1 ǁÎn nē ǂōǂōsiba xu nî ûiǂoa ǀgau-i xare-i ge nî ǀkhai.
ǃGoaxaǁaeb gao-aob
ǂGuro ǁaegu ǃnâb ge Sebulonni ǃhūb tsî Naftalib ǃhūb tsîkha ge taotao; xaweb ge nēsi Mediteraneahurib ǀkhāb di ǀkharib, Jordanni nau ǀkhāb tsî Galileab ǂûb tsîgu tawa ǃhaokhoen ra ǁanpa, ǃgôasiba ge hā-ū.
2 ǃKhaenas ǃnâ ûi hân
ge kai ǃnâba ge mû.
Kai ǃkhaenas sommi ǃnâ gere ûin
aib ge ǃnâba ge hā.
3 Sats ge ǁaesa ge ǂguiǂgui,
sats ge ǁîn ǃgâiaǂgaoba ge kaikai.
ǃGaos tsēs ain ra ǃgâiaǂgao,
tamas ka io ǁkhâuǁnân hâ ǁuiban ra ǀgoragu tsēs ai,
khamin ge sa aiǃâ ra dâ.
4 Sats ge ǁîn ai gere ǁgâi ǃnaob
tsî ǁîn ǃhōdi ai ǁgoe haib tsîkha khôa xui-ao.
ǁGâiǀā-aon di ǂnau-ūhaibats
ge Midianǁînats ge ǀnai ǂnauǂkhū khami ge khôa.
5 Mâ ǁharob hoab toroǃkhamaogu gere dāǃgâ-ūheb
tsî ǁîgu ǀaoxa saran hoan
ge ǀaesa nî khau-ūhe.
6 ǀGôa-e da ge ǁorabahe hâ!
ǀGôaba da ge māhe hâ!
ǀGaib ge ǁîb ǃhōra ai hâ.
ǁÎb ge: “Buruburuxa ǀApemā-aob,”
“ǀGaisa Elob,” “ǀAmo ǁGûb,”
“ǂKhîb Gao-aob” ti nî ǀonǂgaihe.
7 ǁÎb ǀgaib ge ǃaruǀîǀgui nî khoraǂuisen
tsî ǁîb gaosib ge ǀamo ǂkhîba nî ūhâ.
Gao-aob Davidi saoǃgonaoseb ge nî ǂgaeǂgui;
ǁîb ǀgaibab ge ǂhanub tsî ǂhanu-aisib ai nî ǃgaoǃgao,
nēsi tsî ǀamosib kōse.
ǃKhūb Hoaǀgaixab ge nēn hoanab nî dīse mîmâi hâ.
ǃKhūb ge Israela nî ǁkhara
8 ǃKhūb ge mîmāsa Israeli ǃoagu ge sîǂui, ā Jakob di surib ǃoagu. 9 Hoaraga khoen, Efraimmi din tsî Samariab ǃnâ ǁan hân tsîn hoan ge ǁîb ge ǁnāsa dī ǃkhaisa nî ǂan. Xawen ge ǂnīǂnīsenxasib tsî ǃnâudanaxasib tsîkha ǀkha ge mî: 10 “ǂGoa-omgu ge ge ǃkhom, xawe da ge ǁkhawa ǀuidi ǀkha nî om; ǀnomahaidi ge ge ǁhāǁnâhe, xawe da ge ǁîde sederhaidi ǀkha nî ǃkhōǃkhuni.”
11 ǃKhūb ge ǁîn khākhoena ǁîn ǃoagu ge ǃkhāǃnâ. 12 Siriaǁîna aiǂoasǀkhāba xu tsî Filisteǁîna huriǂoasǀkhāba xu; ǁîn ge Israela ǁkhowa-amsa ams ǀkha nî hara. Nēn hoan ǃnâb ge ǁîb ǁaiba bē tide; ǁîb ǃommi ge ǁkharab nîse khoraǂuisa.
13 Israeli khoen ge ǁîna ge ǂnaub ǃoa dabasen tama ge i, tamas ka io ǃKhūb Hoaǀgaixaba ôa tama ge i. 14 ǁNā-amagab ge ǃKhūba ǀgui tsēs ǃnâ Israelǁîn danas tsî ǂareb, ǁnâub tsî ǂāb tsîna ge ǁaraǁnâ. 15 Kaikhoegu tsî ǂamsagu tsîgu ge a dana tsî kēbo-aogu ǂhumiba ra ǁkhāǁkhāgu ge a ǂare! 16 Nē khoena gere ǂgaeǂguigu ge ǁîna ge ǂgaeǂhapu tsî ǁîgu xa ge ǂgaeǂguihe hâ in hoan ge ǃgommi ǃnâ ge ǁnāxūmâihe. 17 ǁNā-amagab ge ǃKhūba ǁîn ǂkham khoega ǀkhom tide, ǁkhātib ge ǁîn ǃguniǀgôan tsî ǃoataradi tsîna ǀkhom tide; mâ-i hoa-i a eloxoresa tsî ǂkhabadī-ao xui-ao tsî ams hoas ǂkhabase gere ǃhoa xui-ao. Xawes tsînab ge ǃKhūb ǁaiba ǀam tide, ǁîb ǃommi ge ǁkharas ǃaroma nî khoraǂuihe.
18 Eloxoresasib ge ǀaes, ǀkhininin tsî ǁkhūn tsîna ra ǂhubiǂuis khami ra ǂhubi; ǁîs ge kai, ǀgom haide ra ǂhubiǂui, ǀanni ǀguib nî ǃgause. 19 ǃKhūb Hoaǀgaixab ǁaib ǃnâ-us ge ǃhūb ge ǂhubihesa tsîn ge khoena ǀaes di oli-i ase nî ī; Khoe-i khoe-e ra ǀkhom-i ge nî ǀkhai. 20 ǁÎn ge amǀkhāba xu gere ǂû, xawe noxopa ge ǃâsa i, ǁîn ge ǁareǀkhāba xu gere ǂû, xawes tsîna ge ǁâ tama hâ i. ǁÎn ǂûn di ôan ǁgan-en ge gere ǂû. 21 Manaseb ge Efraimmi ǃoagu ra ǃkham tsî Efraimma Manaseb ǃoagu; tsîn ge hoana Judab ǃoagu ge khâi. Xawes tsînab ge ǃKhūb ǁaiba bē tama ge i; ǁîb ǃommi ge noxopa ǁîn ǃoagu ge khoraǂuisa i.
© Khoekhoegowab Elobmîs © Bible Society in Namibia, 2020.
