Elob ge Jesajaba kēbo-aob ase ra ǂgai
1 Gao-aob Usiab ge ǁō kurib ǃnâ ta ge ǃKhūba ǀgapiseb trons ai ǂnôase ge mû. ǁÎb sarab di ǂomamǃgâb ge Tempeli hoaba ge ǀoaǀoa. 2 ǁÎb ǂnamipe gu ge serafga ge mâ i; mâb hoab ge ǃnani ǁgaboga ge ūhâ i: ǀGamkha ǀkhab ge ǁîb ais âba ge ǃgū-ai, ǀgamkha ǀkha ǁîb ǂaira ǃgū-ai tsîb ge naukha ǀkha gere ǁkhana. 3 ǁÎǃnābe gu ge nēti gere ǂgaiǀîgu:
“ǃAnu, ǃanu, ǃanub ge
ǃKhūb Hoaǀgaixaba!
Hoaraga ǃhūbaib ge ǁîb ǂkhaisib xa ǀoa hâ!”
4 ǁÎgu ǂgaidomgu ge ommi dao-amhaikha ge gongon tsîb ge Tempela ǀanni xa ge ǀoa.
5 O ta ge tita ge mî: “Tare-e ta tita a dī ǁkhā? Tita ge ǀnai ǀaxarexūhe hâ, ti amǁgaukha ǁoreb xa ǀuriǀurihe hâ xui-ao, tsî ta ǁkhāti ǁoreb xa ǂnaoǂnaohe hâ amǁgauga ūhâ khoen ǁaegu ǁan hâ xui-ao. Xawe ti mûra ge Gao-aoba go mû, ǃKhūb Hoaǀgaixaba.”
6 Xawe ǀguib serafgu dib ge tita tawa ge ǁkhanahā. ǁÎb ǃommi ǃnâb ge ǁkhôasa ǂnoms altars ai ge ǂnôa isa ǂnomǀurikha ǃnâ ūhâse ge hā-ū. 7 ǁÎs ǀkha ti amsa tsâǀkhā tsîb ge ge mî: “Mû, nē ǂnoms ge sa amǁgaukha go tsâǀkhā. Sa ǀhapis ge go ūbēhe; sa ǁoreb ge go ǀûbahe.”
8 O ta ge ǃKhūb di domma nētib ra mîse ge ǁnâu: “Tari-e ta nî sî tsî tari-e sige nî ǃgûba?” O ta ge tita ge mî: “Nē ta ge a, tita sî re!”
9 Ob ge ge mî: “ǃGû, î nē ǁaesa sī mîba: ‘Hoaǁae ǃgâhâhâ, xawe tā ǁnâuǃā; Hoaǁae kō, xawe tā ǁnâuǃā!’ 10 Nē khoen ǂgaoga gâre kai; ǁîn ǂgaede ǂgan kai î mûdi âna ǂgī kai! On ge ǁîn mûdi ǀkha mû tide tamas ka io ǂgaedi ân ǀkha ǁnâu tide; ǁîn ǂgaogu ǀkhan ga ǁnâuǃā, on ge ǃhobasen tsî nî ǂgauǂgauhe.”
11 O ta ge ge ǃeream: “Mâs kōses nēsa nēti nî hâ, ti ǃKhūtse?”
Ob ge ǃeream tsî ge mî: “ǃĀdi nî hîkākāhe tsî ǀkhaiǃnâs kōse; tsî omde ǁanǃnâhe ǁoase tsî ǃhūba hîǀhuruhe tsî hîkākāhe hâse. 12 ǃKhūb ge mâ-i hoa-e nî sîbē, tsîb ge ǃhūbaib hoaba nî ǃū-aisa. 13 Disiǁî ǃâb khoen dib ga ǃgau, xaweb ge ǁîb tsîna nî hîkākāhe; ǁî-i ge aikehais ga ǁhāǁnâhe, xawes ǃgaos âsa ra ǃgau khami nî ī.”
(ǁNā haiǃgaos ge ǀasa tsoatsoas Elob khoen disa ra ǁgauǁgau.)
© Khoekhoegowab Elobmîs © Bible Society in Namibia, 2020.
