Tempeli di ǂnubihes ge ra mâǃoahe
1 Judab tsî Benjaminni tsîkha ǁaes di khākhoen ge ǃkhōsaben hîa ge oaǀkhīn, ǃKhūb Israeli di Elob di Tempela ǁkhawa ra omkhâi ǂgao ǃkhaisa ge ǁnâu. 2 On ge Serubabeli tsî ǃhaoǃnādi danakhoegu tsîgu tawa sī tsî ge mî: “A da Tempela ǂnubihui du re. Sida tsîn ge sadu ra ǀgoreǀî Elob ǁkhāba ra ǀgoreǀî, tsî da ge ǁîba Asiriab gao-aob Esarhadonni ge nēpa hā ǁan kai da ǁaeba xu ǁkhāti ǁguibade ra hā-ūba.”
3 O gu ge Serubabeli, Jesuab tsî ǃhaoǃnādi danagu tsîga ǁîn ǃoa ge mî: “Sida ge ǃKhūb sida Elob di Tempela ǂnubis ǃaroma, sadu hui-e ǂhâba tama hâ. Aitsama da nî om, Persiab gao-aob Koresi ge mîmā dase.”
4 On ge ǃhūb ǃnâ ge ǀnai ǁan hâ i khoena, Jodeǁîna ǂkhabuǂâi tsî ge ǃao kai, sîsenni ǀkha aiǃgûsa. 5 ǁÎn ge ǁkhāti Persiab di ǂamkhoega ge ǁamaǂgan, î gu ǁîn di sîsenna ǂhani. Tsîn ge nēs ǀkha Persiab gao-aob Koresi ǂgaeǂuis ǁaeba xu gao-aob Dariusi ǂgaeǂguis ǁaeb kōse ge aiǃgû.
Jerusalems di ǂnubihes ge ra mâǃoahe
6 Gao-aob Ahasverosi ǂgaeǂgui tsoatsoas ǃnân ge Judab tsî Jerusalems tsîra ǁanǂgāsaben di khākhoena, ǁîn ǃoagu ǀhapiǂgā-amde ge xoa.
7 Persiab gao-aob Artaxerxesi ǂgaeǂguis ǁaeb ǃnâ gu ge Bislammi, Mitredati, Tabeli tsî ǁîgu di sîsenǁare-aogu tsîga ǁkhawa sîǂkhanisa gao-aob ǁga ge xoa. Nē sîǂkhanis ge Aramiagowab ǃnâ ge xoasa i tsî khomaihes ka, os nî ǂnûiǃkhunihese ge ī i.
8 Gowoniab Rehummi tsî xoa-aob Simsaib tsîkha ge Jerusalems ǃoagu sao ra sîǂkhanisa Artaxerxesi ǁga ge xoa:
9 “Gowoniab Rehummi tsî xoa-aob Simsai tsîkhom tsî nau sîsenǁare-aogu, ǀgoraǃgâ-aogu tsî ǂamkhoegu tsîge, Ereks, Babilons tsî Susas, Elammi ǃnâ ǁgoes tsîdi dige xu, 10 tsî ǁkhāti nau ǁaedi, kai tsî ǀgaisa Asnapari xa ge ǁîdi hâǃkhaiga xu doeǁgabēhe tsî Samariab di ǃādi ǃnâ tsî Eufratǃāb huriǂoasǀkhāb ai hā a ǁande xu.”
11 Nēs ge sîǂkhanis di ǂhôasa:
“Gao-aob Artaxerxesa ǃoa, ǁîb di ǃgāge Eufrati huriǂoasǀkhāb dige xu.
12 “ǃGôahesa gao-aots nî ǂansa ge ge ra ǂgao, nau ǀkharigu saga xu ge doeǀkhī Jodeǁîn ge Jerusalems ǃnâ ǁan, tsî ǁnā ǂkhaba tsî mâǃoaxa ǃāsa ra ǂnubikhâi. ǀNain ge ǂnubiǂgoaga go omkhâitsoatsoa tsî ǀase nî dītoa. 13 ǃGôahesatse, nē ǃāsa omkhâihe tsî gu ga ǂnubiǂgoagu âsa dītoahe, on ge khoena ǁgui-aimarisa nî matareǀû tsîs ge sa hōǂgāsa nî ǀoro. 14 Sige ge gao-aots ǂama ǁgui-aisa ūhâ tsî ge ge nēs nî ī ǃkhaisa ǂgao tama hâ. ǁNā-amaga ge ge gao-aotsa ra ǂgan, 15 îts ǃnaeǃkhaidi xoaǁguigu sa aboxagu digu ǃnâs ôaǃnâsa nî dīhe ǃkhaisa mîmā. ǁNāsats ga dī, ots nî mû ǃkhais ge nē ǃās ge hugaǀgui mâǃoaxa i, tsî ǀoro ǁaeba xu gao-aogu tsî ǀkharisi ǂgaeǂgui-aogu tsîga ǃgomsina gere māsa. ǁÎs di ǁanǂgāsabena ǂgaeǂguis ge hoaǁae ge ǃgom i. ǁNā ǃkhais ǃaromas ge nē ǃās ge hîkākāhesa. 16 ǁNā-amaga ge ge ra ǂanǂan tsi, nē ǃāsa omkhâihe tsî gu ga ǁîs di ǂnubiǂgoaga dītoahe, ots gao-aotsa Eufratǃāb huriǂoasǀkhāb di ǃhūǃâs ǂama ǃaruǀî ǀgai-e ūhâ tidesa.”
17 Ob ge gao-aoba nē ǃereamsa ge sî:
“Gowoniab Rehummi, xoa-aob Simsaib tsî ǁîkha di sîsenǁare-aogu Samarias ǃnâ tsî nau ǃâb Eufrati huriǂoasǀkhāb dib ǃnâ ǁan hâgu ǃoa, tawedes.
18 “Sago ge sî sîǂkhanisa ta ge ǂnûiǃkhunihe tsî go khomaibahe. 19 Ôaǃnâdi nî dīhe ǃkhaisa ta ge mîmā, o i ge ge ǂanǂuihe Jerusalems ge ǀnai ǀoro ǁaeba xu gao-aogu ǃoagu khâikhâisenxa i tsîn ge mâǃoaxa tsî ǂkhabadī-aona ǁîs ǃnâ ǁan hâ isa. 20 ǀGaisa gao-aogu ge Jerusalemsa ǂgaeǂgui, Eufrati huriǂoasǀkhāb hoaba gaoǂam tsî ǁgui-aimaris tsî hōǂgās tsîna gere ǀhaoǀhao. 21 ǁNā-amaga mîmā, î gu ǁnā aoga ǁnā ǃāsa ǂnubisa ǂkhāhe, tita ǁkhawa nî mîmā gus kōse. 22 ǁNāsa nēsi dī, îs ti hōǂgābasensa tā ǂkhôahe.”
23 Nē sîǂkhanis Artaxerxesi dis ge Rehummi, Simsaib tsî ǁîkha sîsenǁare-aogu tsîga khomaibaheo, o gu ge ǁnātimîsi Jerusalems ǁga ǃgû tsî Jodeǁîna ge ǃkhâi, în ǃāsa ǂnubiǀû.
Tempela ǂnubis ge ǁkhawa ra aiǃgû
24 Tempela ǂnubis ge ge ǀûhe tsîb ge sîsenna ǀgamǁî ǂgaeǂguis kurib Persiab gao-aob Dariusi dib kōse ge mâ.
© Khoekhoegowab Elobmîs © Bible Society in Namibia, 2020.
