Elob di kai ǃgâiǃōsib
1 ǁNā-amaga da ge ǁnâu da ge amab ai ǃnāsase nî ǃgaoǃgâ, î da tā kāǁō. 2 ǀHomǃgāgu ǃnâ-u gere ǃhoahe mîs ga ǁaposa hâ, tsî mâ ǃûǂam-i tsî ǁnâuǀnamoǃnâsi-i hoa-i ga ǂhanu ǁkharaba ǃkhōǃoa hâo, 3 mâti da kha ǁnâi sada nî ǃnora, nētikō kai ǃgâiǃōsib ai da ga ǃgaoǃgâ tama io? Nē ǃgâiǃōsib ge ǃKhūb xa tsoatsoas ǃnâ ǂanǂanhe tsî ǁnâu gen xa sada ge ǃkhō-ambahe. 4 ǁKhā ǁaeb aib ge Eloba saodi, buruxa sîsengu tsî ǁkhāti ǂguiǃnâgu buruxa dīn tsî ǃAnu Gagab di mādi ǁîb di ǂâisa ǃoa ǀgoraǂuihe hâdi xa gere ǀhûǀgui.
Elob ge ǃgâiǃōsib ǃoa ra ǂgaeǂgui da
5 Elob ge ǀhomǃgāga nē ǃgoaxa ǀasa ǃhūbaiba gaoǂam kai tama hâ, ǁnā ǃhūbaib, ǁîb xa ge ra ǃhoaba. 6 ǀGui ǃkhai-i ai i ge khoe-e nēti ge ǃkhō-am:
“Tare xū-e khoe-e, ots ra ǁî-i xa ǂâi,
tsî khoen ôa-e, ots ra ǁî-e kōǀî?
7 ǂKharirose ǀguits ge ǁî-e ǀhomǃgān ǃnaka dī
tsî ǂkhaisib tsî ǃgôasib ǀkha ge ǀgapa;
tsîts ge hoa xūn sats ge kurun ǂama ǁî-e ge mâi.
8 Xūn hoanats ge ǁîb ǂaira ǃnaka ge ǁgui.”
Tsî xūn hoan ga ǁîb ǃnaka hâ, ob ge ǀgui xū-i xare-i ǁîb ǃnaka hâ tide-e ǃgau tama hâ. Tsî da ge nēsis tsîna noxopa mû tama, xūn hoan ǁîb ǃnaka ǁguihe hâ ǃkhaisa. 9 Xawe da ge Jesub, ǂkhari ǁaero-e ǀhomǃgāgu ǃnaka ǃgamǃgamhe hâba ra mû, Elob di ǀkhomma xub mâ-i hoa-i ǃaroma ǁōba tsâ tsî ǂkhaisib tsî ǃgôasib tsîkha ǀkha nî ǀgapahese. 10 ǁÎb ǃaroma tsî ǁîb ǃnâ-un hoa xūna hâb ge a anu, ǂgui ǀgôanab nî ǂkhaisib âb ǃnâ amǃnâxa kai tsî ǂgaeǂgui-aob ase tsâb ǃnâ-u ǁîn di ǃgâiǃōsiba dīǀoaǀoase.
11 ǁNāb ǃanuǃanu rab tsî ǃanuǃanuhe ran tsîn hoan ge ǀgui ǁGûba xu hâ. ǁNā-amagab ge Jesuba ǁîna ǁîb di ǃgâsan ase ǂgaisa tao tama hâ. 12 Tsîb ge ra mî:
“Tita ge sa ǀonsa ti ǃgâsana nî khoraǂuiba,
ǀhaohâb ǃnâ ta koatsana-e nî ǁnaeba tsi.”
13 Tsîb ge ǁkhawa ra mî:
“ǁÎb ai ta nî ǂgomaiǂnûi.”
Tsî ǁkhawa:
“Mû, nē ta ge tita tsî ti ôan Elob ge mā ten tsîna hâ.”
14 Jesub ge nē ǀgôan a soro tsî ǀao ǃkhais ǁkhās khami soro tsî a ǀao. ǁNās ǃnâb ge ǁîba ǁōb âb ǃnâ-u ǁgâuab,* ǁōb di ǀgaiba ūhâba ge hîkākā, 15 ǁnān ǁîn di ûihâb hoaba ǁōb di ǃaob ǃnaka khobosis ǃnâ hâna nî orese. 16 ǃGāsa i ge a ǀhomǃgāgab nî huigab hā tamasa, xaweb ge Abrahammi di suribab nî huise ge hā. 17 ǁNā-amagab ge mâ ǀgaub hoab aib ǁîb ǃgâsan khamib nî īsa ge ǂgaoǀkhāhe, ǀkhomxaǃnâ tsî ǂgomǂgomsa ǀGapiprister* kai tsîb Elob aiǃâ ǁîb ǃoabas ǃnâ, khoen di ǁoren ǃaroma ǂkhîbagus ǁguibasa nî dīse. 18 ǁÎb ǂûb ge tsâ tsî ǃâitsâhe xui-aob ge ǁnān, ǃâitsâhe rana a hui ǁkhā.
© Khoekhoegowab Elobmîs © Bible Society in Namibia, 2020.
