1 “Beli ge ge ǃhon, Nebob ge ge ǃgamǃgâ;
ǁîkha īgu ge dâukin ai ra ǃnaohe;
sakho ge ǃgom ǃnaob ase ǀnai tsau hâ dâukina ība.
2 ǁÎn ge ǁkhā ǁoa tsî ge ǃgamǃgâ,
ǁîn ǃgomman ge ge tani ǁoa,
tsîn ge ǁîn ǂûna ǃkhōsis ǃnâ ge ūǃgûhe.
3 “Jakob ommi dido,
ûiǃgau gedu Israeli ommi dido,
ǃnaetsēs âdo xu tita xa ge tanihedo,
ǁhās ǃnâ du hâsa xu tita xa ge tanihedo,
tita ǃgâ re.
4 Sadu kairasib ǃnâs tsîna tita ǀguita
tsî ǀhaidanasis kōses tsîna ta nî tani du.
Tita ge ge kuru du tsî ta ge nî tani du,
tita ge tani tsî nî ore du.
5 “Tari-i ǀkha du nî ǀgopeǀnō te
tsî tari-i ǀkha nî ǀguiǀgui te?
Tari-i ǀkha du nî ǀgopeǀnō te
tsî tari-e tita khami nî ī-e?
6 ǁÎn ge ǃhuniǀuriba mariǁgarusa xu tsoroǂui
tsî ǀhaiǀuriba ǀnō-ūdas ai ra ǀnō.
ǃHuniǀurikuru-aoban ge ge ǃgae,
ǁînab elo-e nî kurubase;
tsîn ge ǁî-i aiǃâ ǃhonǁgoa tsî ǁî-e ra ǀgoreǀî.
7 ǁÎn ǃhōgu ai ǁî-e ǁgui tsîn ge ǁî-e ra tani,
ǁî-i ǃkhais ain ge ǁî-e kurumâi ra tsî-i ge ǁnāpa ra mâ.
ǁÎ-e xu i ge aitsama ǃgû ǁoa.
Khoe-i ga ǁî-i ǃoa ǃauǂgai,
xawe i ge ǃeream tama,
tamas ka io ǁî-e ǃgomsiba xu huiǂui tama hâ.
8 “Sadu ǁore-aodo, nēsa ǂâihō, î ǂâiǃgâ;
ǁîsa ǂâis ǃnâ ǃkhōǀgara.
9 ǀNai ge ī xūna ǂâihō,
tita a Elo tsî i ǀnî-i xare-e ǀkhai xuige.
Tita ge Elota
tsî-i tita khami ī-e a ǀkhai.
10 Tita ge ǀnai tsoatsoas ai ǀams xa ge ǂanǂan;
ǀnai ta ge noxopa nî ī xūna nēti ge ǂhôa:
‘Ti ǀapes ge nî hâhâ
tsî ta ge ti ǂâibasensa nî dīǀoaǀoa.’
11 Tita ge ǃariǃkhā-e amǀnē-i ǃaroma aiǂoasa xu nî ǂgai,
tsî ti sîsenǂui-ao-e, aiǂoasa xu.
Tita ge ge ǃhoa tsî tita ge ǁîsa nî ī kai,
tita ge ge ǃaroma tsî tita ge ǁîsa nî dī.
12 “Sa ǃnâudanaxado, tita ǃgâ,
sadu oresa xu ǃnūse hâdo.
13 Ti oresa ta ge ra ǀgūǀgū, ǁîs ge ǃnū tama hâ
tsî ti ǃgâiǃōsib ge ǀhabe tide.
ǃGâiǃōsiba ta ge Sionsa nî mā,
Israela ti ǂkhaisiba.”
© Khoekhoegowab Elobmîs © Bible Society in Namibia, 2020.
