Esra 5 - Khoekhoegowab New Translation 2020 (KKG20)

1 ǁNā ǁaeb ǃnâ kha ge ǀgam kēbo-aokha, Hagaib tsî Idob ôab Saxariab hâkha, Israeli di Elob di ǀons ǃnâ, Judab tsî Jerusalems tsîra Jodeǁîna ge mîba. 2 O kha ge Sealtieli ôab Serubabeli tsî Josadaki ôab Josuab tsîkha nē ǂhôasa kha ge ǁnâuo, Jerusalems ǃnâ Tempela ǂnubis ǀkha ǁkhawa ge tsoatsoa, tsî kha ge ǁnā kēbo-aokha ǁîkha gere hui.

3 ǁNā ǁaeb ǂûb ai gu ge Eufrati huriǂoasǀkhāb di gowoniab Tatenaib, Setar-Bosnaib tsî ǁîkha di sîsenǁare-aogu tsîga Jerusalems tawa hā tsî Jodeǁîna ge dî: “Tari-i xa du nē Tempela du ǂnubikhâi tsî nî ǀgaiǀgai ǃkhaisa ge mîmāhe?” 4 ǁÎgu ge ǁkhāti Tempela ǂnubis ǀkha ra hui aogu di ǀonde ge dî. 5 Xawes ge Elob di mûsa Jodeǁîn ǂgaeǂgui-aogu ai ge hâ i, tsî gu ge Persiab ǂamkhoega, Dariusi ǃoa xoa tsî gu ǃereamsa nî hōs kōse, ǁîga omma ǂnubis ǀkha aiǃgûsa ǂkhā kai tama ge i. 6 Nēs ge ǁîgu ge gao-aob Dariusa sîba ǂhôasa:

7 “Gao-ao Dariusi ǃoa. Hoa ǃgâina ge ge ra ǁkhoreba tsi.

8 “Gao-aotsa ge ge ra ǂanǂan, Judab di ǃhūǃâs ǁga ge ge ǃgû hâ i ǃkhaisa. Tsî ge ge ǁnāpa kai Elob di Tempeli, kai ǀuidi ǀkha ra ǂnubikhâihe tsî gu ǃnaoga ǂnubiǂgoagu ǃnâ ra ǁguihe ǃkhaisa ge mû. Nē sîsenni ge kai ǃûiǃgâs ǀkha ra dīhe tsî ǃgâise ra aiǃgû.

9 “Sige ge tari-i xan ge nē Tempela ǂnubikhâi tsî ǀgaiǀgaisa mā-amhe ǃkhaisa ǂgaeǂgui-aogu ai ge dî. 10 ǁKhāti ge ge ǁîga ǁîgu ǀonde ge dî, î ge satsa tarigu nē sîsenna ra ǂgaeǂgui ǃkhaisa ǂanǂan.

11 “O gu ge ǁîga nēti ge ǃeream: ‘Sige ge ǀhommi tsî ǃhūbaib tsîkha Elob di ǃgāge tsî ge ge Tempeli, ǂgui kurigu ǃkharu hâse ge kai gao-aob Israeli dib xa nēpa ǂnubihe tsî dītoahe hâ iba ǁkhawa ra omkhâi. 12 Sida aboxan ge ǀhommi di Eloba ǁaiǁai, xui-aob ge ǁîba ǁîna Babiloniab di gao-aob Nebukadnesari, Xaldeaǁîb di ǀgaib ǃnâ ge māǁnâ. Tsîb ge Tempela hîkākāhe tsî ǁaesa ǃkhōsabese Babiloniab ǃoa ge ǃgû-ūhe. 13 ǁNās khaoǃgâb ge Babiloniab gao-aob Koresa, ǂguro kurib ǁîb ǂgaeǂguis dib ǃnâ, Tempeli ǁkhawa nî ǂnubikhâihe ǃkhaisa ge mîmā. 14 ǁÎb ge ǁkhāti ǃhuniǀuri tsî ǀhaiǀuri xapan, Nebukadnesari ge Jerusalems ǃnâ mâ Tempela xu ū tsî Babilons di tempeli tawa sī-ū hâ ina ge ǁkhaeǁnâ. ǁÎdeb ge Babilons di tempela xu ūǂui tsî Sesbasari, Judab di gowoniaseb ge mâi hâ ib ǃomǁae ge mā. 15 Tsîb ge ǁîba ge mîba, îb ǁîna Jerusalems ǃnâ mâ Tempela ǃoa oa-ū tsî Tempela ǀnaib ge mâ i ǃkhaib ai ǁkhawa ǂnubikhâi. 16 Ob ge Sesbasara Tempeli ǃgaoǃgaoba Jerusalems ǃnâ hā ge ǁgui. ǁNā ǁaeba xu tsoatsoa tsî nēsis kōseb ge Tempela ra ǂnubihe, xaweb ge noxopa toa tama hâ.’

17 “ǃGôahesa gao-aotse, ǁnās xats ga ǃgâibaheo, as gao-aogu ǃnaeǃkhaidi xoaǁguigu, Babilons ǃnâ hâgu ǃnâ ôaǃnâsa dīhe, ǂanǂuihe i nîse, iseb ge gao-aob Koresa nē Tempeli Jerusalems ǃnâ nî ǂnubikhâihe ǃkhaisa mîmāsa; ǁnās khaoǃgâ gao-aots di mîǁguiba ǂanǂan ge re.”