Jakobub ge ǃkhū hâ khoena ra ǃkhâikhom
1 Sadu hîa ǃkhū hâdo, nēsi ǃgâise ǃgâ te re! ǁNâi ǃgarise ā, î ǃau-ā re tsūǀkhāb hîa nî hāǂam dub ǂama. 2 Sadu ǃkhūsib ge gunu hâ tsî sadu saran ge ǁgurigu xa hapuhe hâ. 3 Sadu ǃhuniǀurib tsî ǀhaiǀurib tsîn ge ǀuriǀgū hâ tsî sadu ǂûdu ǃoagu nî ǃkhō-am tsî soros âdo ǀaes khami nî khauhapu. Sadu ge nē ǀuni tsēdi ǃnâ ǃkhūsiba ra ǀhaoǀhaobasen. 4 ǁNā-amaga ǃgâ re! Sadu ǃhanasîsenaon sadu ǃgaosa gere ǀhaoǀhaon, hîa du ge matares âna ǃkhō-oan di ǂgais ge Elob, ǃKhūb Hoaǀgaixab xa ge ǁnâuhe. 5 Nē ǃhūbaib di ûikurigu hoaga du ge ǀgapiǀgau tsî ǁkhoaxa ûiba ge ūhâ i. ǂĀs di tsēs ǃaroma du ge aitsama ge kaukausen. 6 ǂHanu-ai khoena du ge ǀgoraǃgâ tsî ge ǃgam, tsîn ge mâǃoa tama ge i.
ǃNūǃnâxasib tsî ǀgores
7 Ti ǀnam ǃgâsado, ǃKhūb di ǁkhawa hāsa ǃâubasens ǃnâ ǃnūǃnâxa re. ǂÂi re ǁnā ǃnūǃnâxa ǃhanaǂgā-aon xa, mâtin ǀnanuba ǀapiǁaegu ai ra ǃâusa, ǃhūb nî ǁîb di ǂûǂûsa ǃgaosa māse. 8 Sadu tsîna ǁnâi ǃnūǃnâxa, î ǂgaogu âdo ǀgaiǀgai, ǃKhūb di hās go ǀgū xuige.
9 Ti ǀnam ǃgâsado, tā ǁîǃnābe ǀhoegu Elob nî ǀgoraǃgâ du xuige. ǀGoraǃgâ-aob ge ǀnai dao-ams tawa mâ. 10 Aiǁgaus ase, ti ǀnam ǃgâsado, kō re mâti gu kēbo-aogu hîa ǃKhūb di ǀons ǃnâ gere kēboga, ǁîgu tsâb ǃnâ ǃnūǃnâxa i ǀgausa. 11 ǁÎga da ge ǀkhaehe hâgu ti ra ǂgai, tsâb ǃnâ gu ge mâǀgai xui-ao. Jobi di ǃnūǃnâxasib xa du ge ge ǁnâu tsî mâtib ge ǃKhūba Jobi di mâsiba ǀamǀam ǃkhaisa, ǃKhūb tsâbaǁhaos tsî ǀkhomxasib xa ǀoa hâ xui-ao.
12 Ti ǃgâsado, hoan ǂamai tā nū, ǀhommi tawas kas, ǃhūbaib tawas kas tsî tare xū-i ǀgui-i tawas kas hoasa. ǀGuiǃgupuse “Ā” tamas ka io “Hî-î” ti mî, î du tā ǀgoraǃgâhe.
13 Sadu ǃnâ i ga khoe-e hâo ǂōǂōsib ǃnâ hâ-e, a i ǀgore. Tsî ǃgâiaǂgao ra-e, a i ǃKhūba koaǁnaeba. 14 Sada xu i ga ǀgui khoe-e ǀaesen, a i kerkheb di ǂnomdomna* ǂgai tsî ǃKhūb di ǀons ǃnâ ǀgorebahe tsî ǀkhera-oli-i ǀkha ǂkhauhe. 15 Tsî ǁîn di ǀgores ǂgomsa xu hâs ge ǀae hâna nî ǂgauǂgau; tsîb ge ǃKhūba ǁîna hoaragase nî ǂgauǂgau. Tsî i ga ǁore hâ, o-i ge nî ǀûbahe. 16 ǁNā-amaga ǁîǃnābe ǁoren âdo ǁguiǁnâ, î ǀgorebagu ǂuru ǁkhā du nîse. ǀGores ǂhanu-ai khoe-i dis ge kai tsî ǀgaisa sîsenǂuiba ūhâ. 17 Eliab ge sada khami ge khoe iba, xaweb ge ǁîb di ǀgores ǀkha ǃKhūba ge ǂgan, îb ǀnanuba tā ǀapi, o i ge ǃnona tsî ǃkhare kurigu di ǁaeba ǀapi tama ge i. 18 Tsîb ge ǁkhawa ǀnanuba a ǀgoreba, ob ge ǀhomma ǀnanuba ge ǀapi kai. Tsîb ge ǃhūba ǁîb ǂûna ge mā.
19 Ti ǀnam ǃgâsado, sado xu i ga ǀgui khoe-e amaba xu kāǁhapu tsî a oahā-ūhe, 20 o nēsa ǂanǁapo, ǁnāti ī khoe-i hîa ǁore-ao-e ra oaǀkhī-ū-i ge ǁnā ǁore-ao-i di ǀomsa ǁōba xu sâu tsî ǂgui ǁoren ǀûbasa ra īǁkhā kai.
© Khoekhoegowab Elobmîs © Bible Society in Namibia, 2020.
