ǃKhūb ge ǃhūbaiba nî ǁkhara
1 ǃKhūb ge ǃhūbaiba hîǀhuru tsî nî ǀkhaiǃnâ kai, ǁîb ge ǃhūbaib di ība ǁgaiǁgai tsî ǁanǂgāsabena nî ǀgaruǀgaru. 2 Nēs ge hoaraga khoen ǀkha nî ī: Pristergu, khobon, ǀhonkhoegu, ǃgādi, ǀhonkhoedi, ǁama-aon, ǁamaxū-aon, surude-aon, ǀkhupi-aon, marimā-aon tsî mariǃkhōǃoa-aon tsîn ǀkha. 3 ǃHūbaib ge hoaragase hîkākāhe tsî ǀkhaiǃnâse nî ǁnāxūhe, ǃKhūb ge nē ǁkharaba ǃhoa xui-ao.
4 ǃHūbaib ge ǂnâ tsî nî kā, ǃhūbaib ge ǂkhabu tsî nî kā; ǀhommi tsî ǃhūbaib tsîn hoan ge nî bē. 5 ǁAnǂgāsaben âb ge ǃhūbaiba ge ǃanuoǃnâ kai; ǁîn ge ǂhanuga ǃûǂam, mîmāde mâǃoa tsî ǀamo ǃgaeǀhaosa khôa amaga. 6 ǁNā-amagab ge Eloba ǀâxareba ǃhūbaib ǂama ge gowaǂui tsî ǁanǂgāsaben ge ǁîn ǁoren ǃaroma ra matare. ǁNā-amagan ge ǁîna ra kā tsîn ge kaise ǀoro khoen ǀguina nî ǃgau. 7 ǂAuxûib ge ra ǂnâ, ǂgonagu ge ra ǂnâtoa, ǃgâiaǂgao geren ge ǃoa hâ. 8 ǃKhomǃkharurudi dâxa ǀōb tsîn ge ge toa, ǃgâiaǂgao ran di ǂkhupib tsîn ge ǀams ai ge hā tsî harps di dâxa ǀōb tsîn ge ge toa. 9 ǃAruǀîn ge ǂauxûiba ā tsî ǁnae tama hâ; ā geren ǃaromab ge ǀgaisa xûiba a au. 10 ǃŪ-aisa ǃās ge khôaǁnâhe hâ, mâ oms hoas ge khoe-i tsîn ǂgâ tidese a ǂganamsa. 11 ǂAuxûib a ǀkhai ǃkhais ǃaroman ge khoena ǃgangu ǃnâ ra ǃgaema; ǃgâiaǂgaob hoab ge ǃoab ǃnâ ge ǀkharaǀkharasen; ǃgâiaǂgaob ge ǃhūbaib ai ǃaruǀî a ǀkhai. 12 ǃĀs ge hîkākāhes hâ mâsib ǃnâ hâ, ǂgâ-amdi âs ge ǀapob ase ǀgui ī. 13 Nēs ge hoaraga ǃhūbaib ai nî ī tsî hoa ǁaedi ǃnâ. ǀKherahaisan ra ǂnau khami i ge nî ī, tsî ǃgaos di ǁaeb khaoǃgân ge ǀoro draiben ǀguina ra ǃgau.
14 Ûiǃgau ran ge ǃgâiaǂgaob ǀkha nî ǁnae; huriǂoas din ge ǃKhūb di kaisiba nî ǂhôa. 15 Aiǂoas din ge ǁîba nî ǀgapiǀgapi, huri-ammi ai ǁan hân ge ǃKhūb Israeli Eloba nî ǃkhōǀkhā. 16 ǃHūbaib di ǀkhâuǀamsa xu da ge karetsanade ra ǁnâu, ǂHanu-ai ǀGuib di ǂkhaisib ǃoa. Xawe ta ge ra mî: “Toa ta ge ra, toa ta ge ra! Tita ge ǀâxarexūsa! ǀHôagaoǃnân ge ra aiǃgû gāxaǃnâs ǀkha, ǀhôagaoǃnân ge ǂōrisase ra gāxaǃnâ.” 17 ǃAorosasib, ǃgam āb tsî ǁnoas tsîn ge sadu ai hâ, ǃhūbaib ǁanǂgāsabedo! 18 ǃAorosasiba ga ǃkhoeni khoe-i hoa-i ge āb ǃnâ nî ǁnāǂgâ; tsî āba xu ga ǂoaxa-i ge ǁnoas xa nî ǃkhōhe. ǀHommi mûǂuidaodi ǁkhowa-amsa tsî ǃhūbaib ǃgaoǃgaogu ra ǂgubi xui-ao. 19 ǃHūbaib ge ǃâdi ǃnâ khôaǂkhūsa, ǃhūbaib ge ǀgora tsî ǂapaǃā hâ tsî ǁōǁōsase ra ǂgubi. 20 ǃHūbaib ge ǀhoro hâ khoe-i khami ra ǁnākeǁgapi, om-i khami ra gonma; ǁîb ǁoren ge ǁîb ai ǃgomse ra ǁgâi, tsîb ge nî ǁnā, xawe ǁkhawa khâi tide.
21 ǁNā tsēs aib ge ǃKhūba ǀhommi ǃnâ hâ ǀhomsi ǀgaiga nî ǁkhara tsî ǃhūbaib ai ǃhūbaib gao-aoga. 22 ǃKhōsaben khamin ge ǁîna āb ǃnâ nî ǀhaoǀhaohe; ǁîn ge ǃkhō-oms ǃnâ ǂganamǂgāhe, tsî ǂgui tsēdi khaoǃgâ nî ǁkharahe. 23 ǁKhâb ge nî ǃkhae, ǃnâsa sores ge nî ǃkhaeǃkhaehe; ǃKhūb Hoaǀgaixab Sionǃhommi ai tsî Jerusalems ǃnâ nî ǂgaeǂgui xui-ao; tsî ǁîb ǂgaeǂgui-aogu aiǃâ ǃKhūb di ǂkhaisiba nî ǃgaoǃgao.
© Khoekhoegowab Elobmîs © Bible Society in Namibia, 2020.
