Elob ge Edomma ra ǁkhara
1 ǃKhūb di mîs ge tita ǃoa ge hā: 2 “Khoenôa ǀgôatse, sa aisa Seirǃhommi ǃoa unu, îts ǁîb ǃoagu kēbo, 3 î ǁîb ǃoa mî: Nētib ge ǃKhūb Eloba ra mî:
“Tita ge sats ǃoagu hâ Edomǃhomtse.
Tita ge ti ǃomma sats ǃoa nî ǀhōǂui,
tsî ta ge ǃū-aisa tsî hîkākāsa ǃkhaise nî dī tsi.
4 Tita ge sa ǃāde nî hîkākā,
tsîts ge satsa nî ǃgaroǃhū kai.
Ots ge tita a ǃKhū ǃkhaisa nî ǂan.
5 “Sats ge toa tama khākhoesiba Israeli ǀkha ge ūhâ i, tsîts ge ǁîb di khoena ǂōǂōsib ǁaeb ǃnâ gôab ǃnâ ge māǁnâ, ǀuniga ǁaeb ǁîn ǁoreb ǁkharab di ǃnâ. 6 ǁNā-amaga tita a ûitsama ǃkhais ao, tib ge ǃKhūb Eloba ra mî. Tita ge satsa ǁōba nî ǂhomiba; ǁōb ge satsa nî ǃgôaǃgon. ǀAoǂnâxūts ge amagab ge ǀaoba nî ǃgôaǃgon tsi. 7 Tita ge ǃhomxa ǃhūb Edomma nî ǃū-aisa ǃkhai kai tsî ta ge ǁîb ǃnâ-ū ra ǃkharun hoana nî hîkākā. 8 Tita ge sa ǃhomga ǁō hân sorodi ǀkha nî ǀoaǀoa; tsî sa ǃnâugu tsî ǃgoaǃnāgu tsî ǃāgu tsîn ǃnâ di ge gôab ǀkha ǃgamhe hân di sorode nî ǁgoe. 9 Tita ge satsa ǀamose nî ǃū-aisa ǃhūse nî dī tsî ge ge sa ǃāde ge khoe-i xare-i xa ǁan ǃnâhe tide, ots ge tita a ǃKhū ǃkhaisa nî ǂan.
10 “Sats ge mî amaga, ǁnā ǀgam ǁaera tsî ǃhūkha tsîn nî sa tsîts ǁîna nî ūbasen ǃkhaisa, ǃKhūb ǁnāpa hâ hîa. 11 ǁNā-amaga tita a ûitsama ǃkhais ao, tib ge ǃKhūb Eloba ra mî. Tita ge sa ǁaib tsî surixasib tsî ǁkhanǂgaoxasib ǁînats ge sîsenūb ǃoa nî dī-ū tsi. Tsî ta ge ǁîna nî mûǂan kai, satsa ta ga ǀgoraǃgâo. 12 Ots ge nî ǂan tita ǃKhūta ge Israeli di ǃhomgats ge ǁîdi ǀkha ǃkhāǃkhā mîde ǁnâu ǃkhaisa nētits ge mîo, ‘ǁÎgu ge ǃū-aisase ǁgoe, ǁîgu ge sada ǂûxūse māhe hâ.’ 13 Sa ams ǀkhats ge tita ǃoagu ge ǀgapiǀgapisen tsî ǂgui mîde tita ǃoagu ge ǃhoa, tsî ta ge ǁî ǃkhaisa ge ǁnâu.”
14 Nētib ge ǃKhūb Eloba ra mî: “Hoaraga ǃhūbaib ge nî ǃgâiaǂgao, satsa ta ga ǃū-aisa ǃkhaise dīo. 15 Sats ge Israeli ǀumis di hîkākāhes ǂama ǃgâiaǂgao khami ta ge sats tsîn ǀkha nî dī. Sats tsîn ge nî ǃū-aisa ǃkhai kai, Edomǃhomtse tsî hoa Edomǃhūtse, sats on ge hoaragase nî ǃū-aisa ǃkhai kai, on ge tita a ǃKhū ǃkhaisa nî ǂan.”
© Khoekhoegowab Elobmîs © Bible Society in Namibia, 2020.
