1 Mâ ǀgapipristeri* hoab ge khoena xu ǁhûihe tsî ǁînab nî Elob aiǃâ ǂnûǁkhaebase ge ǂgaimâihe, mādi tsî ǁguibadi tsînab nî Elob tawa ǁîn ǁoren ǃaroma ǁguibase. 2 ǁÎb ge ǁnān, ǀūǂamsib ǃnâ ra dīsā tsî ǂgaeǂhapuhena ra ǁnâuǃāba, ǁîb tsîn ǁkhāti aitsama ǂkhabusasib xa ǃnamiǂgāhe hâ xui-ao. 3 Nēs ǃaromab ge ra ǂgaoǀkhāhe, khoen di ǁoren ǃaroma ǀguis ose, xawe ǁîb ǂhunuma ǁoren tsîn ǃaromab nî ǁguibasa dī ǃkhaisa. 4 Tsî khoe-i xare-i ge ǀgapipristerse ǂgaihes di ǃgôasiba aitsama ūbasen tama hâ, xawe i ge Elob xa Aronnab ge ǂgais ǁkhās khami nî ǂgaihe hâ i.
5 ǁNās ǁkhās xaseb ge Xristuba* ǁîb ai ǀgapipristersi ǃgôasiba ū tama ge i. Xaweb ge Eloba ǁîb ǃoa ge mî:
“Sats ge a ti Ôa,
nētsē ta ge go sa Î kai.”
6 ǀNî ǃkhai-i aib ra ǁkhāti mîse:
“Sats ge ǀamos kōse a prister,
Melxisedeki di ǁgaragu ǃoa.”
7 Tsî ǁîb di ǃhūbaisi ûib di tsēdi ǃnâb ge Jesuba, ǁNāb hîa ǁîba ǁōba xu ore ǁkhāba ǃoa ǃgari ǃaub tsî ǁgamrogu ǃnâ ǀgore tsî ge ǀkhoma. Ob ge Eloba ǁîb di eloǃaoǃgâxasib ǃaroma ǀgoredi âba ge ǁnâu-am. 8 Tsîb ge Elob Ôab* a xawe, tsâb âb ǃnâ-u ǁnâuǀnamxasiba ge ǁkhāǁkhāsen. 9 Tsî ǀoasasibab ge sīǃnâ, ob ge ge ǁîba ǁnâuǀnam hân hoan di ǀamo ǃgâiǃōsib di ǀau kai. 10 Tsîb ge Elob xa Melxisedeki di pristersi ǁgaragu ǃnaka ǀGapipristeri ase ge ǂgaimâihe.
Tā Xristub ǃnâ ǂgomǀû
11 Nēs xa ge ge ǂgui xūna mî ǁkhā, xawe i ge kaise ǃgom sado ǁîna ǁguiǃābasa, sadu ǁnâuǃāb ǃnâ a ǂau xui-ao. 12 Nētsē du ge ga ǁkhāǁkhā-ao hâ, xawe du ge ǁnās ǃās ǃnâ ǁkhāǁkhāsa ǂhâba hâ, ǀnî khoe-i nî ǁkhawa ǃgaoǃgaob Elob mîs diba ǁkhāǁkhā du ǃkhaisa. Aibe du ge dai-e nî ā, ǂû-e du nî ǂûs ǃās ǃnâ. 13 ǁNā-i hîa dai-e xu ra ûi i ge tsū xū-i tsî ǂhanu xū-i ǁaegu a ǀgora ǁoa, ganupe i a ǀgôa amaga. 14 Xawe ǀgaisa ǂû-i ge kaikhoen di; ǁîn hōǃâde xu ǃgâin tsî tsūn ǁaegu ǀgoras di ǁkhāsiba ūhâ xui-ao.
© Khoekhoegowab Elobmîs © Bible Society in Namibia, 2020.
