Ores di ǃgâiǂhôas
1 Gagab ǃKhūb Elob dib ge tita ai hâ,
ǃKhūb ge ǀnau te amaga.
ǁÎb ge ǃgâiǂhôasa ta ǁgâiǀāhe hâna nî ǀkhī-ūbase ge sî te,
khôaǂkhūhe hâ ǂgaoga ūhâna ta nî ǃgae-aibase,
ǃnorasa ta ǃkhōsana aoǁnâbase
tsî ǃkhōsabena nî ǃnoraǃnorahesa.
2 ǃKhūb ǀkhomxaǂgaosib di kuriba ta nî aoǁnâse
tsî sada Elob ǀkhaob di tsēsa ta nî ǂanǂanse,
tsî ǃoa ran hoana ta nî ǁkhaeǂgaose.
3 Sions ǃnâ ra ǃoan nî ǀgaiǀgaiǃnâhese,
ǁîna tsaob di amǃnâs ai anixū-e mā,
ǃoab di amǃnâs ai ǃgâiaǂgaob oli-e,
ǂōǂōhe hâ gagas amǃnâs ai ǃgâiaǂgaob saraba mā.
ǁÎn ge aikehain ǂhanu-aisib din dise nî ǂgaihe,
ǃKhūb xa ǃhanahe hâse, ǁîb ǂkhaisiba ǁgauǂuis ǃaroma.
4 ǁÎn ge ǀnai ge hîkākāhe ǃāde nî omkhâi,
aibekam hîǀhuruden ge ǁkhawa nî ǂnubikhâi.
ǁÎn ge hîkākāhe ge ǃāde ǁkhawa nî ǀasaǀasa,
ǂgui ôananôagugu ǁaeba hîkākāhe hâde.
5 ǃHaokhoen ge sadu ǀgoana nî ǂûmā,
ǃhaokhoen ge sadu ǃhanaga sîsenai
tsî draibeǃhanaga nî kōǃgâ.
6 Xawe sadu ge ǃKhūb di pristerse nî ǂgaihe,
sadu ge Elob sîsenaodu ase nî ǂanhe.
ǁAedi ǃkhūsiba du ge nî ǀama
tsî ǁîdi ǃkhūsib ǂkhaisib ǃnâ nî ǃgâiaǂgao.
7 Sadu taosib ge a ǀgamǃnâgu
tsî sadu ǂhauǃnâoǃnâsib ge ǁîdi ǁkhara kai xui-ao.
ǁNā-amagan ge ǁîn ǃhūba ǀgamǃnâguse nî ūbasen;
ǀamo ǃgâiaǂgaob ge nî ǁîn di.
8 Tita ǃKhūta ge ǂhanuba a ǀnam,
tita ge ǃnaris tsî tsūdīs tsîra a ǃhuisa.
ǂGomǂgomsase ta ge ǁîna nî dīdawa-am
tsî ta ge ǀamo ǃgaeǀhaosa ǁîn ǀkha nî dī.
9 ǁÎn ôananôagub ge ǁaedi ǃnâ nî ǂansa
tsî ǁîn suriba khoen ǁaegu.
ǁÎna nî mû khoen hoan ge
ǃKhūb xa ge ǀkhaehe khoen ase ǁîna nî ǂanǃgâ.
10 Tita ge kaise ǃKhūb ǃnâ nî ǃgâiaǂgao,
ti hoaraga khoesib ge ti Elob ǃnâ nî ǀgapiǀgapisen.
ǁÎb ge tita ǃgâiǃōsib saraba ge ǂgaeǂgā,
ǁîb ge ǂhanu-aisib sarab ǀkha ǃgū-ai te xui-ao.
ǃGame-aob ǁî-aitsama ra anisen khami,
tsî ǃgame-aos ǃgomǀgausa anixūn ǀkha ra anisen khami.
11 ǃHūb ra ǁîb ǁhaona ǁhai kai khami
tsî ǃhanab ra ǁîb ǃnâ ge ǃhanahena ǀomkhâi kai khami,
ǁnātib ge ǃKhūb Eloba ǁaedi mûǁae
ǂhanu-aisib tsî koas tsîna nî ǁhai kai.
© Khoekhoegowab Elobmîs © Bible Society in Namibia, 2020.
