ǃKhūbǀkhommi di ǁguibas
1 ǃKhūb ge ra mî:
“Sadu, ǁgâ hâdu hoado, ǁgam-i ǃoa hā re;
tsî sadu mari-e ūhâ tamado,
ǀkhī î hā ǂû tsî ā!
Hā î, ǂauxûi-i tsî dai-i tsîna
marioǃnâse tsî ǂganǀgau-i ose hā ǁama.
2 Tare-e du sadu mari-e pere tama-i ai ra ǁamaxūba
tsî ǂâu kai taman ǃaroma ra sîsen?
ǂŌrisase ǃgâ te, î ǃgâi a-e ǂû,
tsî ǂoaǂamsa ǂû-i ǀkha ǃgâiǃgâisen.
3 “ǃGaoǃgâ, î tita ǃoa hā;
ǃgâ, î du ûi ǁkhā!
Tita ge sadu ǀkha ǀamo ǃgaeǀhaosa nî dī,
ti ǁaposa, hâhâ ra ǀnammi Davida ta ge mîmâibaba.
4 Mû, tita ge ǁîba ǁaedi ǃkhō-amaose ge dī,
ǁaedi ǂgaeǂgui-ao tsî mîmā-aose.
5 Mû, ǀū du a ǁaede du ge nî ǂgai
tsî ǁaedi hîa du a ǀūdi ge sadu ǁga nî ǃkhoehā,
ǃKhūb sadu Elob ǃaroma.
ǁNāb Israels di ǃAnub ge sado ǂkhaiǂkhai xui-ao.”
6 ǃKhūba ôa re, hōhe ǁkhāb a hîa,
ǁîba ǂgaiǀî re, ǀgūseb hâ hîa.
7 An eloxoresana ǁîn daoga ǁnāxū
tsî ǂkhabadī-aona ǁîn ǂâide.
An ǁîna ǃKhūb ǃoa ǃhobasen,
îb ǁîna ǀkhomma mā
tsî sada Elob ge ǁîna ǃnāǂamsase nî ǀûba.
8 ǃKhūb ra mî xui-ao:
“Ti ǂâidi ge sadu ǂâi tamade
tsî sadu daogu ge ti dao tamaga.
9 ǀHommi ǃhūbaib xa a ǀgapi,
khami gu ge ti daoga sadu daogu xa a ǀgapi
tsî ti ǂâide sadu ǂâidi xa xui-ao.
10 “ǀNanub tsî tsamaros tsîra ǀhomma xu ǁgôaxa,
tsî ra ǃhūbaiba ǀâǀâ tamas kōse oa tide.
ǁÎra ge ǀom kai tsî ra ǁhao kai
tsî tsoro-aoba ǃkhomna mā
tsî ǂû-aona ǂû-e ra mā.
11 ǁNātis ge ti amsa xu nî ǂoaxa mîsa nî ī;
ǁîs ge ǀkhaiǃnâse tita ǃoa oahā tide,
xawe ti ǂâibasensa nî dīǀoaǀoa
tsî ǁîsa ta ge sîba ǃaromasa nî dītoa.
12 “Sadu ge ǃgâiaǂgao rase ǂoa
tsî ǂkhîb ǃnâ nî ǂgaeǂguiǂuihe.
Sadu aiǃâ ǁgoe ǃhomgu tsî ǃnâugu ge ǁnaeb ǃnâ nî ǂariǃā
tsî ǃaub di hain hoan ge nî ǁapunǃom.
13 Siprehaidi ge ǁkhūn ǃās ǃnâ nî ǁhai;
mirdehaidi ge ǀkhininin ǃās ǃnâ nî ǁhai.
Nēs ge ǃKhūb di ǂâiǂâisen xūse nî ī,
ǀamo sao-i hîa ǀariǂuiheǁoa-i ase.”
© Khoekhoegowab Elobmîs © Bible Society in Namibia, 2020.
