1 Sions ǃaroma ta ge tita ǃnō tide
tsî Jerusalems ǃaroma ta ge sâ tide.
ǁÎs di ǂhanu-aisib ǁgoaǂkhaisib khami ǁhai tamas kōse
tsî ǁîs ǃgâiǃōsib ǃamǀaes khami ǃnâǂoaxa tamas kōse.
2 ǁAedi ge sa ǂhanu-aisiba nî kōǀî
tsî gao-aogu hoaga sa ǂkhaisiba.
Sas ge ǀasa ǀons,
ǃKhūb amasa xu nî ǂoaxas ǀkha nî ǂgaihe.
3 Sas ge ǃKhūb ǃommi ǃnâ, îsa krons ase nî ī
tsî gaoǀgapase Elob ǃomǁae.
4 ǃAruǀîs ge sasa “ǀUruhe Hâs” ase ǃgapaǀîhe tide
tsî sa ǃhūb ge ǁkhawa “ǃŪ-aisa Taras” ti ǂgaihe tide.
Xawe sas ge ti “ǃGâiaǂgaob Sas ǃnâ Hâs” ase nî ǂansa
tsî sa ǃhūba “ǃGameb” ase.
ǃKhūb sas ǃnâ ra ǃgâiaǂgao
tsî sa ǃhūb ge nî ǃgamehe.
5 ǂKhamkhoeb ra ǂkhamkhoesa ǃgame
khami gu ge sa ôaga sas ǀkha nî ǃgame;
tsî ǃgame-aob ra ǃgame-aos ǃaroma ǃgâiaǂgao
khamib ge sa Eloba sas ǃaroma nî ǃgâiaǂgao.
6 Jerusalemse, sa ǂnubiǂgoagu
ai ta ge ǃûi-aoga ge mâi.
Hoaraga tsēb tsî hoaraga tsuxub tsîna gu ge ǃnō tide.
Sago ǃKhūba ra ǂâiǂâiǃnâgo, tā sâ!
7 ǁÎb Jerusalemsa ǂnubitoa tamas kōse, tā sâ kai bi
tsî ǁîsa hoaraga ǃhūbaib xas nî koahese dī.
8 ǃKhūb ge ǁîb amǀkhāb ǁôab
tsî ǀgaisa ǃommi tawa ge nū: “ǁKhawa ta ge sadu
ǃhoroba sadu khākhoena ǂûse mā tide,
tsîn ge ǃhaokhoena sadu ge ǀhupuba
ǂauxûi-e ā tide.
9 Xawe ǁnān ǃhoroba ra ǃgaon
ge ǁîba ǂû tsî ǃKhūba nî koa.
Tsî ǁnān draibena ra ǀhaoǀhaon
ge ǂauxûi-e ti ǃanusib di ai-omgu ǃnâ nî ā.”
10 ǃKharu, dao-amdi ǃnâ ǃkharu,
khoena daoba ǂhomiba. Omkhâi,
kai daoba omkhâi re, ǀuide ūǂui,
ǁGauǁgaus ǃkhauba ǁaedi ǂamai ūkhâi.
11 ǃKhūb ge ǃhūbaib ǀams kōse ge ǂanǂan:
Mî re Sions ǀgôasa ǃoa;
“Sa ǃgâiǃōsib ge ra hā;
ǁîb mādawa-ams ge ǁîb ǀkha hâ
ǁîb amǃnâs ge ǁîba ra aiǃgûba.”
12 ǁÎn ge “ǃAnu ǁAes” ti nî ǀonǂgaihe,
“ǃAnu Khoen ǃKhūb xa orehe hâ ǁaes”
tsî sas ge “Ôaǂuihe ges,
ǃĀs ǁNāxūhe tamas” ti nî ǀonǂgaihe.
© Khoekhoegowab Elobmîs © Bible Society in Namibia, 2020.
