Elob ge ǁîb ǁaesa dansa nî mā
1 ǁNā tsēs ais ge nē ǁnaetsanasa Judab ǃhūb ǃnâ nî ǁnaehe:
ǀGaisa ǃāsa da ge ūhâ!
ǃKhūb ge ǁîsa ǂnubiǂgoagu khami ra ǁkhauba!
2 ǃĀs dao-amde ǁkhowa-am
ǂhanu-ai ǃhaos nî ǂgâ ǁkhāse,
ǁnās hoaǁae a ǂgomǂgomsasa.
3 ǃKhūtse sats ai ra ǂgomaiǂnûina
ǂkhîb ǃnâ ǃkhōǀgara,
satsan ra ǂgomǃgâ xuige.
4 ǃKhūba ǀamosib kōse ǂgomǃgâ,
ǃKhūb Elob a ǀamo ǃgareǀui xuige.
5 ǀGapi ǃkhaigu ai ǁan hânab ge ge ǃgamǃgam;
ǀgaisa ǃādeb ge ǃhūb kōse ge ǁgôaxa-ū,
ǁîb ge ǁîde tsarab kōse ge khôaǁnâ.
6 ǁÎdi ge ǀgâsan xa ra dāǃgâhe
tsî ǂhâb ǃnâ hân ǂaidi xa ra ǃgû-aihe.
7 ǂHanu-ain daogu ge ra ǂhauǂhauhe;
sats ǀguits a ǂHanu-aitse,
ǂhanu-ain daobats ge ra ǂhauǂhau.
8 ǃKhūtse, satsa da ge ǃâu hâ;
sa ǀonsa ǃgôa tsî da ge ra ǂgaiǀî tsi ǂgao.
9 Tsuxub ǃnâs ge ti ǀomsa ra ôa tsi;
ti gagas ge ǁkhorexase ra ôa tsi.
Sa ǀgoraǃgâdi ga ǃhūbaib ai hâ,
on ge ǃhūbaib ǁanǂgāsabena ǂhanu-aisiba ra ǁkhāǁkhāsen.
10 ǂKhabadī-ao-ets ga ǃgâisiba ǁgau,
xawe i ge ǁî-e ǂhanu-aisiba ǁkhāǁkhāsen tama hâ;
ǂhanuse ra ûi khoen ǃhūb ǃnâs tsînan ge tsūse ûi
tsî ǃKhūb kaisib tsîna mûǂan tama hâ.
11 ǃKhūtse, sa ǃommats ge ǁîn ǃoagu ūkhâi hâ,
xawen ge ǁnās tsîna mû ǁoa.
An sa ǁaib sa ǁaes ǃoaguts ūhâba mû tsî taotaohe;
as ǀaesa sa khākhoena ǂhubiǂui.
12 ǃKhūtse, sats ge ǂkhîba nî ǀkhae da;
amase, hoa xūn hîa da ge sīǃnâna da ge
sats xa ge dībahe.
13 ǃKhūtse sida Elotse, ǀkhara elogu ge gere ǂgaeǂgui da,
xawe da ge sa ǀons ǀguisa ra ǂanǃgâ.
14 ǁÎgu ge ǁō hâ tsî ǁkhawa ûi tide;
ǁîgu ge a som tsî ǁkhawa khâimâ tide,
sats ge ǁîga ǁkhara tsî hîkākā xui-ao.
Khoe-i xare-i ge ǁîga tātsēs tsîna ǂâihō tide.
15 Xawe ǃKhūtse, sats ge ǁaesa ge kaikai,
ǁaesats ge ge ǂguiǂgui,
xuiges sa ǀonsa ǂkhaiǂkhai.
Sats ge ǃhūǀgoradi ǃhūb didi hoade ge harahara.
16 ǃKhūtse, ǃgomsib ǃnân ge sats ǃoa gere kōkhâi,
sats ge ǁkhara da, o da ge sats ǃoa ge ǀgore.
17 ǁOratsûb ǃnâ hâ taras ra tsûb xa ā,
khamib ge ǃKhūba ra ā kai da.
18 ǀGamǀkhā da ge ge i tsî gere tsû,
xawe da ge ǂoab ǀguiba ge ǁora.
ǃHūbaib ai da ge dan-e ūhâ tama;
tsî khoe-i xare-i ge ǃhūbaiba nî hōbasense ǁorahe tama hâ.
19 Sadu ǁō hân ge ǁkhawa nî ûi!
ǁÎn sorodi ge nî khâimâ.
Tsarab ǃnâ ǁan hân
ge ǁkhawa khâimâ tsî dâxase nî ǁnae.
ǁGoas di ǀaub xa ǁgoe-aihe hâ hain khami du ge ge kai,
ǁnā-amagab ge ǃKhūba ǀnai ge ǁō gagade nî ǂkhaiǂkhai.
ǀGoraǃgâs tsî ǁkhawa dī-unus
20 Ti khoedo, sadu omdi ǃnâ ǂgâ, î dao-amde sadu ǃgâb ai ǂganam. ǁAero-e gaugausen, ǃKhūb ǁaib nî toas kōse. 21 ǃKhūb ge ǁîb hâǃkhaisa xu ra hā ǃhūbaib ǁanǂgāsabenab ǁîn ǁoren ǃaroma nî ǁkharase; ǃhūbaib ge ǃaruǀî ǀaoǂnâxūsa ǃgū-ai tide xawe ǃgamhe hâna nî ǂhaisa kai.
© Khoekhoegowab Elobmîs © Bible Society in Namibia, 2020.
