1 Jeftab ge ǁkhoaǂgaoxa toroǃkhamaob Gileadi dib di îs ge ǀai-ao ge isa. ǁÎb di îb Gileadi 2 ge ǀnî ǀgôaga taras âb tawa ge ūhâ i, tsî gu ge ǁnā ǀgôaga kai gu geo, Jeftaba ge ǃhaebē. ǁÎgu ge ǁîb ǃoa ge mî: “Sats ge ǀgui xū-i tsîna sige îba xu ǀumi tide; sats ge ǀkhara taras di ôatsa.” 3 Jeftab ge ǃgâsagu âba xu ǃhū tsî Tobǃhūb ǃnâ sī ge ǁan. ǁNāpa gu ge xūtama khoega ǁîb tawa ǀhaoǀhaosen tsî ǁîb ǀkha gere ǃgûma.
4 ǁAe-i khaoǃgân ge Amonǁîna Israelǁîn ǃoagu ge torodī. 5 Nē ǃkhais ge ī, o gu ge Gileadi di ǂgaeǂgui-aoga Jeftaba gu sī nî ūse Tobǃhūb ǁga ge ǃgû. 6 Tsî gu ge ǁîb ǃoa ge mî: “Satsa hā ǂgaeǂgui ge re, î ge Amonǁîn ǃoagu sī ǃkham ǁkhā.”
7 Xaweb ge Jeftaba ge ǃeream: “Sago ge tita ǁnātikōse ge ǁkhan tsî ti îb di omsa xu ge ǃhaebē. Tare xū-i ǃaroma go nēsi ǂōǂōsib ǃnâ du go ǂgâo, tita ǃoa ra hā?”
8 O gu ge ǁîga Jeftab ǃoa ge mî: “Sige ge nēsi satsa ǃoa go hā, sige ǀkha ǃgû tsîts Amonǁîn ǃoagu sī ǃkham tsî Gileadi di khoen hoana nî ǂgaeǂguisa ge ra ǂgao amaga.”
9 Ob ge Jeftaba ǁîgu ǃoa ge mî: “Tita go ga oa-ū Amonǁîn ǃoagu ta nî ǃkhamse tsîb ga ǃKhūba dansa a mā te, o ta ge nî sadu di ǂgaeǂgui-ao kai.”
10 O gu ge ge ǃeream: “ǁNāti i ge nî ī. ǃKhūb ge a sage di ǃkhō-amao.” 11 Tsîb ge Jeftaba Gileadi ǂgaeǂgui-aogu ǀkha ge ǃgû, tsîs ge ǁaesa ǁîba ǁîn dana tsî ǂgaeǂgui-aose ge mâi. Jeftab ge ǁîb di mî xūn hoana Mispas tawa ǃKhūb aiǃâ ge ǁguiǃā.
12 ǁNās khaoǃgâb ge Jeftaba sîsabega Amonǁîn di gao-aob ǁga ge sî, ǁîba gu nî dîse: “Tare-i ǃaromats sida ǃoagu ra torodī? Tare-i ǃaromats sida ǃhūba ǁnāǂam?”
13 Ob ge Amonǁîn di gao-aoba Jeftab di sîsabega ge ǃeream: “Israelǁîn ge Egipteba xun ge hāo, ti ǃhūba ge ū, Arnonǃāba xu Jabokǃāb tsî Jordanni tsîkha kōse. ǁÎba nēsi ǂkhîb ǃnâ mā-oa te re.”
14 Jeftab ge ǁkhawa sîsabega Amonǁîn di gao-aoba ǃoa ge sî, 15 î gu sī mî: “Israelǁîn ge Moabǁîn di ǃhūb kas, Amonǁîn di ǃhūb kas hoasa ū tama hâ. 16 Israelǁîn ge Egipteba xun ge doeǂoao, ǃgaroǃhūb ǃnâ-u ǀApahurib kōse ǃgû tsî Kades tawa ge sī. 17 Tsîn ge sîsabega Edommi di gao-aob ǁga ge sî, ǁîb di ǃhūb ǃnâ-u ǃkharusan nî mā-amhega; xaweb ge Edommi di gao-aoba ǁîna mā-am ǂgao tama ge i. ǁÎn ge ǁkhāti Moab di gao-aob tsîn ai ge ǂgan, xaweb ge ǁîb tsîna ǁîb di ǃhūb ǃnâ-u ǃkharusa ǁîna mā-am tama ge i. On ge Israelǁîna Kades tawa ge hâ. 18 ǁNāpa xun ge ǃgaroǃhūb ǃnâ-u ge doe, Edommi di ǃhūb tsî Moab di ǃhūb tsîkha xōǀkhā, Moab di aiǂoasǀkhāb ain ge Arnonǃāb nauǃani a sīs kōse. Tsîn ge ǁnāpa hâǃkhaiba ge dībasen, xawen ge Arnonna ǃgâu tama ge i, ǁîb ge Moab di ǃhūǀgora i xui-ao. 19 On ge Israelǁîna sîsabega Amorǁîn di gao-aob Sihonni, Hesbons dib ǃoa sî tsî ǁîba ge ǂgan în ǁîb di ǃhūb ǃnâ-u ǁîn di ǃhūb ǃoa ǃkharusa mā-amhe. 20 Xaweb ge Sihonna Israelǁîna ǁnāsa mā-am tama ge i. ǁÎb ge ǁîb di toroǂnubis hoaragasa ǀhaoǀhao, Jahas tawa hâǃkhaiba ǂnaumâi tsî Israelǁîna ge ǁnāǂam. 21 Xaweb ge ǃKhūb, Israelǁîn di Eloba Israelǁîna Sihonni tsî ǁîb di toroǂnubis ǂama dansa ge mā. ǁNātin ge Israelǁîna Amorǁîn ǁnāpa ge ǁan hâ in di ǃhūb hoaragaba ge ū. 22 ǁÎn ge Amorǁîn di ǀkharib hoaragaba ge ū, Arnonni ǃkhawagas ǃnâ ǁgoeba xu Jaboki ǀapas ǃnâ ǁgoeb kōse, tsî ǃgaroǃhūb huriǂoas ǃnâ ǁgoeba xu Jordanni aiǂoas ǃnâ ǁgoeb kōse. 23 ǁNātib ge ǃKhūb, Israelǁîn di Eloba, ǁîb di khoen Israelǁîn ǃaroma Amorǁîna ǃhūb âna xu ge doeǁgaǂui. 24 ǁÎba du nēsi ra ū-oa ǂgao? Sadu elob Kemosi ge mā duba du ge a ūhâbasen ǁkhā, xawe sida ge ǃKhūb sida Elob ge mā dan hoana nî ūǀgarabasen. 25 Sipori di ôab Balaki, Moab di gao-aob xats a ama-ai tits ra ǂâi? ǁÎba Israeli ǃoagu ǂkhawa-i tamas ka io toro-e dīb ge? 26 ǃNonakaidisi kurigan ge Israelǁîna Hesbons tsî Aroers tsî ǁîra ǂnamipe ǁgoe ǃārodi, tsî hoaraga ǃādi Arnonǃāb amǃgâ ǁgoedi ǃnâ ge ǁan. Tare xū-i ǃaromats ge ǁîde ǁnā ǁaeb ǃnâ ū tama hâ i? 27 Tita ge tsū xū-e dī tsi tama hâ. Sats ge tita ǃoaguts toroba dīs ǀkha tita ra tsūdī. ǃKhūb ge a ǀgoraǃgâ-ao. ǁÎb ge nētsē Israelǁîn tsî Amonǁîn tsîn ǁaegu nî mîǁgui.” 28 Xaweb ge Amonǁîn di gao-aoba Jeftab di haisisa ǃgâ ǂgao tama ge i.
29 ǃKhūb di gagab ge Jeftab ai ge hā, tsîb ge ǁîba Gileadi tsî Manaseb tsîkha ǃnâ-u ǃgû tsî Mispas Gileadi dis kōse sī tsî ǁnāpa xu Amonǁîn kōse ge ǃkharu. 30 Jeftab ge ǃKhūba ge mîmâiba: “Amonǁîn ǂamats ga dansa a mā teo, 31 o ta ge Amonǁîna dan tsî ta ga oaǀkhī, o ga ǂgurose tita i nî ǃgûǃoaga omsa xu a ǂoaxa khoe-e satsa nî khaiba. ǁÎ-e ta ge khauǁguibase satsa nî ǁguiba.”
32 Jeftab ge ǃāba ǃgâu tsî Amonǁîn ǃoagu sī ge ǃkham, tsîb ge ǃKhūba dansa ge mā bi. 33 Jeftab ge ǁîna ge ǃkhamdan, Aroersa xu Minits, ǀgamdisi ǃādi ǀhûpe hâde xu Abel-Keramims kōse. Kaise kai ǃgams ge ǁnāpa ge hâ tsîn ge Amonǁîna Israelǁîn xa ge danǃarihe.
Jeftab ôas
34 Jeftab ge Mispas ǃnâ ǁîb oms tawa oasī, os ge ǁîb ôasa ǃkhomǃkharurusa ǀhuru tsî ra ǂnāse ǁîba ge ǃgûǃoa. ǁÎb ge ǁnā ǀgôas ǀguisa ge ūhâ i, tsî ǀnî hâ ǀgôa-i xare-e ge ūhâ tama hâ i. 35 Tsîb ge ǁîsab ge mûo, ǃoab xa saran âba ǀkhau tsî ge mî: “Ae, ti ôase, sas ge tita go ǃanaǂgao kai. Tare-i ǃaromas kha nî sa, ti tsûba nî ǃaromasa? Tita ge ǃKhūba nūs ǀkha go mîmâiba tsî ta ge ǁîsa a ǂgae-oa ǁoa.”
36 Os ge ǁîsa ǁîba ge ǃeream: “ǃKhūbats nî mîmâibas kao, o ǁnâi mîts ge khami dī-ū te, ǃKhūb ge sa khākhoen, Amonǁîna go ǀkhaoba tsiba xuige.” 37 Xawes ge ǁîs îba ge ǂgan: “Nē ǀgui xū-i ǀgui-e dība te re. ǀGam ǁkhâkha ǁaeba ǁnāxū te re, î ta ti ǀhōsadi ǀkha ǃhomga ǃoa ǃgû tsî oaxaese ta nî ǁō ǃkhais ǂama sī ǃoa.” 38 Ob ge ǁîsa ge ǃgû kai tsî ǀgam ǁkhâkha ǁaeba ge ǁnāxū si. O di ge ǁîs tsî ǀhōsadi âs tsîde ǃhomgu ǃoa ǃgû tsî ǁîs di oaxaesis ǂama ge ǃoa.
39 Tsîs ge ǀgam ǁkhâkha khaoǃgâ ǁgûba ǃoa ge oaǀkhī. Ob ge ǁîba ǃKhūbab ge mîmâiba hâ i khami ge dī tsîs ge oaxaese ge ǁō.
Os ge nē ǃkhaisa ǁnaetib ase Israeli ǃnâ ge tsoatsoa 40 ǂkham khoedi mâ kurib hoaba haka tsēde, Jeftab Gileadǁîb ôas ǂama di nî ǃoase ra ǃgûǂoa ǃkhaisa.
© Khoekhoegowab Elobmîs © Bible Society in Namibia, 2020.
