Jerusalems ǃoa hâ ǁkhaeǂgaomîdi
1 “Tita ǃgâ, sadu ǂhanu-aisiba ra ôado,
sadu, ǃKhūba ra ôadu hoado!
ǃGareǀuib ǁîba xu du ge ǁhāǂuiheba mû
tsî tsaub ǁîba xu du ge khaoǂuiheba!
2 Abrahammi sadu îb,
tsî Saras sado ge ǃnaes tsîra kō.
Tita ge ǂgai bi, ob ge ǁîba ǀguri ge hâ i,
xawe ta ge ǁîba ǀkhae tsî ǂgui suriba ge mā.
3 “ǃKhūb ge Sionsa nî ǁkhaeǂgao;
ǁîb ge hîkākāhe ge ǃkhaidi hoade nî ǁkhaeǂgao.
Tita ge ǃgaroǃhūba Edenni khami nî dī,
tsî ǁîs ǀgopaǃhūba ǃKhūb di ǃhanab khami.
ǃGâiaǂgaob tsî dâb tsîkha ge ǁîs ǃnâ nî hâ,
gangans tsî ǁnaetsanas ǀōba.
4 “Ti khoedo, ǃgâ te
tsî ti ǁaese, ǃgaoǃgâ te!
Tita xu-i ge ǁkhāǁkhā-e nî ǂoa
tsî ti ǂhanuba ǃnâb ase khoen ǃoa.
5 Tita ge ti ǂhanu-aisiba ǃhaese nî ǀgūǀgū,
ti ǃgâiǃōsib ge ge ǂoa
tsî tita ge ti ǁaesa nî ǂgaeǂgui.
ǃNāǃnuidi ge nî ǃâu te
tsî ti ǂgaeǂguis ain ge nî ǂgomaiǂnûi.
6 Sadu mûde ǀhommi ǃoa kōkhâi,
î ǁnāpa xu ǃhūbaib ǁga kōǁnâ!
ǀHommi ge ǀanni khami nî kā,
ǃhūbaib ge sara-i khami nî ǀoro
tsî ǁanǂgāsaben âb ge ǀgînan khami nî ǁō.
Xawe ti ǃgâiǃōsib ge ǀamose nî hâ
tsî ti ores ge tātsē ǀamǀamhe tide.
7 “Sadu ǂhanu-aisiba ǂando, ǃgâ te re,
sa khoedu ti ǁkhāǁkhāsa ǂgaogu âdu ǃnâ ǃkhōǀgaipe hâdo.
Tā nau khoen xa mîǁgaiǁgaihesa ǃao
î tā ǁîn ǃkhāǃkhādi xa ǂkhabuǂâi.
8 ǁGurigu ge ǁîna sara-i khami nî hapu
tsî ǂunib ge ǁîna gūǀûn khami nî hapu!
Xawe ti ores ge ǀamose nî hâ
tsî ti ǃgâiǃōsiba hoaraga surib ǃaroma.”
9 ǃKhūb di ǁôatse,
ǃnoaǂkhai, ǃnoaǂkhai î ǀgaiba ana!
ǃNoaǂkhai ǃkharu ge ǁaegu ǃnâs khami;
hugas di ôananôagub ǃnâs khami!
Sa tamatsa Rahaba ge ǁhāǃātsa,
hurib draka ge ǃkhāǃganutsa?
10 Sa tamatsa hurib ǁgamma ge ǂnâ kai tsa,
ǁgamgu kai ǃgammi ai ge hâ iga?
Sa tamatsa hurib ǃgamsiba,
ǃnoraǃnorahe hân di ǃgûdaob ase ge dītsa?
11 ǁNā-amagan ge ǃKhūb di ûiǃgau hâna oahā
tsî ǁnae rase Sions ǃnâ nî ǂgâ.
ǀAmo ǃgâiaǂgaob ge ǁîn danadi ai nî hâ.
ǁÎn ge ǃgâiaǂgaob tsî dâba nî ǃkhōǃoa,
ǃoab tsî ǀhâimâiǀoms tsîn ge nî bē.
12 ǃKhūb ge ra mî:
“Tita, tita ge ǁîta, sado ra ǁkhaeǂgao ta.
Tare-i ǃaromats ǁō nîse ī khoe-e ra ǃao,
khoe-i ǀgâ-i khami ra kā-e?
13 ǃKhūb, sadu Kuru-aob,
ǀhomma ge ǃāǂuib
tsî ǃhūbaiba ge ǃgaoǃgaoba du ge ge ǀuru.
ǀÛ tamase du ge ǁgâiǀā-aob ǁaiba tsēs hoasa ra ǃao,
hîkākā nîse ǀguib ǂhomisen hâ amaga.
Xawe ǁgâiǀā-aob ǁaiba mâpab hâ?
14 ǁGâiǀāhe hân ge ǃhaese nî ǃnoraǃnorahe;
ǁîn ge ǁō tsî āb ǃnâ ǁgôa tide,
tamas ka io pereb âna tôasi tide.
15 “Tita ge ǃKhūta sadu Elota,
hurib ǃgabiga ra ǁgao kai ta,
tsî ǃgabigu âba ra ǀō kai ta,
ǃKhū Hoaǀgaixab ti ta ge ǀon hâ!
16 Tita ge ti mîde sa ams ǃnâ ge ǂgā
tsî ti ǃommi sommi ǃnâ ge sâu tsi.
Tita ge ǀhomga ǃāǂui tsî ǃhūbaiba ge ǃgaoǃgao ta
tsî ta ge Sions ǃoa ra mî: ‘Sadu ge a ti ǁae.’ ”
Jerusalems tsâb di ǀams
17 ǃNoaǂkhai, ǃnoaǂkhai,
îs khâimâ Jerusalemse!
Sas ǃKhūb ǃomma xu ǁîb ǁaib ǀgabisa gere ās,
ǀhoro kai ra ǂgomab, ǃnaka xapas ǃnâ ǁgoeba gere āse!
18 Hoaraga ǀgôan hîas ge ǁoran
ǃnâ i ge ǀgui-i tsîna ǀkhai ǁîsa nî ǂgaeǂgui-e.
Hoaraga ǀgôan hîas ge kaikain
ǃnâ i ge ǀgui-i ǁîsa nî ǃkhōǁôa-i tsîna a ǀkhai.
19 Nē ǀgam xūn ge ge hāǂam si:
Tari-e sas ǀkha nî ǃoaǀhao?
Hîkākās tsî ǂkhūǂkhūs,
ǃâtsūǀkhāb tsî gôab tsîna;
Tari-e sasa nî ǁkhaeǂgao?
20 Sa ôan ge go ǃgaiǁō,
ǁîn ge ǀûis ǃnâ ǃkhōhe hâ ǁkhama-i khami,
mâ ǃganni hoab di ǁhôas ai ǁgoe.
ǁÎn ge ǃKhūb ǁaib xa ǀoa hâ,
sa Elob di ǂgōǀaus xa.
21 ǁNā-amaga, sadu tsuihe hâdo nēsa ǃgâ,
sadu ǀhoro hâdo, xawe ǂauxûib xas ose.
22 Nētib ge Hoaǀgaixa ǃKhūb, sadu Elob,
ǁaes âb di ǁhōba ra ǀkhomababa ra mî:
“Mû, ǀhorob di āǀgabisa ta ge sa ǃomma xu ra ūbē,
ǁkhawa du ge ti ǁaib di xapasa xu ā tide.
23 Tita ge ǁîsa sadu ǁgâiǀā-aon ǃomǁae nî mā,
nēti ge sadu ǃoa mîna: ‘ǁGoe, î da sadu ai ǃgû,’
tsî du ge sadu ǁâba ǃhūb ase nî dī
tsî ǃganni ǁîn nî ǃgû-aib ase.”
© Khoekhoegowab Elobmîs © Bible Society in Namibia, 2020.
