1 Ots ga ǀhomma ǀkhauǁkhowa-am tsî a ǁgôaxa, î gu ǃhomga sa hâs xa ǂgubi! 2 ǀAes ra ǂnâsa ǀaega khau kai tsî ǀaes ra ǁgam-e ǀgû kai khami, sa ǀonsats sa khākhoena nî ǂanǂanse, î di ǁaede sa ǀgūse hâs xa ǀkhū kaihe! 3 Sida ǃâubasen tama buruxa xūnats ge re dī, ots ge ge ǁgôaxa, ǃhomgu ge sa ǀgūse hâs xa ge ǂgubi. 4 ǀNaisa xu i ge khoe-i xare-e ǂgaes ǀkha ǁnâu tama hâ, tamas ka io ǁnâuǃā tama hâ, tamas ka io i ge mû-i xare-e Eloba mû tama hâ, sats xōǀkhā, ǁnān hîa ǀnai ǁîba ǃâu hâna ra mâǂgâbaba. 5 ǁNān ǃgâiaǂgaob ǀkha ǂhanuse ra dīnats ge ra ǀhao-ū, ǁnān sa daogu ǃnâ ra ǂâi tsina. Xawe sats ge ge ǁaixa sida ge ǁore amaga; sats ge ge gaugausen sida ge dīsāo. ǁÎ ǃkhais ǃnâb ge ǀamosiba hâ, sida nî sâuhese. 6 Sida ge ǃanuoǃnâ-i khami ge ī tsî sida ǂhanu-ai dīgu ge aoxūhesa anu sara-i khami ī. Sida hoada ge ǂnare-i khami ra ǂnâ tsî sida tsūdīgu ge ǂoab khami ra ǃgombē da. 7 Khoe-i sa ǀonsa ra ǂgaiǀî-i ge a ǀkhai, tamas ka io sats ai ǃkhōbasensa ra dītsâ-i xare-i ge a ǀkhai; sats sa aisa sida xu gaugau hâ tsî sida ǁoren ǃnâ māǁnâ da hâ xui-ao.
8 Xawe ǃKhūtse, sats ge a sida î. Sida ge ǂgoab khami ī tsî sats ge sida sūǂnubi-aotsa. Sida ge sa ǃommi di kurusabeda. 9 ǃKhūtse, tā ǃnāǂamsase ǁaixa-ū da re, î tā sida dīsāde ǀamos kōse ǂâihō re. Kōǀî da re, sida hoada ge a sa ǁae! 10 Sa ǃanu ǃādi ge ge ǃgaroǃhū kai, Sions ge ge ǃū-aisa ǃkhai kai, Jerusalems ge ge ǃū-aisa. 11 Sida ǃanu tsî îsa ommi, sida aboxagu ge satsa gere ǃkhōǀkhāǃnâb ge ǀaeb xa ge khauǃkhūhe tsî ǃgâiǃgâisenǃkhaigu hoagu ge ge hîkākāhe. 12 Nē xūn hoan khaoǃgâts kha nî ū-oasen, ǃKhūtse? ǃNō tsîts kha ǁkhōse nî ǁkhara da?
© Khoekhoegowab Elobmîs © Bible Society in Namibia, 2020.
