Kai ǁgammi dâus di ǀams
1 Ob ge Eloba Noaxi tsî ǁîb ǀkha arki ǃnâ hâ xamarin, ǀgurun tsî ǀgoan xa ǂâi tsî ǂoab, ǃhūbaib ai ǃgom tsî nî ǁgamma ǀoroǀoroba ge sî. 2 ǀAudi ǁgammi ǃnaka hâdi tsî ǀhommi di mûǂuidaode ǂganamhe tsîb ge ǀnanuba ge ǀapiǀû. 3 Tsîb ge ǁgamma ǀguikaidisi tsî korodisi tsēdi di ǁaeb ǃnâ ge ǁnoro. 4 Disihûǀaǁî tsēs, hûǁî ǁkhâb dis aib ge arka Araratǃhommi tawa sī ge mâ. 5 ǁGammi ge ǃaruǀîǀgui ge ǁnoro, disiǁî ǁkhâb di ǂguro tsēs ai gu ge ǃhomgu di ǂaoga mûsentsoatsoas kōse.
6 Hakadisi tsēdi khaoǃgâb ge Noaxa mûǂuidaosa ǁkhowa-am 7 tsî goraba ge sîǂoa. ǁÎb ge ǁgammi ge ǃhūbaiba xu sī bēs kōse gere ǁkhanama. 8 Ob ge Noaxa ǁnās khaoǃgâ ǂnabusa, ǁgammi go ǃhūbaiba xu bē ǃkhaisas sī nî kōse ge sî, 9 xawes ge ǁgammi ge hoaraga ǃhūbaiba ǃgū-ai hâ i tsîs ge ǂaiǃnāb âs tsînas nî mâi ǃkhai-e ūhâ tama hâ i xui-ao arki ǁga ge oa. Ob ge Noaxa ǃommi âba ǀhōǂui tsî ǃkhō tsî arki ǃnâ ǁîb tawa ge ūǂgâxa si. 10 ǁKhawab ge ǂnabusa hû tsēdi khaoǃgâ ge sîǂoa. 11 Os ge ǁîsa ǃoes ǃnâ, ǀase ǃhomhe hâ ǂnareb ǀkherahais diba amǃnâ ūhâse ge oahā. Ob ge Noaxa ǁgammi go ǁnoro ǃkhaisa ge ǂan. 12 ǁKhawab ge ǀnî hû tsēde ǃâu tsî ǁnās khaoǃgâ ǂnabusa ge sîǂoa. Nē ǃnāsas ge ǁîsa oaǀkhī tama ge i.
13 Noaxi ge ǃnanikaidisi tsî ǀgui kurixa kurib di ǂguro ǁkhâb ǂguros aib ge ǁgamma ge bē. Ob ge Noaxa arki di ǃgū-aiba ǁkhowa-am tsî ǃhūb ǂnâsa ǃkhaisa ge mû. 14 ǀGamdishûǀaǁî tsēs ǀgamǁî ǁkhâb dis aib ge ǃhūbaiba hoaragase ge ǂnâ.
15 Ob ge Eloba Noaxi ǃoa ge mî: 16 “Sa taras, sa ôagu tsî ǁîgu di taradi ǀkha arka xu ǂoaxa re. 17 Sats ǀkha hâ hoaraga anin tsî ûitsama xūn hoana ūǂui, în ôananôagu tsî ǃhūbaib hoab ai khoraǂuisen.” 18 Ob ge Noaxa ǁîb taras, ǀgôagu âb tsî ǁîgu taradi tsîn ǀkha arka xu ge ǂoaxa. 19 Tsîn ge hoaraga xamarin, ǀgurun tsî anina ǁîn di ǃnôan ǀkha ǃgubidi ǃnâ arka xu ge ǂoaxa.
Noaxi ge ra ǁguiba
20 Tsîb ge Noaxa altar-e ǃKhūba ǂnubiba tsî hoa ǃanu ǀgoaǃnôan tsî aniǃnôan xa, mâ-i hoa-e xu ǀgui-e ū tsî khauǁguibas ase ǀoasase altars ai ge ǁguiba. 21 Nē ǁguibas di ǁamab ge ǃKhūba ge ǃgâiǃgâiǂgao tsîb ge ǂgaob âb ǃnâ ge mî: “Tātsēs tsîna ta ge ǁkhawa khoen ra dī xūn ǃaroma ǃhūbaiba ǀâxare tide, ǁîn di ǂâidi ǂkhamsis âna xu a ǂkhaba ǃkhaisa ta a ǂan xui-ao. Tātsēs tsîna ta ge ǁkhawa hoaraga ûitsama xūna, nē ǃnās ai ta go dī hâ i khami hîkākā tide. 22 ǃHūbaib hâs kōseb ge ǁaeb ǃhanas dib tsî ǁaeb ǃgaos diba nî hâ. ǁKhātib ge hoaǁae ǃkhaib tsî ǀgamma nî hâ, ǁkhunaǁaeb tsî saoǁaeb, tsēab tsî tsuxuba.”
© Khoekhoegowab Elobmîs © Bible Society in Namibia, 2020.
