Elob ge Etiopiaba nî ǁkhara
1 Etiopiab ǃāgu nauǀkhāb aib ge ǃhūb ǁgabogu ǀōb ra ǁnâuǃnâheba hâ. 2 ǁNāpa xus ge ǂnûǁkhaeba-aogu ǂāgu ǀkha kurusa ǂgaudi ǃnâ Nylǃāba-u ǁgammi ai ra ǃnarisa! Sago ǃhae sîsabego ǃgû re, gaxu tsî ǂkhanu khōba ūhâ khoen ǁaes ǁga, khoen ǀgūseb tsî ǃnūseba xu ra ǃaohena, ǀgaisa tsî dan ra ǁaes, ǁîs ǃhūb ge ǃāgu xa ra ǀgorahe. 3 ǃHūbaib ǁanǂgāsabedu hoado, sadu ǃhūbaib ai ǁan hâdo, ǃkhaub ga ǃhomgu ai ǃkhāhe, o kō! Xâiǁnâs ga xâihe, o ǃgâ! 4 ǁNā-amagab ge ǃKhūba tita ǃoa ge mî: “Tita ge ǃnōsase ti hâǃkhaiba xu nî kōǁnâ, sores ǀkhâuga xu ra hā ǀgammi khami, ǁgoaǂnobos ǃâus ǃgaos di ǀgammi ǃnâs khami. 5 ǃGaos nî tsoatsoas aiǃâ, ǁharedi ra ǁnā tsî ǂûna ǁan ǁaeb ai, ǁîb ge ǂûtani tama ǂgonaga ǃgaoǁnâ tsî ǃhae ra ǁnâuga nî ǁhāǁnâ. 6 ǁÎgu ge ǃhomgu ai ra hâ aniron tsî ǃgarob di ǀgurun tsîna nî ǁnāxūbahe. ǁKhunab ǁaeb ain ge anirona ǁîga nî ǂû tsî hoaraga ǀgurun ge saoǁaeb ǃnâ ǁîga nî ǂû.”
7 ǁNā ǁaeb ǃnân ge gaxu tsî ǂkhanukhō khoen, ǀgaisa khoen ǃnūse tsî ǀgūseba xu ra hān, ǀgaisa tsî dan ra ǁaes din, ǃhūb ân ǃāgu xa ǀgorahe hâba xu, ǃKhūb Hoaǀgaixaba māde nî ūhāba; Sionǃhommi tawa, ǃKhūb Hoaǀgaixab ǀons ra ǂgaiǀîhe ǃkhais tawa.
© Khoekhoegowab Elobmîs © Bible Society in Namibia, 2020.
