1 ǁNā tsēs aib ge ǃKhūba ǁîb ǀā, kai tsî ǀgaisa gôab ǀkha ǃkhoeni ra ǀaob Leviatanna nî ǂnau, ǂgunixa ǀaob Leviatanna tsîb ge ǁîba hurib ǃnâ hâ draka nî ǃgam.
2 ǁNā tsēs ai ǃgâi draibeǃhanab xa nēti ǁnae re: 3 “Tita ǃKhūta ge ǁîba ra ǃûi; tita ge ǁîba mâ ǁaeb hoaba ra ǀâǀâ ta. Tita ge ǁîba tsuxuba tsî tsēa ra ǃûi, khoe-i xare-i xab ǂkhôahe tidese. 4 ǁAixa tama ta hâ. ǁKhūn tsî ǀkhininin tsînab ga hā-ū hâ, o ta ge ǁîn ǃoagu khâimâ tsî ǁîna ga ǂhubiǂui hâ. 5 ǁNā tamas ka io, on ge ti ǁkhaubasa nî ôa, în tita ǀkha ǂkhîba kuru, an tita ǀkha ǂkhîbagusa dī.”
6 Jakob ge hā ra tsēdi ǃnâ nî ǃnomaǃkhō; Israeli ge ǁhare tsî ǂgonaga nî ūhā tsî hoaraga ǃhūbaiba nî ǂûtaniǀoa.
7 ǃKhūba kha Israela ǁîb ǁgâiǀā-aonab ge ǁkhara khami ge ǁkhara? Tamas ka io Israelab ǁîb ǃgamaon khami ge ǃgam? 8 ǃKhūtse, sats ge ǃkhōsis ǃnâ-u ǁîna doeǁgabēs ǀkha ǁîn ǃoagu ge khâimâ; aiǂoas ǁaixa ǂoab ǀkhats ge ǁîna sa aisa xu ge ǃgombē. 9 ǁNā-amagab ge Jakoba ǁorena nēs ǀkha ǀûbahe tsî ǁîn di ǁoren go hoaragase ǀûbahe ǃkhaisa nî ǁgau: Nēs ge ǁîb ga hoa ǀui-altarde tsaob khami khôatsautsau osa; ǁgôa-elos Aseras tamas ka io ǃgâihamxūn di altardi tsîn ge ǃgau tide.
10 Omǂnamisa ǃās ge ǃū-aisase ǁgoe. ǁÎs ge ǃgaroǃhūb khami ǁnāxūhe tsî ǃū-aisase ǁgoe. Tsâun ge ǁnāpa nî ǃû; ǁîn ge ǁnāpa ǁgoe tsî hoaraga ǂnarega nî hapu. 11 Haidi ǁnâugu ge ǂnâ tsî khôaǁnâ hâ; taradi ge hā tsî ǁîgu ǀkha ǀaesa ra khau. Nē ǁaes ǁnâuǃā-e ūhâ tama xui-ao ge ǁîna ge kuru Eloba ǁîna ǀkhomxaǂgao tide; ǁîna ge kurub ge ǁîna ǀkhom tide.
12 ǁNā tsēs aib ge ǃKhūba, Eufratǃgoaǃnāba xu Egipteb ǃāb kōse hâ ǃnomaba ǃkhobo kai tsî ǀguiǀguibese ǁîb khoena nî ǀhaoǀhao, Israelǁîdo.
13 ǁNā tsēs aib ge kai xâiǁnâba nî xâihe tsîn ge Asiriaǃhūb ǃnâ ge kān tsî Egipteba xu ge sauruǂuihe hâ in tsîna hā tsî ǃKhūba Jerusalems ǃnâ ǃanu ǃhommi ai nî ǀgoreǀî.
© Khoekhoegowab Elobmîs © Bible Society in Namibia, 2020.
