ǀGam omkha Tempeli ǀgūse
1 ǁNās khaoǃgâb ge ǁîba ǃauga hâ ai-ommi ǃoa ge ūǂui te ǀapas ǃoa gau daobǀî, tsîb ge tita ǁnā ǃnā-omdi ǃgaoǁnâhe hâ ǃkhais ǃoagu, tsî ǀapasǀî hâ kuru-ais ǃoagu hâdi tawa ge ūsī. 2 Aiǃâ hâ ǃâsǀîb ge gaxuba korodisi metergu kō ge i ǀapas di daobǀî, tsî ǂhabasib ge ǀgamdisikoroǀa metergu kō ge i, 3 ǁnā disi metergu ǃnāb ǃnâ hâ ai-ommi digu ǃoagu tsî ǁnā ǁguiǃnâb ǃauga hâ ai-ommi digu; nē ai-oms ge nau ai-oms tawa ge hâ i ǃnona ǁgaragu ǃnâ. 4 Tsî ǃnā-omdi aiǃâ i ge ǃgûǃganuǃkhai-e ge hâ i, koro metergu kōse a hara-e ǃnābǀî, tsî dao-i ǃkhare meteri kōse, tsî ǂoadaodi âdi ge ǀapasǀî ge hâ i. 5 Tsî ǀgapise hâ ǃnā-omdi ge kuru-ais ǃnaka tsî ǁaegu hâdi xa ǂō ge i, ai-omdi ge ǁîdi xa ǀgapi ge i amaga. 6 ǁÎdi ge ǃnona ǁgaragu ai ge ǁgoe i, xawe di ge ǂkhâǃnâhaiga ūhâ tama ge hâ i, ai-omgu di ǂkhâǃnâhaigu ge ī i khami; ǁnā-amaga di ge ǃhūba xu ǃnaka tsî ǁaegu hâdi ǃgâ-ai ge ǂō i. 7 Tsî ǂnubiǂgoab, ǃaugabǀî ǃnā-omdi ǃoagu ǃauga ǁgoe ai-ommi ǃoa gau daobǀî ǃnā-omdi aiǃâ hâb, ǁîb di gaxusib ge ǀgamdisikoroǀa metergu kō ge i. 8 Gaxub ǃnā-omdi ǃauga ǁgoe ai-ommi dib ge ǀgamdisikoroǀa metergu kō ge i xui-ao; tsî kō, Tempeli aiǃâ gu ge korodisi metergu kō ge i. 9 Tsî nē ǃnā-omdi ǃnakaba xus ge ǂgâdaosa ge hâ i aiǂoasǀîsa xu, ǁîs ǃnâts ga sats khoetsa ǃauga ǁgoe ai-omma xu ǂgâo.
10 Ai-ommi ǂnubiǂgoab di harasib tawa aiǂoas ǃoa gau daobǀî ǃgaoǁnâhe hâ ǃkhais tawa tsî kuru-ais aiǃâb tawa di ge ǃnā-omde ge hâ i. 11 Tsî ǁîdi aiǃâ gau daob ge ǁnā ǃnā-omdi, ǀapas ǃoa gau daobǀî hâdi ī khami ge ī, ǁîdi gaxusib kas ǁîdi di ǂhabasib kas hoasa, tsî ǃgûǂoadaodi âdi hoadi on ge ǁnāti ǁkhāti xase ge i tsî ǁîdi dao-amdi xase. 12 Tsî dao-amdi ǃnā-omdi didi, ǃkhawagas ǃoa gau daobǀî hâdi ī khamis ge dao-amsa ge hâ i, daob di danas tawa amǀkhāb ǂnubiǂgoaba-u gau daob tawa aiǂoas ǃoa gau daob amǃgâ, ǁîs ǃnâts ra ǂgâo.
13 Ob ge tita ǃoa ge mî: “ǃNā-omdi ǀapas ǀkhāb didi tsî ǃnā-omdi ǃkhawagas ǀkhāb didi, ǃgaoǁnâhe hâ ǃkhais aiǃâ hâdi ge ǁnā ǃanu ǃnā-omdi, pristergu ǃKhūba ra ǀgūgu ǁîdi ǃnâ hoan xa ǃanu xūna nî ǂûde; ǁnāpan ge hoan xa ǃanu xūna nî ǁguihe, ǂûǁguibas tsî ǁoreǁguibas tsî ǀhapiǁguibas tsîna, ǃkhais a ǃanu xui-ao. 14 Pristergu ga ǂgâo, o gu ge ǃanusiba xu ǃauga hâ ai-ommi ǃoa ǁkhawa ǂoa tide tsî ǁîgu di saran, ǁîn ǃnâ gu ge ǃoabana ǁnāpa nî ǁgui, ǁîn a ǃanu xui-ao, tsî gu ge nau saran âga ǂgaeǂgā tsî nî ǀgū ǁnān ǁaes dina.”
Tempeli ǂnamipeb ǀnōǂuidi
15 Tsî ǀguirogu ommi di ǃnāb digab ge ǀguirotoa ob ge tita ge ūǂoa dao-ams ǃoa gau daoba-u aiǂoasǀî ǃoa hâba, tsîb ge ǁîba ge ǀguiro ǂnamipe. 16 ǁÎb ge aiǂoas di ǀkhāba ǀguiroǂāb ǀkha ge ǀguiro, korokaidisi ǂāgu kōse ǀguiroǂāb ǀkha ǁîb ǂnamipe. 17 ǁÎb ge ǀapas di ǀkhāba ge ǀguiro, korokaidisi ǂāgu kōse ǀguiroǂāb ǀkha ǁîb ǂnamipe. 18 ǃKhawagas di ǀkhābab ge ǁîba ge ǀguiro, korokaidisi ǂāgu kōse ǀguiroǂāb ǀkha. 19 Ob ge naru huriǂoasǀî tsîb ge ge ǀguiro, korokaidisi ǂāgu kōse ǀguiroǂāb ǀkha. 20 Ob ge haka ǀkhāgu hoaga ge ǀguiro, ǂnubiǂgoab ge ǁîb ǂnamipe ge hâ i, mâb hoab ge ǀgamkaidisi tsî korodisi metergu gaxusiba ūhâ iga, ǀgorasa ǃanub tsî ǃanuoǃnâb tsîkha ǁaegu nî dīse.
© Khoekhoegowab Elobmîs © Bible Society in Namibia, 2020.
