu ge ǃās di aoga hûǁî tsēs ai, sores di ǂgâs aiǃâ Simsonni ǃoa ge mî:
“Tare-e dani-i ǃgâ-ai a ǂkhon?
Tare-e xammi ǃgâ-ai a ǀgaisa.”
Ob ge Simsonna ge ǃeream:
“Ti tsâus ǀkha go ga ǃhūǃgao tama hâ,
o go ga ǃereamsa nēsi ǂan tama hâ.”
19 ǃNapetamaseb ge ǃKhūb di gagaba Simsonna ge ǀgaiǀgai, tsîb ge Askelons ǁga ǃgû tsî ǃnonadisi khoega ǃgam, ǁîga ǁhûǀkhā tsî ǁîgu di sarana ǁnā khoegu ǃereamsa ge mā biga ge mā. ǁÎb ge kaise nē ǃkhais xa ǁaixa hâse ǁîb îb di oms ǁga ge oa, 20 tsîs ge ǁîb tarasa ǁîb ǃgameb di ǁnū-ao ge i khoeba ge māhe.
© Khoekhoegowab Elobmîs © Bible Society in Namibia, 2020.
