Jesaja 32 - Khoekhoegowab New Translation 2020 (KKG20)

ǃEreamxa gao-aob

1 Mû, gao-ao-i ge ǂhauǃnâsib ǀkha nî ǂgaeǂgui tsî ǂamkhoegu ge ǂhanu-aisib ǀkha nî ǂgaeǂgui. 2 Mâb hoab ge ǀgaisa ǂoab ǃnâ sâuǃkhaise nî ī; ǀgaisa ǀnanub ǃnâ ǃgareǀuise; ǂnâsa ǀkharib ǃnâ, ǁgamǃāgu khami nî ī. ǁÎgu ge ǂgā tsî ǃū-aisa ǃhūb ǃnâ kai ǃgareǀuib sommi ase ī. 3 On ge mû gerena mûǀû tide tsî ǁnâu gerena ǁnâuǀû tide. 4 ǃGâise ǂâiǃgâ tamase ra ǃhaese xū-e dī-i ge nî ǃgâi ǀgoraǃgâ-ao kai, ǃgāsase ǃhoa taman namgu tsîn ge supuse tsî ǁnâuǃāxase nî ǃhoa. 5 Gâre khoe-i ge ǃaruǀî ǃgôahesa-i ase ǃgôahe tide tamas ka io i ge ǀhôagao khoe-e ǃaruǀî ǂhauǃnâ-i ase ǃgôahe tide. 6 Gâren ge gâresib ǀguiba ra ǃhoa tsî ǁîn ge tsūdīb ǀguiba ra ǀape. ǁÎn ge eloxoresa xūna dī tsî ǂgaeǂhapu ra xūna ǃKhūb xa ra ǃhoa; ǁîn ge ǃâsana ǂûn nî xū-i xare-i tamas ka io ǁgâsana ān nî ǁgam-i tsîna mā tama hâ. 7 ǀHôagao khoe-i ǀgaugu ge a ǂkhaba; ǁîn ge mâtin ǀgâsa khoena ǂhumib ǀkha nî ǀhôagaoǃnâ ǀgausa ra ǀape, ǀgâsa khoen di ǀkhomas ga ǂhanu-ai xawe. 8 Xawe ǂhauǃnâ khoen ge ǂhauǃnâ ǀapeǁguiga ra dī, tsî ǂhauǃnâsib xa ra mâǂoa kaihe.

ǀGoraǃgâs tsî dī-unus

9 Sa tarekhoeso, ǁūse hâso, ti domma ǁnâu re! Sa ǀgôaso kaise sâsase hâso, ti mîde ǃgâ re! 10 Saso kaise sâsase kurib di ǁaeb ǃnâ hâso ge ǃaob xa nî xāǂgāhe, draiben ǃgaos ge nî ǁgai tsî haiǂûn ǃgaos ge hā tide. 11 Sa tarekhoeso, ǁūse hâso ǀkhū re! Saso sâsase hâso, ǃaob xa ǀkhū re! ǁHûsen, î so ǀōǀkhāse ǁgauǂuisen! Saso kamanagu ai ǀhaosaraga ǃgae! 12 ǃHanagu, îsa ǃhanagu tsî ǂûtanixa ǂgonagu ǃaroma ǃoab ǀkha saso ǁkhaigu ai ǂnau! 13 Ti ǁaes di ǃhūb ge ǁkhūn tsî ǀkhininin tsîn xa ǀgui nî ǁhai-aihe xui-ao; ā, hoaraga dâxa omdi ǃgâiaǂgaob ǃās dide āba re! 14 Gao-ommi ge nî doexūhe, ǂanǂansa ǃās ge nî ǃū-aisa. ǃNâub tsî ǂgō-ommi tsîkha ai i ge khoe-e ǁkhawa hâ tide. ǃGarodâukigu ge ǁnāpa hâsa ǀnam tsî gūn ge ǁnāpa ǃûǃkhaisa nî hō.

15 Nēs ge Gagab ǀgapiseba xu nî ǁhōǂuihe tsî ǃgaroǃhūba ǂûtani ra ǃhū kai tsî ǂûtanixa ǃhūba haiǀgom kais kōse ti nî hâ. 16 Ob ge ǂhanu-aisiba ǃgaroǃhūb ǃnâ nî ǁan tsîb ge ǂhauǃnâsiba ǂûtanixa ǃhūb ǃnâ nî hâ. 17 ǂHauǃnâsib ge ǂkhîba nî ǃaroma tsî ǂhanu-aisib ǃkhommi ge ǃnōsasib tsî ǂgomǃgâsib tsîkha ǀamos kōse. 18 Ti khoen ge ǂkhîb ǃnâ nî ǁan, ǁaposa hâǃkhaigu ǃnâ tsî ǃnāsa, sâsa ǃkhaidi tawa. 19 Xawe haiǀgoms ge hoaragase nî bē tsîs ge ǃāsa nî khôaǁnâhe. 20 ǀKhaehen ge nî ǁnā khoen ǁgamǃāgu xōǀkhā ǃkhomna nî tsorona, ǁnān gomagu tsî dâukigu âna ǃnorasase ǁnāpa nî ǃû kaina.