Ama ǂûtamahâs
1 ǃGarise ǃauǂgai ǃao tamase, xâiǁnâs khami sa domma ǃhâkhâi! Ti khoena ǁîn dīsade ǂanǂan, tsî Jakob omma ǁoren âna. 2 Xawen ge tsēkorobe ra ôa te tsî ti daoga ǂans ǃaroma ra ǃgâiaǂgao, ǁaes hîa ǂhanu-aisiba ra dīs khami tsî ǁîn di Elob ǂhanuba ǁnāxū tama hâ. Ti ǂhanu-ai ǀgoraǃgâden ge ra ǂgan, Elob ǀgūse sīs ǃaroman ge ra dâ.
3 Khoen ge ra mî: “Tare-i ǃaroma da ge ǂûtama hâ, xawe sats ge ǁnāsa mû tama hâ? Tare-i ǃaroma da ge aitsama ǃgamǃgamsen, xawe sats ge ǁnāsa mûǂan tama ge hâ i?”
ǃKhūb ge ra mî: “Mû, sadu ǂûtama hâsa du ge sadu ǃgâib ǃoa ǀgui ra dī tsî sadu sîsenaon hoana ra ǁgâiǀā. 4 Mû, ǁnâusāgus, ǃkhams tsî ǃomǂnaugus ǃaroma ǀgui du ge ǂûtama ra hâ. Nētsēkam ǂûtama hâs sadu ra dīs ge sadu domma ǀgapise ǂoaxa-ū tide. 5 Nēsa kha tita ge ǁhûi ǂûtama hâsa, tsēs ǁîs ai i khoe-e nî ǃgamǃgamsensa? Danasa ǂā-i khami ǃgamǃgam tsî ǀhaosa ǀgâi tsî tsaob ǃnâ ǁgoese? Nēsa du ǂûtama hâs ti nî ǂgai, tsēs ǃKhūb xa ūǃoahe hâs ase?
6 “Nēsa kha tita ge ǁhûi ǂûtama hâsa: Eloxoresasib khedegu hîa ǃgaeǃnon du hâga xore, ǂhanuoǃnâsib ǃnaob tsuriga xoresa, ǁgâiǀāhe hâna ǃnora kaisa tsî mâ ǃnaob hoaba khôaǁnâsa? 7 ǃÂ hân ǀkhats sa pereba nî ǀgoragu tamasa tsî hâǃkhaio ǀgâsanats sa oms tawa nî oahā-ū tamasa? ǀŌǀkhā hânats ga mû, ots kom ǁîna nî anaǀkhāo, tsî sa ǀaokhoena xu gaugausen tide.
8 “Ob ge sa ǃnâba ǁgoaǂnobos khami nî ǁhai tsî sa ǂgauǂgaus ge ǃhaese nî ǀkhī. Sa ǂHanuǂhanu-aob ge sa aiǃâ nî ǃgû, ǃKhūb ǂkhaisib ge sa ǃgâb ai nî ǃûi tsi. 9 Ots ge nî ǂgai tsîb ge ǃKhūba nî ǃeream. Huib ǃaromats ga ǂgaiǂui, ob ge ǁîba, ‘Nē ta ge a,’ ti nî mî. Sa ǁaeguba xuts ga ǃnaob ǃgommi, ǀkhunuǁnaegus tsî ǂkhaba ǃhoaǀgaub tsîna dībēo, 10 ǃâ hânats ga ǂûmā tsî ǂōǂōsib ǃnâ hân ǂhâba hui, ob ge sa ǃnâba ǃkhaenas ǃnâs tsîna nî ǀkhâuǂoaxa tsî sa ǃkhaenaba tsēǃgâǁaeb khami nî ī. 11 ǃKhūb ge hoaǁae nî ǂgaeǂgui tsi tsî sa ǂhâsiba ǃgâi xūn ǀkha nî ǀoaǀoa tsî sa ǂkhōga nî ǀgaiǀgai. ǂNâhe ra ǃhanab khamits ge nî ī, ǁgamǀaus hîa ôaǀû tamas khami. 12 Sa xūn ǀnai ge hîkākāhen ge nî omkhâihe tsîts ge ǂgui surigu ǃgaoǃgaoga nî kurukhâi. Sats ge ǂapagu di ǂganamaots ti nî ǂgaihe tsî ǁanǃnâhe nî ǃgangu dī-unu-aots ti.”
Sabbattsēsa khais ǃaroma hâ mādawa-ams
13 Sa ǂaisats ga Sabbattsēsa xu ǂgae-oa, tsî ti ǃanu tsēsa tsēdīs ǃās ǃnâ sa ǂâisa a dīo; sabbattsēsats ga ǃgâiaǂgaob ase ǃgapaǀî tsî ǃKhūb ǃanu tsēsa ǃgôasib ǃnâ ūhâ; ǁîsats ga ǃgôa, sa daob ǀguib ai ǃgûs ose, sa ǂâisa dī tamase tamas ka io, sa ǁhōgu ǀkha ǀgui ǁāxa tamase; 14 ots ge ǃKhūb ǃnâ nî ǃgâiaǂgao tsî ta ge tita ǃhūbaib di ǀgapi ǃkhaigu ai nî ǃgapi kai tsi. Sa aboxab Jakob di ǀumis ǀkha ta ge nî ǂûmā tsi, ǃKhūb go ǃhoa xui-ao.
© Khoekhoegowab Elobmîs © Bible Society in Namibia, 2020.
