1 Moseb ǂhanub* ge hā nî ǃgâi xūn di soms ǀguisa i tsîb ge ama ī tama hâ. ǂHanub ge tātsē ǁnān, mâ kurib hoaba ǃnākorobe ǁguibade ra hā-ūna a dīǀoaǀoasa kai ǁoa. 2 Khoen hîa Eloba ra ǀgoreǀîn ga ǀnai ǁoren âna ǃanuǃanuhe hâ, on ge ǁoren ân xa ga ǂâi tama hâ tsî i ge ǃaruǀî ǁguibas di ǂhâbasasi-e ga ǀkhai hâ. 3 Xawe nē ǁguibadi ge khoena kurikorobe ǁoren âna ǂâiǂâiǃnâs ase ī, 4 ǁgōgu tsî pirigu di ǀaob tātsēs tsîna ǁorena ūbē ǁoa xui-ao.
5 ǁNā-amagab ge Xristuba* ǃhūbaib ǃnâb ge hāo, nēti ge mî:
“ǁGuibadi tsî mādi tsînats ge ǂgao tama hâ,
xawets ge soro-e ge aiǂhomiba te.
6 Khauǁguibadi tsî ǁoreǁguibadi
ǃnâts ge ǃgâiǃgâibasen-e ūhâ tama hâ.
7 O ta ge tita ge mî: ‘Mû, ǃgoaxa ta a
sa ǂâisa ta nî dīse, o Elotse,
Xoas ǃnâ tita xa xoamâihe hâ khami.’ ”
8 ǂGurob ge ǁîba ge mî: “Sats ge ǃgâiǃgâibasen-e ūhâ tama hâ ǁguibadi tsî mādi, khauǁguibadi tsî ǁoreǁguibadi tsîn ǃnâ.” ǁÎb ge nēsa ge mî, nē xūn hoan ǂHanub di ǂgaoǀkhās ǃoa ra ǁguibahe xawe. 9 Tsîb ge ǃaruǀî “Mû, hā ta ge go, sa ǂâisa ta nî dīse” ti ge mî. Nēs ǀkhab ge ǂguro ǁguibade ra ǁauǁau tsî ǁnās ǃās ǃnâ ǀgamǁîsa ra ǂnubi. 10 Elob di ǂâisa dī tsîb ge soros âba ǀgui ǃnās ama ǁguibas ǃnâ-ub ge Jesub Xristuba sada ge ǃanuǃanu.
11 Tsî mâ Jodeǁî pristeri hoab ge tsēkorobe ǁîb ǃoabade ra dī, tsî ǃnākorobe ǁkhā ǁguibadi ǁorena ūbē ǁoade ra ǁguiba. 12 Xawe Jesub Xristub ge ǀgui ǁguibas ǀamosib kōse sîsenxasa ǁoren ǃaroma ge ǁguiba. Tsîb ge ǁnās khaoǃgâ amǀkhāb ǁôab Elob dib tawa ge ǂnû. 13 ǁNā ǁaeba xub ge ǁîba ǃâu hâ, ǁîb di khākhoen nî ǁîb ǂaira ǃnaka, ǂaiǃnao-i ase dīhese. 14 ǀGui ǃnās ǀguis di ǁguibas ǀkhab ge ǁîba ǁorena xu ge ǃanuǃanuhena ǀamos kōse ge dīǀoaǀoa.
15 Tsîb ge ǁkhāti ǃAnu Gagaba nēs xa ǃkhō-am tsî nēti ra mî:
16 “Nēs ge ǃgaeǀhaos, ǁnā tsēdi khaoǃgâ ta nî ǁîn ǀkha dīsa.
Ti ǂhanuga ta ǁîn di ǂgaogu ǃnâ nî mā,
tsî ta ǁîga ǂâidi ân ǃnâ nî xoaǂgā” tib ra ǃKhūba mî.
17 Tsîb ge ǃaruǀî ǀaro tsî ge mî: “ǁÎn di ǁoren tsî ǂhanuoǃnâ dīga ta ge ǃaruǀî ǂâis ǃnâ ūhâ tide.” 18 Tsî ǁoren ǀûbas hâpa, ǁnāpa i ge ǃaruǀî ǁoreǁguiba-e ǂhâbasa tama hâ.
A da ǃKhūb ǃoa ǀgū
19 ǁNā-amaga ǃgâsado, a da nēsi ǁkhoaǂgaosib, Jesub di ǀaob ǃnâ-u Hoan xa ǃAnu ǃKhaib ǃnâ ǂgâs diba ūhâ re. 20 ǁÎb ge ǀasa daob ûib diba ǂgāmâisab ǃnâ-u, ǁnās ge ǁîb di sorosa, sada ge ǁkhowa-amba. 21 ǁÎba da ge kai pristeri ase Elob ommi ǂama ūhâ. 22 ǁNā-amaga, a da ǂhauǃnâ ǂgaob tsî ǀoasa ǁaposasib ǂgoms dib, ǂgaogu ǂkhaba ǂgaoǂande xu ǃanuǃanuhe hâgu tsî sorodi ǃanu ǁgam-i ǀkha ǁāhe hâdi ǀkha Elob kōse ǀgū. 23 A da ǁguiǁnâ da ra ǃâubasens ai îganǀgē tamase ǃkhōǀgaipe, Elob mîmâi geb a ǂgomǂgomsa xuige. 24 A da ǀnammi tsî ǃgâi sîsenga nî dīse ǂâiǂâiǃnâ tsî ǂgaoǂgaoǃnâgu. 25 Tā da ǀnîn ra dī khami ǀhaode xu hâbē. Xawe a da ǃKhūb di Tsēs ra ǀgū ǃkhaisa du ra mû xuige ǂgaoǂgaoǃnâgu.
26 Amab di ǂansa ǃkhōǃoatoa tsî da ga ǂanapega ǁoreb ǀkha aiǃgû, o i ge ǃaruǀî ǀnî ǁguiba-i, sada ǁorena nî ūbē-e a ǀkhai. 27 Xawe ǁnāpa ra ǃgaura ge ǃaoǃaosa ǃâubasens ǀgoraǃgâs dis tsî ǁhabu ra ǀaes, ǁnān Eloba ra mâǃoana nî hîkākās tsîra. 28 Moseb ǂhanuba ga ǃûǂam khoe-i ge ǀgam tamas ka io ǃnona khoen ga ǁî-i ǃoagu ǀhûǀgui-o, ǀkhomoǃnâse gere ǃgamhe. 29 ǂÂi re, mâtikō ǁkhōǁkhōsa ǁkharabab ǁnā khoeb hîa Elob Ôaba* ǃharaxū, ǃgaeǀhaos di ǀaob, ǁîb ǂûba ra ǃanuǃanuba ǃanuoǃnâ kai tsî ǀkhommi Gagab diba ra mîǁgaiǁgaiba nî hō ǃkhaisa. 30 ǂAn da ge a ǁnāb, nēti ge mîba: “ǀKhaob ge a ti, tita ge nî mādawa-am.” Tsî ǁkhawa: “ǃKhūb ge ǁîb di khoena nî ǀgoraǃgâ.” 31 ǃHuriǃhurisa i ge a ûitsama Elob di ǃomǁae ǁnāsa.
32 ǂÂi-oa re aibekam tsēdi ǃnân ge tarena sadu ǀkha ī ǃkhaisa Elob di ǃnâba du ge ǃkhōǃoas khaoǃgâ. ǃGom tsî ge tsûsa i ǃkhams ǃnâ du ge ge mâǁapo. 33 ǀNî ǁaeb ai du ge ǂhaisase ǃkhāǃkhāhe tsî khoen di ǃhōxūse gere dīhe, tsî du ge nau ǁaeb ai ǁkhā ǀgaus ai gere ûi-ūhen ǀkha gere tsâǀhao. 34 ǃKhōsaben ǀkha tsâǀhao tsî du ge hoaraga xūna du ge ūǀhanaheo ǃgâiaǂgaob ǀkha ge tani, sadu ge ǃgâi tsî hâhâ ra xūna du ūhâ ǃkhaisa ǂan i xui-ao. 35 Tā sadu ǂgomǃgâsa aoxū, ǁîs ra kai mādawa-amsa hā-ū xuige. 36 Mâǁaposasiba du ge ǂhâba hâ, Elob di ǂâisa dī tsî du nî ǁîb ge mîmâina ǃkhōǃoase. 37 Xoas ra mî khami:
“Ama ǂkhari ǁaerob ǃnâb
ge ǁnāb, ǃgoaxa aba nî hā
tsî ǀhabe tide.
38 Tsî ti ǂhanu-ain ge ǂgomsa xu nî ûi
tsî ǂnanoan kao,
os ge ti ǀomsa ǁîn ǃnâ
ǃgâiǃgâibasen-e ūhâ tama hâ.”
39 Sada ge ǁnān hîa mâ-oa tsî ra hîkākāhen di tama da hâ, xawe da ge ǁnān ǂgom tsî ra sâuhen di.
© Khoekhoegowab Elobmîs © Bible Society in Namibia, 2020.
