ǃHao taradi ge ra sîbēhe
1 Esrab Tempeli aiǃâ ǃhonǁgoa tsî ǀgores ǃnâ ā rase nē ǁorena ra ǁguiǁnâ, hîan ge ǂgui Israelǁî aogu, taradi tsî ǀgôan tsîna ǁîb ǂnamipe hā mâ tsûsase ge ā. 2 Ob ge Elamǁîb Jehieli ôab Sekanjaba Esrab ǃoa ge mî: “Sige ge Eloba a ǁnâuǀnamoǃnâ, ǃhao tarade ge ge ǃgames ǀkha, xaweb ge Israela noxopa ǃâubasensa ūhâ. 3 A ge nēsi sada Eloba mîmâiba, nē taradi tsî ǀgôan tsîna ge nî sîbē ǃkhaisa. Sige ge sats tsî ǁnāgu Elob mîmāde ǁnâuǀnam hâgu go ǀapemā ge khami nî dī. Sige ge Elob ǂhanub ǃoa nî dī. 4 Nē ǃkhais di ǃereams ge sa ǃomǁae hâ. ǂKhâǃnâ tsi ge ra, xuige sa sîsenna dīs ǀkha aiǃgû re.”
5 Ob ge Esraba khâimâ tsî pristergu tsî Leviǁîgu tsî ǁaes tsîn di ǂgaeǂgui-aoga ge nū kai, Sekanjab go mî khamin nî dīsa, on ge ge nū. 6 ǁNās khaoǃgâb ge Tempeli aiǃâba xu Eljasib ôab Johananni ǃnā-oms ǁga ǃgû tsî ǁnāpa ge hâǂkhai, xū-i xare-e ǂû tsî ā tamase, ǃkhōsisa xu ge oaǀkhī khoen di ǃûǂams xab ge ǃoa hâ i xui-ao.
7 Tsî i ge ǂanǂan-e Jerusalems tsî Judab tsîra ǃnâ ge sîǂuihe, în ǃkhōsisa xu ge oaǀkhī khoen hoana Jerusalems ǃnâ ǀhao. 8 Tsî ǂamkhoegu tsî ǂgaeǂgui-aogu ge ge mîǀgui, ǁîgu mîmās ai ga ǃnona tsēdi ǁaeb ǃnâ hā tama i khoe-i hoa-i ǁî-i xūna ūǀhanahe tsî ǀhûhâsiba xu nî ǃhaeǂuihesa. 9 O gu ge ǃnona tsēdi ǁaeb ǃnâ, Judab tsî Benjaminni aogu hoaga, ǀgamdisiǁî tsēs khoeseǁî ǁkhâb dis ai Jerusalems ǃnâ ge ǀhao. Hoaraga khoen ge Tempelǂgāb ai ge ǀhao hâ i. Kaise i ge gere ǀapi tsîn ge khoena ǀapib tsî nē ǂnûs di ǁkhamasa mâsib tsîn xa gere ǀkhū.
10 Ob ge prister Esraba khâimâ tsî ǁîna ge mîba: “Sago ge ǃhao tarade ǃgames ǀkha ǃûǂam tsî ǁnās ǀkha Israela ge ǀhapixa kai. 11 Nēsi ǁnâi ǃKhūb, sadu aboxan Elob aiǃâ sago ǁorena ǁguiǁnâ, î ǁîb ra ǂgao khami dī. Sada ǃhūb ǃnâ hâ ǃhao ǁaedi tsî ǃhao taradi tsîna xu ǀgora.”
12 On ge hoaraga khoena ǃgarise ge ǃeream: “Sats go mî xūn hoana da ge nî dī, 13 xawe da ge kaise a ǂgui tsî i ge ǀgaisase ra ǀapi. Sida ge nēti ǃauga a mâ ǁoa. Nē sîsenni ge ǀgui tamas ka io ǀgam tsēra ǃnâ nî dīhese ī tama hâ, ǂguida âda ge nē ǁoreba dī amaga. 14 A gu sida ǂamkhoega Jerusalems ǃnâ hâ tsî nē ǁhōb ǀkha aiǃgû. A gu ǃhao taradi ǀkha ge ǃgame aogu hoaga mîmâisa ǁaeb ai ǁîgu ǃās di ǂamkhoegu tsî ǂgaeǂgui-aogu tawa sī. ǁNā ǀgaub aib ge Elob di ǁaib nē ǁhōb ǂama hâba sada xu nî toa.” 15 Asaheli ôab Jonatanni tsî Tikwab ôab Jasejab tsîkha ǀguikha ge nē ǃkhaisa ge mâǃoa, Mesulammi tsî Leviǁîb Sabetaib tsîkha xa ra ǂkhâǃnâhese.
16 ǃKhōsisa xu ge oaǀkhī khoen ge nē ǀapes xa ge ǃgâibahe. Ob ge prister Esraba ǃhaoǃnādi danakhoega ǀondi âgu ai ge ǂgaiǂui. ǁÎgu ge ǂguro tsēs disiǁî ǁkhâb dis ai, nē ǃkhaisa ôaǃnâs ǀkha tsoatsoa 17 tsî ǃhao taradi ǀkha ge ǃgame aogu di ǁhōga ǃnona ǁkhâgu ǁaeb ǃnâ ge dītoa.
ǃHao tarade ge ūhâ i aogu
18 Nēb ge ǃhao tarade ge ūhâ i aogu di ǃgôakhâiba:
Pristergu xasa:
Jesuab tsî ǁîb ǃgâsagu, Josadaki ôagu di ǃhaoǃnāsa xu Maasejab, Elieseri, Jarib tsî Gedaljab tsîgu. 19 ǁÎgu ge taradi âga xu gu nî ǀgorasa mîmâi tsî baiba ǁoreǁguibase ge ǁguiba.
20 Imeri ǃhaoǃnāsa xu Hananni tsî Sebadjab tsîkha.
21 Harimmi ǃhaoǃnāsa xu Maasejab, Eliab, Semajab, Jehieli tsî Usiab tsîgu.
22 Pashuri ǃhaoǃnāsa xu Eljoenaib, Maasejab, Ismaeli, Netaneli, Josabadi tsî Elasab tsîgu.
23 Leviǁîgu xasa:
Josabadi, Simeib, Kelajab (Kelita tis tsîna ra ǀonǂgaiheb), Petahiab, Judab tsî Elieser hâgu.
24 ǁNae-aogu xasa:
Eljasib.
Tempelǃûi-aogu xasa:
Salummi, Telemmi tsî Uri hâgu.
25 Nau Israelǁîgu xasa:
Parosi ǃhaoǃnāsa xu Ramjab, Isiab, Malkijab, Mijaminni, Eleasari, Makijab tsî Benajab tsîgu.
26 Elammi ǃhaoǃnāsa xu Matanjab, Saxariab, Jehieli, Abdib, Jeremoti tsî Eliab tsîgu.
27 Satub ǃhaoǃnāsa xu Eljoenaib, Eljasib, Matanjab, Jeremoti, Sabadi tsî Asisab tsîgu.
28 Bebaib ǃhaoǃnāsa xu Johananni, Hananjab, Sabaib tsî Atlaib tsîgu.
29 Banib ǃhaoǃnāsa xu Mesulammi, Maluki, Adajab, Jasub, Seali tsî Jeremoti tsîgu.
30 Pahat-Moab ǃhaoǃnāsa xu Adnab, Kelali, Benajab, Maasejab, Matanjab, Besaleli, Binuib tsî Manaseb tsîgu.
31-32 Harimmi ǃhaoǃnāsa xu Elieseri, Isiab, Malkijab, Semajab, Simeonni, Benjaminni, Maluki tsî Semarjab tsîgu.
33 Hasummi ǃhaoǃnāsa xu Matenaib, Matatab, Sabadi, Elifeleti, Jeremaib, Manaseb tsî Simeib tsîgu.
34-37 Banib ǃhaoǃnāsa xu Madaib, Amrammi, Ueli, Benajab, Bedejab, Keluhib, Vanjab, Meremoti, Eljasib, Matanjab, Matenaib tsî Jasub tsîgu.
38-42 Binuib ǃhaoǃnāsa xu Simeib, Selemjab, Natanni, Adajab, Maknadebaib, Sasaib, Saraib, Asareli, Selemjab, Semarjab, Salummi, Amariab tsî Josefi tsîgu.
43 Nebob ǃhaoǃnāsa xu Jeieli, Matitiab, Sabadi, Sebinab, Jadaib, Joeli tsî Benajab tsîgu.
44 Nē aogu hoagu ge ǃhao tarade ge ūhâ i. Tsî gu ge ǁîde ǀgoraxū tsî ǁîdi tsî ǀgôan âdi tsîna ge sîbē.
© Khoekhoegowab Elobmîs © Bible Society in Namibia, 2020.
