Jesaja 19 - Khoekhoegowab New Translation 2020 (KKG20)

Elob ge Egipteba nî ǁkhara

1 Nēs ge Egipteb xa hâ ǂhôasa.

Mû, ǃKhūb ge ǃhae ǃâus ai hâse Egipteb ǁga ra ǁgôaxa; Egipteb ǁgôa-elogu ge ǁîb aiǃâ ra ǀkhū; Egipteǁîn ǂgaogu ge ra ǂkhabu. 2 “Tita ge Egipteǁîna Egipteǁîn ǃoagu nî ǃkhāǃnâ, khoeǃgâgun ge ǁîǃnābe nî ǃkham, ǃāde ǃādi ǃoagu tsî gaosiga gaosigu ǃoagu. 3 Egipteǁîn ge ǃao tsî ǀapedi âna ǃgâiǃgâxa kai tama ge i. ǁÎn ge ǁgôa-elogu tsî ǁō hâ khoen gagadi, ǀnoren tsî ǂanǂansa gagadi tsîn ai nî ǀape-ôa. 4 Tita ge Egipteǁîna kaise ǁkhō ǀhonkhoeb ǃomǁae nî māǁnâ; kaise ǁkhō gao-aob ge ǁîna nî ǂgaeǂgui,”

tib ge ǃKhūb Hoaǀgaixaba ra mî.

5 Nylǃāb ǁgamgu ge nî ǂnâ tsîb ge ǃāba ǂnâ tsî nî ǀkhaiǃnâ. 6 ǁÎb ǃgoaǃnāgu ge nî ǀō tsî Egipteb Nylǃāb ǃgabigu ge ǁnoro tsî nî ǂnâ; ǀgom haidi tsî ǂāgu tsîn ge nî ǂnâtoa. 7 Nylǃāb ǀnomammi ra ǂoaxa ǁhaon tsîn ge ǂnâ tsî nî ǃgombēhe tsî ǃaruǀî hâ tide. 8 ǁAuǃkhō-aogu ge ǃoa tsî nî ǃgae; hoan hîa Nylǃāb ǃnâ ǁgabegu ǀkha ra ǁauǃkhōn tsî ǀûide ǃāb ǃnâ ǁauǃkhōs ǃaroma ra aoǂgān ge nî ǃoa. 9 Linesarana gere kuru khoen ge nî taotaohe tsî ǃapisaraǂomaon ge ǃaob xa nî ǃkhōhe. 10 ǃApisaraǂomaon hoan ge nî ǃoa tsî matares ǃaroma ra sîsen khoen hoan ge nî ǂkhabuǂâi.

11 Soans di ǂammâisagu ge kaise gâre; Faraob gā-ai ǀapemā-aogu ge gâre ǀapede ra mā. Amase Faraob ǀapemā-aoga “Tita ge gā-ai khoegu ǁkhāǁkhāsabeta, ǀoro ǁaeb gao-aogu surita, ti mî ǁkhā gu a?” 12 Mâpa gu nēsi sago gā-ai khoega hâ? A gu ǁîga ǃKhūb Hoaǀgaixab ge Egipteb ǃoagu ǀape ǀapede mîba tsî ǂanǂan go. 13 Soans ǂammâisagu ge gâre, Memfis ǂammâisagu ge ǂgaeǂhapusa; ǁîgu hîa a ǁaes di ǁhôaǀuigu ge Egipteba ge ǂgaeǂhapu. 14 ǃKhūb ge ǁîn ǃnâ ǀgomǂâixasib gagasa ge ǂgā. Nēs ǀkhab ge Egipteba tsū xūn ǀguina dī tsî ǁnākeǁgapi ra ǀhorosema-i, ǁî-i ǀkhûib ǃnâ ra ǂkhiri tsî ǁnāma-i khami ra ī kai. 15 Egipteb ge ǃaruǀî xū-i xare-e dī tide, danas tamas ka io ǂareb, palmǂgonab tamas ka io ǂāb tsîn hoana.

Egipteb ge ǃKhūba nî ǀgoreǀî

16 ǁNā tsēs ain ge Egipteǁîna tarekhoedi khami nî ī tsî ǃKhūb Hoaǀgaixab ga ǁîdi ǃoagu ūkhâi ǃommi xa ǃaob xa nî xāǂgāhe. 17 Judab ǃhūb ge Egipteǁîn ǃaroma nî ǃaorosa; mâ-i hoa-i ǁîn di-i ge ǃKhūb Hoaǀgaixab ǁîn ǃoagu ūhâ ǀapeden ga ǁnâu ge nî ǃao.

18 ǁNā tsēs ga hā, o di ge koro ǃādi Egipteb dide Kanaanǃhūb gowaba nî ǃhoa tsî ǃKhūb Hoaǀgaixab aiǃâ nūsa nî dī. ǁÎdi ǀguis ge “Sores ǃĀs” ti nî ǀonǂgaihe.

19 ǁNā tsēs ais ge ǃKhūb ǃaroma altarsa Egipteb ǁaegub ǃnâ nî mâihe, tsî saoǁnâusa ǃKhūb ǃgôasib ǃaroma ǁîb ǃhūǀgoras ai. 20 Nēs ge saoǁnâuse ǃKhūb Hoaǀgaixab ǃaroma Egipteb ǃnâ nî hâ; ǁîn ga ǁgâiǀā-aogu ǃaroma ǃKhūb ǃoa huiǂgai, ob ge ǁîna ore-aoba nî sîba tsî ǁîna ǁkhauba tsî nî ore. 21 ǃKhūb ge Egipteǁîn tawa ǁî-aitsama nî ǂanǂansen; tsîn ge Egipteǁîna ǁnā tsēs ai ǃKhūba nî ǂan tsîn ge ǁîba ǁguibadi tsî khauǁguibadi tsîn ǀkha nî ǀgoreǀî, ǁîn ge ǃKhūba mîmâiba tsî ǁnā mîmâide nî ûiǂui. 22 ǃKhūb ge Egipteba nî ǂnau, ǁîna ǂnau tsî nî ǂgauǂgau; ǁîn ge ǃKhūb ǃoa nî oa tsîb ge ǁîba ǁîn ǀgorede ǃgâ tsî ǁîna nî ǂgauǂgau.

23 ǁNā tsēs aib ge kai daoba Egipteba xu Asiriab kōse nî hâ tsîn ge Asiriaǁîna Egipteb tawa nî hā tsî Egipteǁîna Asiriab tawa. Egipteǁîn ge Asiriaǁîn ǀkha ǀhû hâse nî ǃoaba. 24 ǁNā tsēs aib ge Israela ǃnonaǁîse Egipteb tsî Asiriab tsîkha ǀkha nî hâ, tsî ǃhūbaiba ǀkhaeb ase nî ība. 25 ǃKhūb Hoaǀgaixab ge ǁîn ai ǀkhaeba gowaǂui tsî nî mî: “Ab Egipteb, ti khoen tsî Asiriab ti ǃomkha sîsenni tsî Israeli ti ǀumis tsîna ǀkhaehe.”