Fonisiab xa hâ ǂhôas
1 Nēs ge Tirus xa hâ ǂhôasa.
ǃAu-ā re, Tarsis doe-omso, saso mâǃkhais hîkākāhe hâ xuige. Kitimsa xu di ge oahā, o gu ge nēsa ge ǂan. 2 ǃOa re, sadu huri-ammi di ǁanǂgāsabedo, sadu Sidons di ǂharugu-aodo, sadu sîsabegu ge huriba go ǃgâu, 3 kai ǀgaisa ǁgamma; sago hōǂgās ge Sihori ǃhoro ge i, Nylǃāb di ǃgaosa; sago ge ǁaedi ǂharugu-ao ge igo.
4 Sidonse tao re, hurib go ǃhoa xuige, ǁkhāsib hurib diba: “ǁOratsû-i xare-e ta ge ūhâ tama hâ tamas ka io ta ge ge ǁora tama hâ i; ǂkhamkhoegu tamas ka io ta ge ǂkhamkhoede kaikai tama hâ.”
5 Egipteǁîn ga ǁnâu, tare-i ge Tirus ǃnâ ī ǃkhaisa, on ge ǁîna kaise nî ǃhuri.
6 Tarsis ǁga ǃgâu re! Sadu huri-ammi ǁanǂgāsabedo ǃau-ā re! 7 Nēsa ǃgâiaǂgaoxa ǃās ǀoro ǁaeba xu hâsa, ǁîs ǂaira xa ǃnūseba ǃoa ūǃgûhe tsî ǁnāpa ge sī ǁansa? 8 Tari-e nēsa Tirus ǂama ge ǀape; gao-aogu di ǃās, ǁîs ǂharugu-aogu ge ǃhūbaib ai kaise ǃgôahe hâ isa? 9 ǃKhūb Hoaǀgaixab ge nēsa ge ǀape, ǂnīsasib hoaraga ǂkhaisib dibab nî ǃanuoǃnâ kaise, ǃhūbaib ǂammâisagab nî taotaose.
10 Tarsis doe-omso, saso ǃhūb ǁga oa; ǃaruǀî i ǂharugu ǃkhai-e Tarsis ǃnâ ǀkhai xuige. 11 ǃKhūb ge ǁîb ǃomma hurib ǂama ge ǀhōǂui, ǁîb ge gaosiga ge ǀgabi; ǁîb ge Kanaans ǀgaigu nî hîkākāhe ǃkhaisa ge mîmā. 12 ǁÎb ge ge mî: “ǁGâiǀāhe hâ ǀgôas Sidons dise, ǃaruǀîs ǃgâiaǂgao tide; khâimâ î Siprus ǁga ǃgâu, xawe du ǁnāpas tsîna sâ-e ūhâ tide.”
13 Xaldeaǁîn ǃhūba kō re! ǁÎn ge khoesis âna ge ǂoaǃnâ, xawe Asiriaǁî tamana Tirusa ge xamarin hâǃkhaise dīna. ǁÎn ge ǂgō-omgu tsî gao-omgu tsîga ge om, xawe Asiriaǁîn ge ǁîga ge hîkākā.
14 ǃAu-ā re, Tarsis doe-omso, sadu gao-omgu hîkākāhe hâ xuige.
15 ǁNā tsēsa xus ge Tirusa hûdisi kurigu ǁaeba nî ǀuruhe, ǀgui gao-aob ûikuriga. Hûdisi kurigu ǀams ai i ge Tirus ǀkha ǂanǂansa ams ǀai-aodi xa hâs khami nî ī:
16 Sa harpsa ū, ǃāsa ǃgûǂnami,
sas ǀuruhe hâ ǀai-aose!
ǀHuru î saso ǂgui tsanade ǁkhawa ǁnae,
î so ǁkhawa ǁnâuhe ǁkhā.
17 Hûdisi kurigu ǀams aib ge ǃKhūba Tirusa nî sari, ǁîs ge ǂharugub âs ǀkha ǁkhawa nî tsoatsoa tsî hoaraga ǃhūbaib gaosigu ǀkha nî ǂharugutsoatsoa. 18 ǁÎs ǂharugugu tsî mataredi tsîn ge ǃKhūb ǃaroma nî khaihe; ǁîs hōǂgādi ge sâuhe tamas ka io ǀhaoǀhaohe tide, xawe ǁîs ǂharuguga xun ge ǃnāǂamsa ǂûn tsî tsaura saran tsîna ǃKhūb ǃgôasib ǃoa ra ûi khoena nî māhe.
© Khoekhoegowab Elobmîs © Bible Society in Namibia, 2020.
