Elob ǁkharab khâikhâisen aon ǃoagu
1 Tita ge ge hōhe tita dî-ôa taman xa, tita ge ge hōhe tita ôa taman xa. Tita ge: “Nē ta ge a, nē ta ge tita,” ti ti ǀonsa ǂgaiǀî tama ǁaes ǃoa ge mî. 2 Ti ǃomkha ta ge hoaraga tsēsa khâikhâisenxa ǁaes, ǂhanu tama daob ǃnâ ra ǃgûn, tsî ǁîn turagu ǀguiga ra saon ǃoa ge khoraǂui. 3 ǁÎn ge hoaǁae ti mûǁae ra ǂoeǂoe te, ǃhanagu ǃnâ ra ǁguiban, ǃgâihamxūna ǀui-altardi ai ra ǁguibana. 4 ǁÎn ge ǀhobadi ǁaegu ra ǂnûma tsî tsuxub ǃnâ sâusa ǃkhaidi ǃnâ ra hâ; hāgū-i di ǁgan-e ra ǂûǃâ, ui-uisa xūn di surob xapadi ân ǃnâ hâǃâ. 5 ǁÎn ge ra mî: “Sa ǀkhāb ai hâbasen, tā tita tawa ǀgūse hā, tita sats xa a ǃanu xuige.” Nēn ge ǀanni ase ti ǂgui-āra ǃnâ ī, ǀaes hîa hoaraga tsēsa ra khaus ase.
6 Mû, nēs ge ti aiǃâ a xoasa: “ǃNō ta tide, xawe ta ge nî mādawa-am; amase ta ge ǁîna ǁîn anu hâ-i ǀgui-e nî mādawa-am, 7 ǁîn dīsādi tsî ǁîn aboxagu din tsîn ǃaroma, tib ge ǃKhūba ra mî. ǁÎn ge ǃgâihamxūna ǃhomgu ai ǁguiba tsî ǃnâugu ai ǂkhabase tita xa gere ǃhoa, ǁnā-amaga ta ge ǀoasa matare-oas ǁîn tsūdīgu disa tîǂamdi âna xu nî ǀnō.”
8 Nētib ge ǃKhūba ra mî: “Draiben ǃnâ i ra ǂkhon ǂauxûi-e hōhe, on ge ra mî: ‘Tā ǁî-e hîkākā, ǀkhaeb ǁîn ǃnâ hâ xuige,’ ǁnāti ta ge ti ǃgān ǃaroma nî dī tsî ǁîna hîkākā tide. 9 Jakob suriba ta ge nî ǀkhī-ū tsî Judaba xu khoen ti ǃhomga nî ūbasenna. Ti ǁhûiǂuisaben ge ǁîga nî ǀumi tsî gu ge ti ǃgāga ǁnāpa nî ǁan. 10 Sarons ge nî ǀgoan di ǃûǃkhai kai tsî Akorǃgoaǃnāb ge nî goman di ǃûǃkhai kai, ti khoen tita gere ôan ǃaroma.
11 “Xawe sadu ǃKhūba ge ǁnāxū du, ti ǃanu ǃhomma ge ǀurudo, sadu ǁgôa-elob ǃgâiǃgâb diba ra aiǂhomibado tsî ǁgôa-elob ǁuib dib ǃaroma xapaga ǂauxûib ǀkha ra ǀoaǀoado. 12 Tita ge sado gôaba nî aiǂhomiba tsî hoadu ge ǂāhes ǃaroma nî ǃgamǃgâ kaihe; tita ge ǂgai du, o du ge ǃeream tama ge i, tsî tita ge sadu ǀkha ǃhoa, o du ge ǃgâ tama ge i, xawe du ge ti mûǁae ge ǂkhaba ina gere dī tsî tita ge ǂkhî-ū tama hâ ina ge ǁhûi. 13 ǁNā-amagab ge ǃKhūb Eloba ge mî: ‘Ti ǃgān ge nî ǂû, xawe sadu ge nî ǃâ; ti ǃgān ge nî ā, xawe sadu ge nî ǁgâ; ti ǃgān ge nî ǃgâiaǂgao, xawe sadu ge nî taotaohe. 14 Ti ǃgān ge nî ǃgâiaǂgao, xawe du ge sado ǂgaob tsûb xa nî ā tsî nî ǃoa sadu gagas dāǂkhūhe hâ xui-ao. 15 Sadu ǀonsa du ge ti ǃkhōǂuisabena nî ǁnāxūba, în ǀâxareb ase sîsenū tsîb ge ǃKhūb Eloba nî ǃgam du; xawe ǁîb ǃgānab ge ǀkhara ǀonsa nî mā. 16 O i ge ǁnā-i hîa ǀkhaeba ǃhūb ǃnâ ra ǂgao-e, amab Elob xa nî ǀkhaehe tsî ǁnā-i ǃhūb ǃnâ ra nū ǂgao-i, ge amab Elob tawa nî nū. Aiǃâ ge hâ i ǂōǂōsigu ge ǀuruhe tsî ti aisa xu ge sâuhe.’ ”
ǀAsa kurus
17 Nētib ge ǃKhūba ra mî: “Tita ge ǀasa ǀhommi tsî ǀasa ǃhūbaib tsîkha ra kuru; ǃkharu ge xūn ge ǂâihōhe tide tamas ka io ǂâis ǃnâ hā tide. 18 Xawe ǀamose ǃgâiaǂgao î dâ, tita ra kuru xūn xa; tita Jerusalemsa ǃgâiaǂgaob ase ra kuru tsî ǁîs khoena dâb ase xui-ao. 19 Tita ge Jerusalems ǃnâ nî ǃgâiaǂgao tsî ti khoen ǃnâ nî dâ; ǁîs ǃnâb ge ǃaruǀî āb di ǀōba ǁnâuhe tide, tamas ka io ǃoab di āba. 20 ǁÎs ǃnâ i ge ǃaruǀî ǀgôaro-e ǀoro tsēdi ǀguide ûi tide, tamas ka io kai khoe-i ûib â-e ûiǂui tama-e. ǁNā-i ǀguikaidisi kurin ai ga ǁō-i ge ǂkham khoe-i ase nî ǃgapaǀîhe tsî ǀguikaidisi kurina sīǃnâ taman ge ǀâxarexūhe hân ase nî ǃgapaǀîhe. 21 ǁÎn ge omde om tsî ǁîdi ǃnâ nî ǁan; ǁîn ge draibeǃhanaga ǂgā tsî ǁîgu ǂûna nî ǂû. 22 ǁÎn ge ǂnubi tide, nau-i xa i nî ǁanǃnâhese, ǁîn ge ǂgā tide, nau-i xa i nî ǂûhese. Hais tsēdi ī khami di ge ti ǁaes tsēde nî ī tsîn ge ti ǃkhōǂuisabena ǁîn ǃomgu sîsenni ǃnâ ǂomxa ǁaeba nî ǃgâiǃgâisen. 23 ǁÎn ge ǁause sîsen tide, tamas ka io hîkākāhes ǃaroma ǀgôana ǁora tide. ǁÎn ge ǃKhūb xa ǀkhaehe hâ surib ase nî ī, ǁîn ôananôagub ǁîn ǀkha. 24 ǁÎn nî ǂgais aiǃâ ta ge nî ǃeream, noxopan ǃhoa tama hîa ta ge ǁîna nî ǁnâu. 25 ǂHira-i tsî ǁkhao-i tsîn ge ǀguipa nî ǂû, xammi ge ǀgâna gomab khami nî ǂû; xawe ǀaob ge tsaraba nî ǂû! ǁÎn ge ti ǃanu ǃhommi ai hân hoana tsûtsû tamas ka io hîkākā tide,”
tib ge ǃKhūba ra mî.© Khoekhoegowab Elobmîs © Bible Society in Namibia, 2020.
