ǃKhūb dans ǁaedi ǂama
1 “Tariba ǁnāb Edomma xu ra hāba, ǀapa saran ǀkha Bosrasa xu? Tariba ǁnāb îsase sarab âb ǃnâ ra anna, ǁnāb ǀgaib âb ǃnâ ra ǃgûba?”
“Tita ge ǁîta, ǂhanu-aisiba ra ǂanǂan ta, ores ǁkhāsiba ūhâ ta.”
2 “Tare-i ǃaromab sa saraba a ǀapa tsî khoe-i hîa dāǃnâǃoreba ra dāǃnâ-i di saran khami ī.”
3 “Tita ge dāǃnâǃoreba ǀguri gere dāǃnâ tsî khoe-i xare-i ge tita tawa ge ǀkhai i. Tita ge ǁîna ti ǁaib ǀkha dāǃgâ tsî ti ǁaib ǀkha gere dāǂkhū. ǁÎn ǀaob ge ti saran ai ǀaisen tsî ǂnaode ti saran hoan ai ge ǁnāxū. 4 Ti ǂgaob ǃnâs ge ǀkhaob tsēsa ge khâi tsî ti ores sîsenni kurib ge ge hā. 5 Kō ta ge, xawe-i ge hui te nî khoe-i xare-e ge ǀkhai i, burugâ ta ge, xawe-i ge ǁî-i ǃoa ta nî kōkhâi khoe-e ge ǀkhai i. ǁNā-amagas ge ti ǃommi ǂûb ge dansa ǀkhī-ūba tesa tsîb ge ti ǁaixasiba ge mâǃgâ te. 6 Ti ǁaib ǃnâ ta ge ǁaede ge dāǃgâ, ti ǁaib ǃnâ ta ge ǁîde ge dāǂkhū tsî ta ge ǁîn ǀaoba ǃhūbaib ai ge ǁhōǂui.”
ǃKhūb di ǃgâisib Israels ǃoa
7 Tita ge ǃKhūb di ǀkhomxaǃnâ dīgu xa nî ǃkhō-am.
ǁÎb ǃgâidīgu ǃaroma ta ge ǃKhūba nî koa.
ǁÎb ǀkhomxaǂgaosiba xub ge kai ǃgâisiba
Israels ommi dina ge ǁgau,
ǁîb di ǃnāǂamsa hâhâ ra ǀnammi ǃaroma.
8 ǁÎb ra nēti mî xui-ao: “Amase, ǁîn ge a ti ǁae, ǀgôan tsūse dī tidena,” tsîb ge ge ǁîn Ore-ao kai. 9 ǁÎn ǂōǂōsigu hoagu ǃnâb ge ǁîba ge ǂōǂōhe tsî ǀhomǃgā-i ose, xawe ǁîb di hâs ge ǁîna ge oresa. ǁÎb ǀnammi tsî ǀkhommi ǃnâs ge ǁîb ge ǁîna oresa; ǁîb ge ǁîna ūkhâi tsî ǁîna ǀnai gere tani. 10 Xawen ge ǁîna khâikhâisen tsî ǁîb ǃanu Gagaba ge ǃoaǃoa. ǁNā-amagab ge ǁîn khākhoese ǁîn ǃoagu ge dawasen; ǁîb ǂûb ge ǁîn ǃoagu gere ǃkhamma.
11 Ob ge ǁîba ǀoro tsēdi xa ge ǂâihō, Moseb ǁîb ǃgāb xa. Mâpab ǁnāb ǁîb gūn di ǃûi-aoga huriba xu ge ǂgaeǂguiǂuiba hâ? Mâpab ǁnāb ǁîgu ǃnâ ǁîb ǃanu Gagaba ge ǁhōǂuiba hâ? 12 ǁNāb ǁîb ǂkhaisib ǁôab ǀkha Moseb amǀkhāb ai ge hâ iba, ǁnāb ǁgamma ge ǁîn mûǁae ǀgora tsî ǁnās ǀkha ǀamosib kōse ǀonsa kurubasenna, 13 ǁnāb ǁîna ge ǃgamsib ǃnâ taniǃkharuba? ǃGaroǃhūb ǃnâ hâ hā-i khamin ge ǃnôa tama ge i.
14 ǂÛtanixa ǃgoaǃnāb ǃnâ ge ǁgôa goman khamib ge ǃKhūb Gagaba ǁîna sâsasiba ge mā. ǁNātits ge sa ǁaesa ge ǂgaeǂgui, sa ǀonsats nî ǃgôasiba hōbase.
ǀKhommi tsî huib tsîkha ǀgores
15 ǃKhūtse, ǀhommi xu kōǁnâ î mû, sa ǃanu tsî ǂkhaisa hâǃkhaisa xu. Mâpa kha sa ǀguixasib tsî ǁkhāsib tsîkha hâ? Sa ǀnammi tsî ǀkhomxaǂgaosib tsîkha mâpa hâ? ǁÎgu ge tita xu ǂgae-oahe hâ. 16 Sats a sida î xui-ao, Abrahammi ga sida ǂan tama i xawe tsî Israels ga mûhō da tama i xawe; ǃKhū, sats ge a sida ǁgû, sida Ore-ao, tis ge sa ǀonsa ǀnaisa xu ǂansa. 17 ǃKhūtse, tare-i ǃaromats sa daoga xu ra ǁnāǁgôa kai da tsî sida ǂgaoga ra karokaro, satsa da go ǃaoǀûs kōse? Sa ǃgān tsî sa ǃhaodi ǀumis ǃaroma dabasen re.
18 Sa ǃanu ǁaes ge ǁaero-i ǀgaiba sa ǃanu omma ge ūbasen, xawen ge sida khākhoena sa ǃanusib ǃkhaiba ge dāǂkhū. 19 Sida ge ǀnai ge ǂgaeǂguihe tama hâ i khoen, sa ǀons ǀkha ge ǂgaihe tama hâ in khami ge i.
© Khoekhoegowab Elobmîs © Bible Society in Namibia, 2020.
