Jesaja 5 - Khoekhoegowab New Translation 2020 (KKG20)

ǂAuxûiǂûǃhanab di ǁnaetsanas

1 Ti ǀhōsaba ta ge nē amsa ra ǁnaeba,

ǁîb draibeǃhanab xa hâ ams, ti ǀhōsab ǃoa:

Ti ǀhōsab ge draibeǃhanaba

kaise ǂûtanixa ǃnâus ai ūhâ.

2 ǁÎb ge ǁîba ǃkhāǃkhuri, ǀuina ūǂui

tsî sabiǂuisa draibehaiga ge ǃhana.

ǁÎb ge ǂgō-omma ǁaegub ǃnâ ommâi,

tsî draiben ra ǀāǃnâhe āsa ge khao.ǁÎb ge ǂgō-omma…ǀāǃnâhe āsa ge khao

ǁÎb ge draiben nî ǁan ǁaeba ge ǃâu,

xawe di ge ǀkhuru draibedi ǀguide ge ǂoaxa.

3 ǁNā-amaga, Jerusalems ǁanǂgāsabedu tsî Judab khoedo, nēsi tita tsî ti draibeǃhanab tsîn ǁaegu ǀgoraǃgâ re. 4 ǀNai ta ge ti draibeǃhanab ai a dīna kha ǂâu tama hâ? Tare-i ǃaroma ta kha ǃgâi draiben di ǃās ǃnâ ǀkhuru draibena nî ǃora?

5 “Nēsi ta ge tare-e ta ti draibeǃhanab ǀkha nî dī ǃkhaisa nî mîba du. ǁÎb ǂnamipe hâ ǁkhū-omǂnamiba ta ge nî ūbē, tsîb ge nî hapuhe; ǁîb ǂnubiǂgoaba ta ge nî khôaǁnâ tsîb ge ǁîba nî dāǃgâhe. 6 ǁÎba ta ge ǀapob ase nî dī; ǁîba ta ge ǃaruǀî ǃgao tamas ka io ǃkhāǃkhuri tide; ǁîb ge ǁîǁhain tsî ǁkhūn tsîn xa nî ǁhaiǃnâhe; ǁkhāti ta ge ǃâude nî mîmā î di tā ǀapi.”

7 Amase, Israeli ge ǃKhūb Hoaǀgaixab di draibeǃhana;

tsî Judab khoen ge ǁîb ge ǃhana ǁkhoaxa ǂgona.

ǁÎb ge ǂhanu-aisiba gere ǃâubasen,

xawe ǀaoǂnâxūsa ǁnās ǃās ǃnâ ge mû;

ǂhanub ǃās ǃnâ,

xawe ǁnâuǀnamoǃnâsiba go ǃkhōǃoa.

Khoen ra ǃaroma tsūǀkhāb

8 ǀÂxarexūsa du ge sadu nē oms, nau oms ti ra ǀhaoǀhaodu, nē ǃhanab, nau ǃhanab ti ra ǀarodo, ǃkhai-i xare-i nî ǀkhai tsî du sadu ǀguido ǃhūb ǃnâ nî ǁanǂgāsabes kōse. 9 ǃKhūb Hoaǀgaixab ge tita ge mîmā: “ǂGui omdi ge nî ǃū-aisa, kai tsî îsa omgu ge ǁanǃnâhe ǁoase nî mâ. 10 Amase, kai draibeǃhanab ge ǀoro ǃgôab litergu ǂauxûi-i ǀgui-e nî ǀkhī-ū tsî ǃkhomas ǃkhomn ge ǂkhari ǃgôab di ǃhoron ǀguina nî ūǀkhī.”

11 Ā, sats ge ǀgaisa āxū-e ās ǃaroma ǃnauǁgoaga ra khâimâ, tsî ǃuis kōse ǀhorots nîs kōse ra ā. 12 Sadu ǁâudīgu tawa du ge harpdi, ǃkhomǃkharurudi, ǂnunigu tsî ǂauxûib tsîna ūhâ, xawe du ge ǃKhūb dīga mûǂan tama hâ, tamas ka io ǁîb ǃomkha sîsenna ǃgapaǀî tama hâ. 13 ǁNā-amagan ge ti khoena ǀūn ase ǃkhōsis ǃnâ ra ǂgâ; ǁîn ǂgaeǂgui-aogu ge ǃâs xa ra ǁō tsî ǂnubidi ân ge ǁgam-e ūhâ tama hâ. 14 ǁNā-amagab ge ǁŌhân Hâǃkhaiba ǁîb turaba kaikai tsî ǁîb amsa harase ra ǁkhowa-am; Jerusalems ǂgaeǂgui-aogu tsî ǁîs ǂnubidi tsîn ge nî hîkākāhe, ǁîs ǂkhupixa ǂnubis, ǁîs ǃnâ hâs hoas ǀkha.

15 Mâ khoe-i hoa-i ge taotaohe tsî nî ǃgamǃgamhe; ǀgapiǂâixan ge nî ǃgamǃgamhe. 16 Xawe ǃKhūb Hoaǀgaixab ge ǂhanub âb ǃaroma ra ǀgapiǀgapihe tsîb ge ǃAnu Eloba ǂhanu-aisib âb ǃnâ-u ǃanusib âba ra ǁgauǂui. 17 ǁKhaoron ge ǁîn ǃûǃhūb a xū-i khami ǃkhū hâ khoen di ǀapob ǁaegu ǀgâna nî ǃû, tsî piriron tsîn ge ǃûxūna nî hōbasen.

18 Ā sadu ǁoreba ǂhumib tsurigu ǀkha ra ǂgaesaodu ge ǀâxarexūhesa a anu, sadu ǁoreba kunis tsurigu ǀkhas khami ra ǂgaesaodo. 19 ǁÎn ge ra mî: “Ab ǃKhūba ǃhaese dī, ab ǁîb sîsenga ǃhaese dī, î da mû ǁkhā; ab Israeli di ǃAnuba ǁîb ǀapesa dīǀoaǀoas ǀkha ǃnoe, î da ǁîsa ǂanǁapo ǁkhā.”

20 Ā sadu ǂkhababa ǃgâib ti ra ǃgapaǀîdo tsî ǃgâiba ǂkhabab ti, ǃnâba ǃkhaenas ti ra ǂgaido tsî ǃkhaenasa ǃnâb ti, sadu au xū-e ǂkhonǂkhon tsî ǂkhon xū-e ra au-audo!

21 Ā sadu mûǁae a gā-aido tsî ǁnâuǃāxa du a ti ǂâisen hâdo.

22 Ā sadu ǂauxûiba ās ǃnâ du a danao ti ǂâisen tsî ǀgaisa āxūna habas ǀkha ra koasendo, ǀâxarexūsa du ge a! 23 Sadu ǀhapixa-e ǃnoraǃnora tsî ǀhapio khoe-e ǁî-i ǂhanuba ra ǀhanado. 24 ǁNā-amaga, ǀaes di nammi ra ǀgâna hapu khami tsî ǂnâsa ǀgân ra ǀaes ǁhabub ǃnâ ǂhubiǂui khamib ge ǁîn ǃnomaba nî gunutoa tsî ǁîn ǁharedi ge tsarab khami nî kā; ǃKhūb Hoaǀgaixab ǁgui-aisan go ǂhara xui-ao tsî Israeli ǃAnub di mîsan ge ǃharaxū xui-ao. 25 ǁNā-amagab ge ǃKhūba ǁîb khoen ǀkha ǁaixa hâ tsî ǁîna ge ǂnau. ǃHomgu ge ge ǂgubi tsîdi ge khoen sorode ǀarub khami ǃgangu ǃnâ ge ǁgoe i. Nēs ge ī, xaweb ge ǁîb ǁaiba ge aiǃgû tsîb ge ǁôab âba ǂgae-oa tama ge i.

26 ǃNūse hâ ǁae-eb ge sao-i ǀkha ra nape, ǁîb ge ǁîna ra ǂnam, ǃhūbaib di ǀkhâuǀamde xun nî ǀkhīse. Mû, ǁîn ge ǃhaese tsî ǃnoesase ǃgoaxa! 27 ǁÎn ge tsau tamas ka io ǃnôa tama, ǂomhî tamas ka io ǁom tama hâ. ǁÎn di kamanagan ge xore tamas ka io sân nîga ǀkhapudi âna ǂgaeǂui tama hâ. 28 ǁÎn di ǂāgu ge ǀāǀātoasa tsî khādi ân ge ǂhomitoasa. ǁÎn hān di ǁkhoradi ge ǀkhōǀuis khami ǃgari tsî ǁîn torokunidi ǀnūdi ge ǁgaoǂoas khami ī. 29 ǁÎdi ge xammi khami ra ǃguru; ǂkham xamn khami di ge ra ǃguru. ǁÎdi ge ǃguru tsî ǁîdi amǀnē-e ra sauru, tsî ǁî-e ǃkhō tsî ra tanibē, tsî-i ge khoe-e ǁî-e huiǂui ǁoa.

30 ǁNā tsēs ai di ge hurib di ǀōb khami ǁîdi amǀnē-e nî ǃguruǃgâ. Khoe-i ga ǁnā ǃhūb ǃoa kō, o ra ge ǃkhaenas tsî ǂōǂōsib tsîra ǀguira nî hâ; tsîb ge ǃnâba ǃâudi xa nî ǃkhaeǃkhaehe.