1 Nēs ǀkha ta ra mîs ge: ǀHûǀumi-ao-i ge ǂkham-i as kōse ǃgā-i ǀkha a ǀguitikō, amab ǃnâ i a hoa xūn di ǀumi-ao xawe. 2 ǁÎ-i di îb ra mîǀgui ǁaeb nî ǀoas kōse i ge ǁnāti ī ǀgôaro-e, mûǂamaon di kōǃgâs ǃnaka nî hâ. 3 ǁKhā ǀgaub ai da ge sada tsîna gagasise da ge ǀgôaro io, xū tama ǀgaugu ǃhūbaib digu xa ge khobodīhe hâ i. 4 Xawe ǁaeb ge ǀoa, ob ge Eloba ǁîb Ôaba ge sî, tarasa xu ǃnae tsîb ǂHanub ǃnakab nî ûise, 5 Tsî Elob ge nēsa ge dī, ǂHanub di ǀgaigu ǃnaka hân hoan nî ǃnoraǃnorahe tsî da nî ǁîb di ôa kaise.
6 Tsî ǁîb di ôadu a xui-aob ge Eloba ǁîb Ôab di Gagaba sada ǂgaogu ǃnâ ge mā da hîa “ǁGûtse” ti Îtse, ti ra ǂgaiheba. 7 ǁNā-amaga du ge ǃaruǀî khobo tama hâ tsî a Elob ôa. Tsî Elob ôadu a xui-ao, du ge ǁîb ôan di ǀumis ǃnâ a ǃâ.
Paulub di ǂâiǂhansens Galateǁîn ǃaroma
8 ǂGuro du ge Eloba ǀū i, xui-ao du ge khobose ǁgôa-eloga gere ǃoaba. 9 Nēsi du ge ama Eloba a ǂan, tamas ka io ta kha Elob ge amab ǃnâ sado a ǂan ti nî mî? Tsî du kha ǀasa-ammese ǂkhabusa, ǀkhomǀkhomsa tsî xū tama ǀgaugu ǃhūbaib diga ǁnâuǀnam tsî khobose ǁîgu ǃnaka ra ûi ǂgao. 10 ǃGōsa ǂâisa du ge ǂanǂansa tsēdi, ǁkhâgu, kurikamagu tsî kurigu ai ra ǂnûi. 11 ǃAoba du ta ge ra, sadu ǃaroma ta ge ǁaudommi ai a ǀhupuǀhupusen ǃkhaisa.
12 ǃGâsado, tita khami du nî ī ǃkhaisa ta ge ra ǀkhoma du, tita tsîn ge sadu ǀkha a ǀgui xui-ao. Xū-i xare-e du ge tsūdī te tama ge i. 13 ǂAn du a ǃkhais ge, ti ǀaeb ge sado ta ǂguro ǃGâiǂhôasa nî aoǁnâba ǃkhaisa a ǃaromasa. 14 Ti sorosi ǀaeb di mâsib ge sadu tawa ǃgomsi i, xawe du ge ǃgôaǁnâ tamas ka io ǂhara te tama ge i. ǁNās ǃās ǃnâ du ge Elob di ǀhomǃgā-i ase tsî Xristub* Jesub ǂûba du ra ǁkhoreǁhare khami ge ǃkhōǃoa te. 15 Sadu ǃnâ ge hâ i ǃgâiaǂgaoba kha mâpa ge ī? Sadu xa ta ge a ǀhûǀgui ǁkhā, dī ǁkhā du ga hâ, o du ga sadu mûde aitsama ǁhoroǂui tsî mā te hâ ǃkhaisa. 16 Sado amaba mîbas ǀkha ta kha nēsi go sadu khākhoe kai?
17 ǁNā khoen ge sado ǃgâi īsiga ra ǁgau, xawe ǃnākhoesigu ân a ǀkhoma hîa. ǁÎn ge ra dītsâ tita sado xu ǀgorasa, ǁîn ǀkhāb ai sado hōbasens ǃaroma. 18 ǃGâi i ge a hoaǁae ǃgâi ǂâibasensa ūhâ xū-i ǃaroma ǀaexasiba ūhâsa, tita ga sadu ǀkha hâ ǁaeb ai ǀguis ose. 19 Ti ôado, ǁkhawa ta ge ǁoratsûb ǃnâ hâ taras khami ra tsâ, Xristub sadu ǃnâ nî ǂnubihese. 20 Mâtikōse ta kha sadu ǀkha nēsi ra hâ ǂgao, sadu xa ta ǀkhara ǀgaub ai ra ǃhoa ǂgao xui-ao. Kaise ta ge sadu xa ra ǂâiǂhansen!
Hagars tsî Saras hâra di aiǁgaus
21 Mîba te ǁkhā du a, sadu hîa ǂHanub ǃnaka māǁnâsen ǂgao hâdo, ǃgâise du kha a ǂan tare-eb nē ǂHanuba ra mîsa? 22 Xoamâisa i ge a, Abrahammi ge ǀgam ǀgôakha ūhâ-i ǃkhaisa, ǀguiba ǁîb taras di khobos ǃnâ tsî nauba ǁîb taras hîa ge ǃnorasa is ǃnâ. 23 Khobos ǃnâ ge hōhe ǀgôab ge ǁnaetisa ǀgaub ǃnâ ge ǃnae, xawe ǃnorasa taras ǃnâ ge hōhe ǀgôab ge Elob di mîmâisa xu hâ. 24 Nē xūn ge īsi-i ǃnâ a ǁnâuǃāhe ǁkhā: ǀGam tarekhoera ge ǀgam ǃgaeǀhaora xa ra ǂâibasen. ǀGuis ge Hagars hîa ǁîs di ǀgôana khobosis ǃnâ ge hōsa, Sinaiǃhommi hîa Arabiab ǃnâ ǁgoeb ai ge dīhe ǃgaeǀhaos di ǁgauǁgaus ase. 25 Hagars ge Sinaiǃhommi, Arabiab ǃnâ ǁgoeb di ǁgauǁgaus ase i, tsîs ge nētsēkam Jerusalems ǀkha a ǀgui tsî ǁîs di khoen hoan ǀkha khobosis ǃnâ hâ. 26 Xawe ǀhomsi Jerusalems ge a ǃnorasa tsî a sada di î. 27 Nēti xoahe hâ xui-ao,
“Dâ, sas ǀgamǀkhā tamasa!
Sas ǁora tamasa, dâxase ǂgai,
sas ǁoratsû-e tsâ tamasa!
ǃŪ-aisase hâs di ôan nî
aoba ūhâs din ǃgâ-ai ǂgui xuige.”
28 Tsî ti ǃgâsado, nēsi du ge Isaki khami a Elob ôa ǁîb di mîmâis ǃoa. 29 ǁNā ǁaeb aib ge ǀgôab hîa ge ǁnaetisa ǀgaub ǃnâ a ǃnaeba naub hîa Elob di Gagaba xu ge ǃnaeba ge ǃgôaǃgon; tsî nētsēs tsîna i ge ǁnāti ǀgui i. 30 Xawe tare-es Xoasa ra mî? “Khobos tsî ǁîs ôab tsîra ǃhaeǂui, ǁîs di ôab ǃnorasa taras di ôab, Isaki ǀkha ǀumisa ǀgoragu ǁoa xuige.” 31 ǁNā-amaga, ti ǃgâsado, sada ge khobos di ǀgôa tama, xawe da ge a ǃnorasa taras di ǀgôa.
© Khoekhoegowab Elobmîs © Bible Society in Namibia, 2020.
